སྤྱི་ལོ་༢༠༡༥ལོའི་ཟླ་༩པའི་ཚེས༩ཉིན་གྱི་ཕྱི་དྲོར། ཀན་ལྷོའི་ཀླུ་ཆུ་རྫོང་སློབ་གསོ་ཅུས་ཀྱི་གྲོས་ཚོགས་ཁང་དུ། བོད་ཀྱི་ཡིག་གཟུགས་དྲ་བས་སྐབས་དང་པོའི་དྲ་ཚིགས་འཛུགས་གཉེར་སྐོར་གྱི་བྱ་བའི་བགྲོ་གླེང་ཚོགས་འདུ་བསྡུས། ཐེངས་འདིའི་བགྲོ་གླེང་ཚོགས་འདུ་ནི་དྲ་ཚིགས་གསར་སྤེལ་བྱས་ནས་ལོ་ངོ་གཅིག་ལ་ཉེ་བའི་སྐབས་སུ་འཚོགས་པ་ཡིན་ལ། གདན་ཞུའི་སྐུ་མགྲོན་ཐང་དགེ་སྒྲོལ་དཀར་སྐྱབས་དང་བོད་ཀྱི་ཡིག་གཟུགས་དྲ་བའི་རྩོམ་སྒྲིག་མི་སྣ་ཚང་མ་བགྲོ་གླེང་ཚོགས་འདུར་ཞུགས།
རེབ་འདིར་སྨྱུག་འཛིན་པ་སྐལ་བཟང་ཚེ་བརྟན་གྱིས་ཚོགས་འདུའི་མདོ་འཛིན་མཛད་ཅིང་། དྲ་བདག་རྟ་མགྲིན་མགོན་པོས་དྲ་ཚིགས་བཙུགས་པའི་སྔ་ཕྱིའི་གནས་ཚུལ་དང་། དྲ་ཚིགས་ཀྱི་ཐུན་མིན་རང་བཞིན་དང་དེའི་དོན་སྙིང་། འབྱུང་འགྱུར་འཕེལ་རྒྱས་ཀྱི་འཆར་ཇུས། དྲ་ཚིགས་ལེགས་སྒྲུབ་བྱེད་པའི་དཀའ་ཁག་དང་མ་འོངས་ཤུགས་སྣོན་རྒྱག་སའི་གནད་འགག་སོགས་ཀྱི་ཐད་ནས་གཏམ་བཤད་གལ་ཆེ་གནང་། དྲ་གཉེར་བ་དཔལ་མགོན་ཚེ་རིང་གིས་དྲ་ཚིགས་ཀྱི་སྤྱིའི་སྒྲིག་གཞིའམ། ནང་དོན་བཀོད་སྒྲིག་བྱེད་སྟངས་སོགས་ཚོགས་ཞུགས་མི་སྣ་ཚང་མར་ངོ་སྤྲོད་དང་གསལ་བཤད་བྱས་ཤིང་། རྩོམ་སྒྲིག་པ་རེ་རེའི་ངོས་ནས་ལེ་ཚན་བཀོད་སྒྲིག་དང་བྱ་བའི་ཆ་ནས་ལས་བགོས་ཕྲ་ཞིབ་བྱས། དེར་མཐུད་ནས་གདན་ཞུ་སྐུ་མགྲོན་ཐང་དགེ་སྒྲོལ་དཀར་སྐྱབས་ཀྱིས་དྲ་ཚིགས་འདི་ལྟ་བུ་ཞིག་ལེགས་སྒྲུབ་མཛད་པ་བོད་ཁ་བ་ཅན་ལ་མཚོན་ན་ངོ་མས་དོན་སྙིང་ལྡན་ལ་གལ་འགང་ཆེ་བ་ཞིག་ཡིན་ཟེར་བ་མ་ཟད། ཁོང་གིས་ནམ་ཡང་ལས་དོན་འདིར་རྗེས་སུ་ཡི་རངས་དང་། རྒྱབ་སྐྱོར་ཅི་ལྕོགས་བྱ་རྒྱུའི་འདུན་པ་བསྟན། རྩོམ་སྒྲིག་པ་ལྷན་རྒྱས་ནས་ཀྱང་དྲ་ཚིགས་ཀྱི་མིག་སྔའི་ཇུས་འགོད་དང་ནང་དོན་གྱི་ཐད་ནས་བསམ་འཆར་དང་གྲོས་གཞི་གང་མང་བོ་བཏོན་ཞིང་། དེང་ཕྱིན་གྱི་དྲ་བསྒྲུབ་བྱ་བའི་ཕྱོགས་སོ་སོ་ནས་གཏམ་གླེང་ཡག་པོ་བྱས་ཏེ་བཀྲ་ཤིས་པའི་ངང་ཚོགས་འདུ་མཇུག་བསྡུས་པ་རེད།
བགྲོ་གླེང་ཚོགས་འདུའི་ཡུལ་དངོས་འདྲ་པར།
ཀན་ལྷོའི་བྲིས་པའམ་པར་རིས་ཇུས་འགོད་པ་སྐལ་བཟང་ཚེ་བརྟན་གྱིས་མདོ་འཛིན་གནང་བཞིན་པ།
དྲ་གཙོ་རྟ་མགྲིན་མགོན་པོས་གཏམ་བཤད་གནང་བཞིན་པ།
ཀན་ལྷོའི་བྲིས་པ་དཔལ་མགོན་ཚེ་རིང་ལགས་ནས་དྲ་ཚིགས་ཀྱི་གནས་ཚུལ་མཚམས་སྦྱོར་གནང་བཞིནཔ།
གདན་ཞུའི་སྐུ་མགྲོན་ཐང་དགེ་སྒྲོལ་དཀར་སྐྱབས་ལགས་ཀྱིས་གཏམ་བཤད་གནང་པ།
༺གསར་འགོད་པ་བདེན་འཚོལ་གྱིས།༻
|
|
