བོན་གྱི་ཡིག་ཚང་དུ་འཁོད་པ་ལྟར་ན་སྟོན་པ་གཤེན་རབས་མི་བོའི་དུས་སུ་ད་ལྟའི་ཡི་གེ་འདིའི་མ་ཡིག་ཡོད་པ་འདོད་ཚུལ་ནི། བདུད་ཁྱབ་པས་སྟོན་པའི་བསྟན་པ་ལ་བར་ཆད་བརྩམས་པའི་ཕྱིར་དུ། སངས་པོ་འབུམ་ཁྲིའི་ཡང་བཅུད་ལས་གྲུབ་པའི་ཡིག་འབྲུ་ཁྲི་དང་འབུམ་ཡོད་པ་རྣམས།བདུད་ཁྱབ་པས་མེར་བསྲེགས་སྐབས། ཡིད་ཀྱི་ཁྱེའུ་ཆུང་གིས་མེརམབརྙབས་པས་ལག་ཏུ་བེའུ་བམ་ཚིག་འཕྲོ་སྦར་གང་ཐོབ་ནས་མྱ་ངན་དང་བཅས་ཏེ་གཤེན་ལ་ཕུལ། སྟོན་པས་གསུངས་པ། མཁའ་གསལ་སྒྲོན་མ་མ་ནུབ་ན། སྐར་ཕྲན་ཐོར་བ་བཟོད་ཙམ་རྒྱུ། དཔའ་བོ་འབྲུ་ལྔ་མ་ཚིག་ན། ཡིག་འབྲུ་ཁྲི་འབུམ་བཟོད་ཙམ་རྒྱུ། ཞེས་གསུངས། དེ་ནས་སྟོན་པས་དཔའ་བོ་འབྲུ་ལྔ་ལས་འཕྲུག་གྱི་ཐོ་ཡིག་བཞི་ཅུ་སྤྲོས་པའོ། སྤྲོས་ཞེས་པ་ནི་དཔའ་བོ་འབྲུ་ལྔ་རེ་རེ་ལས་ཡིག་འབྲུ་བརྒྱད་རེ་ཐུགས་ལ་ཤར་བའི་ཚུལ་གྱིས་སྤྲོས། ད་དུང་སྟོན་པས་བཟོ་རྒྱལ་གར་མ་བི་ཤོ་ལ་ཡིག་བྲིས་གཉེར་དུ་གཏད་ཚུལ་ནི། གཟི་བརྗིད་ཁ་སྡེ་ལས། ཉོན་ཅིག་གར་མ་ལི་ཤོ་ཉོན། ཤེས་བྱ་ཀུན་གྱི་ཐོག་མ་རུ། ཤེས་པའི་གཞི་མ་ཡི་གེ་བསླབ། མི་ཤེས་ལྐུགས་པ་ཡི་གེས་བཀྲོལ། མི་ཤེས་རྨུག་པ་ཡི་གེས་སེལ། རིག་པའི་སྒྲོན་མེ་ཡི་གེ་འདོགས། དེ་ཕྱིར་ཡི་གེ་རྒྱུན་བརྟན་ན། ཤེས་བྱ་ཀུན་གྱི་གཞི་མ་ཡིན། ཞེས་སོགས་སྟོན་པས་གཉེར་གཏད་མཛད། ཡང་སྟོན་པ་འཁོར་རྣམས་ལ་འདི་ལྟར་བཀའ་བསྩལ་ཏེ། མཛད་པ་དྲུག་ཅུའི་མདོ་ལས། གཤེན་རབ་སྐུ་ཡི་འདུལ་བསྟན་ནང་། མ་འོངས་འགྲོ་ཀུན་ཐར་པ་འདྲེན་པའི་དཔལ། གསུང་དང་ཐུགས་ཀྱི་བསྟན་པ་རིམ་གྱིས་འབྱུང་། དེ་ཕྱིར་ང་ཉིད་མི་འབྱོན་ཡི་གེ་འབྱོན། རྒྱལ་བའི་བསྟན་པ་ཡི་གེས་འཛིན་དགོས་པས། འཕྲུལ་གྱི་ཡི་གེ་འདི་ལ་ཀུན་གྱིས་བཀུར། ཞེས་སོགས་གསུང་། ད་དུང་སྟོན་པའི་སྐུ་དང་། རྗེས་འཛིན་གྱི་བཀའ་བསྟན་ལ་སོགས་བོན་གཡི་ཡིག་ཚང་ནང་འཁོད་པ་ལྟར་ན་གནའ་བོའི་ཞང་བོད་ཡི་གེ་ལ་གྲངས་མང་ཉུང་གི་བཞེད་ཚུལ་ཅི་རིགས་སུ་མངོན་པ་སྟེ།
༡ གཡུང་དྲུང་ལས་དག་ལས་ཡིག་འབྲུ་སུམ་ཅུའི་འབྲུ་བཀོད་ཅིང་། ཡིག་ཕྲན་བརྒྱད་ཀྱིས་རྒྱན་བཀོད་ན། ཞེས་ཡིག་འབྲུ་སོ་བརྒྱད་དང་། ཡང་མདོ་གཟེར་མིག་ལས། གཏོ་ཡི་བཀའ་སྒྲོམ་བདུད་ཀྱིས་ཞུགས་ལ་བསྲེགས། བྱིན་གྱིས་བརླབས་པས་དཔའ་བོ་འབྲུ་ལྔ་ལུས།སྨོན་ལམ་བཏབ་པས་སུམ་ཅུ་རྩ་བརྒྱད་འཕེལ། ཕྱི་རབས་དོན་དུ་སྒོ་བཞི་མཛོད་ལྔ་བྲིས། ཞེས་གོང་འོག་གཉིས་ནི་ཡིག་འབྲུ་སོ་བརྒྱད་ཡོད་པ་མཚུངས།
༢ བསེན་ཐུབ་དང་ཡོངས་རྫོགས་ལས། ལྷ་ཡི་ས་བོན་དང་མཐུན་པར་ཡིག་གྲངས་གསལ་བྱེད་སུམ་ཅུ་དང་། དེ་ལྷག་བཅོ་ལྔ་བཅས་ཞེ་ལྔ་ཡོད་པར་འདོད་པ་ལ།
༣ ཡང་གཟི་བརྗིད་ལས། ཡིག་འབྲུ་སུམ་ཅུས་ཁོག་ཀྱང་དབུབ། མགོ་ཡི་ལམ་དྲངས་ཤད་མདོ་བཅད། ཚེག་གིས་བར་ཕྱེ་མི་འཁྲུག་སྙོམ། གུག་འགྲེང་ན་རོ་ཞབས་ཀྱུ་དང་། ཡ་སྟ་ར་སྟ་བཅས་པ་ཡི། སྐབས་སྦྱོར་ཡན་ལག་རྒྱས་པར་འདོགས། ཞེས་དང་། ཡང་མ་རྒྱུད་སྐྱེ་མེད་ཐིག་ལེ་ལས། གསལ་བྱེད་སུམ་ཅུའི་སྟེང་དུ། འཕྲུལ་ཡིག་བཞི་བཅུས་གོ་ཕྱེ་བ། ཀྵ་ཡི་ལམ་དྲངས་ཨས་བར་འབྱེད། ཥྟ་ཡིས་མདོ་བཅད་ཨི་ཨུ་ཨེ། ཨོ་ཨཾ་སྐབས་སྦྱོར་ཡན་ལག་བཏགས། བྷི་མྷིང་སྤུངས་པས་བཞི་བཅུར་འགྱུར། ཞེས་གསལ་བྱེད་སུམ་ཅུ་དང་། སྐབས་སྦྱོར་ཡི་གེ་བཅུ་བཅས་འཕྲུལ་གྱི་ཐོ་ཡིག་བཞི་བཅུ་བསྟན་པའི་འཕྲུལ་ཡིག་བཞི་བཅུ་ཞེས་པ་ཡོངས་སུ་གྲགས་པ་འདིའོ།། (མུ་འགོད)
|
|
