གསེར་བྲིས་དངུལ་བྲིས་ཀྱི་གཞི་མཐིང་ཤོག་བྱ་ཐབས་ལ། ནག་མཚུར་བགྲུངས་སུ་བཅུག་ནས་ས་རྡུལ་མ་སོང་བར་དྲངས་བསིང་བྱ། ཐར་ནུའི་རླངས་པ་མིག་ཏུ་མ་སོང་བར་གདུས་པར་ཚ་ལ་བསྲེས་ཏེ་རས་ཚགས་ལ་བཙགས། དེ་གྲོ་ཆང་སྐྱུར་མོ་དང་བསྲེས་ཏེ་སྐོལ་བར། ཚ་ལ་དང་ནག་མཚུར་ཉུང་ཞིང་། གྲོ་ཆང་དང་ཐར་ནུ་མང་དགོས་ཏེ་ཚོད་ཟིན་པར་བྱ། ཤོག་སྐྱ་ལ་བྱུག་ནས་ཚོད་ལྟ་བྱེད་པར་ཤོག་བུ་ནག་ལོིག་གེར་སོང་བའི་ནང་དུ། དེང་གི་ཤོག་གུ་སྣ་ཐུང་རིགས་མ་ཡིན་པའི་བོད་ཤོག་སྤུས་ལེགས་པར་དྲངས་ཏེ་སྐམ་དུ་བཅུག དེ་ནས་ཨ་རུ་ར་འགའ་ཞིག་བརྡུངས་ཏེ་བཙོས་ནས་ཁུ་བ་རས་ཚགས་ལ་བཙགས་པར་ཤོག་བུ་དྲངས་པས་མཐིང་ཤོག་གྲུང་ཅིང་། འདུལ་ཐབས་ཤོག་བུ་དཀྱུས་མའི་ལག་ལེན་ལྟར་བྱའོ།
ཡང་རྒྱ་ནག་གི་ལུགས་སུ། མགྲོན་བུ་བསྲེགས་པ་ཞིབ་བཏགས་བྱས་པ་ལ། གྲོ་ཆང་དང་ཛྰ་ཏི་བཏབས་ཏེ་གདུས་པའི་ཁུ་བར་ཤོག་བཟང་དྲངས་པས་མཐིང་ཤོག་འབྱུང་ཞིང་། སྐམ་ནས་ཆགས་བྱས་ལ། ཨ་རུ་རའི་ཆུ་གོང་ལྟར་ལས་བཏོན་པར་བྱའོ། སོགས་མཐིང་ཤོག་བཟོ་བའི་ལག་ཤེས་མང་དུ་འབྱུང་ཡང་ལག་ལེན་སྟབས་བདེ་གཉིས་ཙམ་བྲིས་པའོ།
བོད་ཀྱི་ལག་ཤེས་ཀུན་འདུས་ཆེན་མོ་ལས།
|
|
