བོད་ཀྱི་ཡིག་གཟུགས་དྲ་བ་གསར་སྤེལ་ཚུན་གྱི་ཟླ་ངོ་བརྒྱད་ཀྱི་རིང་ལ། ཡིག་མཁན་དགེ་རྒན་རྣམ་པའི་ཐུགས་ཁུར་དང་། ཐོན་མའི་མཛུབ་རིས། བོད་ཀྱི་ཡིག་གཟུགས་གླེང་མོལ། བྲིས་པའི་འདུ་ར། ཡིག་གཟུགས་ཁང་བཅས་སྐད་འཕྲིན་ཚོགས་པའི་རྒྱབ་བརྟེན་ནམ། བོད་མདོ་དབུས་ཁམས་གསུམ་གྱི་ཡིག་གཟུགས་ཕྱི་རབས་པའི་རྒྱབ་སྐྱོར་རམ་དགའ་བསུའི་སྟེང་ནས་དྲ་ཚིགས་འཕེལ་རྒྱས་ལ་སྔར་ལས་ལྷག་པའི་སྒུལ་ཤུགས་སམ་སྤོབ་པ་བསྩལ་ལ། ལྷག་པར་དུ་ཡིག་གཟུགས་དྲ་བའི་གདན་ཞུ་དགེ་རྒན་རྣམ་པའི་ཐུགས་ཁུར་ལས་བོད་མདོ་དབུས་ཁམས་གསུམ་ཀྱི་ཕྱི་རབས་ཡིག་གཟུགས་པ་རྣམས་ལ་དུས་དང་རྣམ་པ་ཀུན་ཏུ་བོད་ཀྱི་ཡིག་གཟུགས་རིག་གནས་འཛིན་སྐྱོང་སྤེལ་གསུམ་ཐད་མཛུབ་སྟོན་དང་སྐུལ་ལྕགས་རྒྱུན་མི་ཆད་པར་གནང་པའི་མཛད་བཟང་ལ་ངེད་བོད་ཀྱི་ཡིག་གཟུགས་དྲ་བའི་ལས་མི་ཡོངས་ནས་གུས་འདུད་དང་བཀའ་དྲིན་ཆེ་ཞུ་བ་ཡིན།
དེང་འདིར་དགེ་བའི་བཤེས་གཉེན་རྣམ་པའི་སྙན་ལམ་དུ་འབུལ་རྒྱུ་ནི། རྒན་རྣམ་པའི་མི་སྒེར་ཡིག་གཟུགས་འགྲེམ་སྟོན་ཁང་ལ་གསོན་མདངས་རྣམ་པར་བཀྲ་ཤིང་གསར་སློབ་པ་དང་ཡིག་གཟུགས་སྒྱུ་རྩལ་ལ་དགའ་མགུ་ལྡན་པའི་ཀློག་པ་པོ་རྣམས་ལ་མིག་གི་དགའ་སྟོན་ནམ་སློབ་སྦྱོང་གི་མཛུབ་སྟོན་བྱ་བའི་ལས་འགན་ཅི་ལྕོགས་བྱ་ཕྱིར། ནང་དོན་དང་བྲིས་རྩལ་འབུར་དུ་ཐོན་པའི་བརྩམས་ཆོས་དུས་དང་རྣམ་པ་ཀུན་དུ་ཁ་སྣོན་དང་བརྗེས་སྤོར་བྱ་རྒྱུའི་རེ་བ་ཡང་ཡང་ཞུ།
བརྗེས་སྤོར་བྱ་རྒྱུའི་བརྩམས་ཆོས་ཁག་སྐུར་པའི་དུས་ཚོད་ལ་ཚད་བཀག་མེད་པར་དགེ་རྒན་རང་ཉིད་ཀྱིས་ཅི་བདེར་བྱས་ནས་སྐུར་ཆོག བརྩམས་ཆོས་སྐུར་ཚུལ་ཐད་སྐད་འཕྲིན་སྟབས་བདེ་ཡིན་ནའང་སྐད་འཕྲིན་སྟེང་དུ་སྐུར་ན་གཅིག་ནས་སྐད་འཕྲིན་རང་ངོས་ཀྱི་བརྡ་འཕྲིན་མང་པོའི་རླབས་རྒྱུན་གྱིས་དེད་ནས་བརྙན་ངོས་ཀྱི་མཐའ་ལ་ཕུད་སྟབས་ངེད་དྲ་བདག་གིས་དུས་ལྟར་མཐོང་དཀའ་བ་དང་། གཉིས་ནས་རྐྱེན་སྣ་ཚོགས་ཀྱི་དབང་གིས་དུས་ལྟར་ཕབ་ལེན་བྱ་མ་ཐུབ་པར་ལུས་པ། དགེ་རྒན་དུ་མའི་བརྩམས་ཆོས་དུས་གཅིག་ཏུ་ཕབ་ལེན་བྱས་ཚེས་བརྩམས་ཆོས་ལ་མིང་རྟགས་བཀོད་ཡོད་མེད་སོགས་ཀྱི་དབང་གིས་དགེ་རྒན་སུ་དང་སུའི་ཡིན་མིན་ངོས་འཛིན་དཀའ་བ་སོགས་ཀྱི་དབང་གིས་དྲ་ངོས་སུ་འགོད་མ་ཐུབ་པ་གང་མང་མང་ཞིག་ཡོད། དེ་བས་ཡིག་མཁན་རང་གི་འགྲེམ་སྟོན་ཁང་ལ་ཁ་གསབ་བྱ་རྒྱུའི་བརྩམས་ཆོས་དག་ངེས་པར་དུ་བོད་ཀྱི་ཡིག་གཟུགས་དྲ་བའི་ཆེད་སྤྱོད་ཡིག་སྒམ་dzgb@zgzzsfw.comལ་སྐུར་རྒྱུ་དང་། བརྩམས་ཆོས་ཁག་ལ་ཡིག་གཟུགས་ཐད་བྲིས་རྒྱུན་གང་གི་བྲིས་གཟུགས་གང་ཡིན་པ།སྒྱུ་རྩལ་བརྩམས་ཆོས་ཁག་ལ་རང་ངོས་ཀྱི་འགྲེལ་བཤད་སོགས་གསལ་བཤད་མདོར་བསྡུས་དང་བཅས་སྐུར་ན། རང་ཅག་ཡིག་གཟུགས་ལས་དོན་གྱི་འཕེལ་རྒྱས་ལ་ཕན་ནུས་ངེས་ཅན་འབྱུང་སྲིད་པས་རྣམ་པ་ཚོས་དེའི་དོན་དགོངས་འཇགས་ཡོང་བར་བཀའ་དྲིན་ཆེ་ཞུ་ཞུ།
བོད་ཀྱི་ཡིག་གཟུགས་དྲ་བའི་རྩོམ་སྒྲིག་ཁང་ནས།
|
|
