༄༅།།ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་བསྡུར་དང་འགྲེམས་སྟོན།

     དེ་ཡང་བོད་ཀྱི་སྲོལ་རྒྱུན་གྱི་ཐུན་མོང་མ་ཡིན་པའི་ཡིག་གཟུགས་ཁྲིད་ཐབས་ཏེ་སྦྱང་ཤིང་གི་སྟེང་དུ་འབྲི་བའི་བྲིས་རྒྱུན་དབུས་ཕྱོགས་སུ་མ་གཏོགས་ད་སྐབས་མདོ་སྨད་དུ་ཉམས་རྒུད་ཆེན་པོ་བྱུང་ཡོད་མོད། ཁོང་གིས་སྲོལ་རྒྱུན་བཟང་པོ་དེ་ཉིད་རྒྱུན་འཛིན་དང་དར་སྤེལ་གཏང་ཆེད་སློབ་གླིང་འདིའི་སློབ་མ་ཐམས་ཅད་ཀྱིས་སྦྱང་ཤིང་གི་སྟེང་དུ་འབྲི་བ་ནས་དབུ་བཟུང་སྟེ་དབུ་ཅན་སྙུག་རིས་དང་སྙུག་བཅད། དབུ་མེད་ཚུགས་རིང་ནས་དབུ་མེད་འཁྱུག་བྲིས་བར་དུ་ཁྲིད་ཐབས་དང་ལག་ལེན་གྱི་གོ་རིམ་མ་འཁྲུགས་པར་ཚད་ལྡན་ངང་སློབ་ཁྲིད་བྱས་པར་བརྟེན་སློབ་མ་རྣམས་ལ་བོད་ཀྱི་ཡིག་གཟུགས་ཀྱི་ཁྲིད་ཐབས་དང་ལག་ལེན་སོགས་ལེགས་པོར་ངོས་འཕྲོད་དེ་རྨང་གཞི་ཡག་པོ་བཞག་ཡོད།

     ཉིས་སྟོང་བཅུ་བཞི་ལོའི་སྟོན་ཁར་ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་བསྡུར་དང་འགྲེམས་སྟོན་གྱི་བྱ་འགུལ་ཐེངས་དང་པོ་སྤེལ་ཞིང་ལྟད་མོ་བ་དང་གཟིགས་ཞིབ་པ་ཚང་མས་བསྔགས་བརྗོད་ཆེས་ཆེར་ཐོབ་ཡོད།

     དེ་རིང་སྟེ་ཕྱི་ལོ༢༠༡༥ ཟླ༦ ཚེས༡༦ ཉིན་སྤེལ་བའི་ཐེངས་གཉིས་པའི་ཐོན་མིའི་ཕྱག་རྒྱུན་རྟགས་མའི་ཡིག་གཟུགས་འགྲན་བསྡུར་དང་འགྲེམས་སྟོན་གྱི་མཛད་སྒོ་མདོ་ཁམས་རྫ་རྒྱུད་འབུམ་རྙིང་ཤེས་རིག་གླིང་དུ་སྤེལ་ཞིང་། མཛད་སྒོའི་སྟེང་དུ་འབུམ་རྙིང་དགོན་གྱི་མཁན་རིན་པོ་ཆེས་དབུ་བྱས་པའི་བླ་སྤྲུལ་དགེ་བའི་གཤེས་གཉེན་མང་པོ་ཞིག་ཕེབས་ཏེ་བཀའ་སློབ་རིམ་པར་གནང་ཞིང་། བླ་སྤྲུལ་དགེ་བཤེས་དང་འདུས་མང་། དེེར་ཕེབས་ལྟད་མོ་བ་ཚང་མས་སློབ་མ་རྣམས་ཀྱིས་བྲིས་པའི་ཡིག་གཟུགས་སྒྱུ་རྩལ་ལ་ཧ་ལས་ཧང་སངས་ཀྱི་ངང་ནས་བསྔགས་བརྗོད་ཆེས་ཆེར་མཛད་སོང་།