བོད་ལྗོངས་ལྷ་ས་གྲོང་ཁྱེར་གྱི་ལྟ་གོན་སློབ་གསོའི་བྱ་བར་སྲིད་གཞུང་གིས་འཛུགས་གཉེར་བྱས་པའི་སློབ་གྲྭ་ལས་གཞན་ད་དུང་མི་སྒེར་གྱིས་བཙུགས་པའི་ལྟ་གོན་སློབ་གྲྭ་དང་གྲ་སྒྲིག་འཛིན་གྲྭ་སོགས་གང་མང་ཞིག་ཡོད་པ་རེད། ལྷག་པར་དུ་ལྷ་ས་གྲོང་ཁྱེར་ཁྲིན་ཀོན་ཆུས་རོལ་རྩེད་ལྡུམ་རའི་བུ་གསོ་ཁང་གི་དགེ་རྒན་འཕྲིན་ལས་ཆོས་གྲགས་ཀྱིས་ཁྱིམ་བདག་རྣམ་པའི་རེ་བ་དང་། རང་ཉིད་ཀྱི་དགའ་ཕྱོགས་དང་འཇོན་ཐང་གནས་ཚུལ་གཞི་བྱས་ནས་ལོ་ལྔའི་སྔ་རོལ་དུ་གྲོང་ཁྱེར་ལྷ་ས་ནས་གངས་ལྗོངས་སྲོལ་རྒྱུན་ཡིག་གཟུགས་རྒྱུན་འཛིན་འཛིན་གྲྭ་ཞེས་པའི་ཡིག་གཟུགས་སློབ་གྲྭ་ཞིག་ལེགས་བསྒྲུབས་བྱས་ཤིང་། དེ་རིང་བར་བོད་ཀྱི་སློབ་བུ་མི་ཉུང་བ་ཞིག་ལ་ཡིག་གཟུགས་ཀྱི་འདབ་ལག་རྒྱས་བར་རྨང་གཞི་ཡག་པོ་བཙུགས་སྐད། དེ་བས་ངེད་བོད་ཀྱི་ཡིག་གཟུགས་དྲ་བས་ཆེད་དུ་དེའི་སྐོར་ལ་རྒྱུས་ལོན་བྱས་པའི་གནས་ཚུལ་གཤམ་ལྟར།
༢༠༡༠ལོར་གསར་དུ་བཙུགས་པའི་གངས་ལྗོངས་སྲོལ་རྒྱུན་ཡིག་གཟུགས་རྒྱུན་འཛིན་འཛིན་གྲྭ་འདི་ནི་སྲོལ་རྒྱུན་ཡིག་གཟུགས་ཁྲིད་སྦྱོང་ཐད་ནས་མི་སྒེར་གྱིས་བཙུགས་པའི་འཛིན་གྲྭ་ཞིག་ཡིན་ལ། ད་ཡོད་ཀྱི་དགེ་རྒན་གཉིས་དང་གདན་ཞུའི་ཁྲིད་སྟོན་དགེ་རྒན་བཞི་ལྔ་སོགས་ཡོད་པ་མ་ཟད། བོད་ཀྱི་ཡིག་མཁན་ལྷག་པ་ཚེ་རིང་སོགས་མཁས་པ་མི་ཉུང་བས་ཐུགས་ཁུར་བརྒྱབ་སྐྱོར་ཐོབ་པའི་འཛིན་གྲྭ་ཞིག་ཏུ་གྱུར་ཡོད། ད་ལྟ་སློབ་གྲྭ་འདིར་དངོས་ཡོད་ཀྱི་སློབ་མ་དྲུག་ཅུ་ཡོད་པ་དང་། ཚང་མ་ལོ་ན་བཞི་ལྔ་ཅན་གྱི་ལོ་ཆུང་བྱིས་པ་ཁོ་ན་ཡིན། སློབ་སྦྱོང་གི་གནས་ཚུལ་ལྟར་སློབ་གྲྭ་འདིར་ལོ་རིམ་དང་པོ་དང་སྔོན་འགྲོའི་འཛིན་གྲྭ་ཞེས་ཁག་གཉིས་སུ་བགོས་དེ་ཡིག་གཟུགས་སློབ་ཁྲིད་ཁོ་ན་གནང་བཞིན་མཆིས། དགེ་རྒན་གྱི་དཔུང་ཁག་གི་ཆ་ནས་རྒན་འཕྲིན་ལས་ཆོས་གྲགས་ལགས་ནས་དཀའ་ཁག་ཁྱད་བསད་ཀྱིས་བོད་ལྗོངས་སློབ་ཆེན་སོགས་ནས་ཡིག་གཟུགས་ཀྱི་རྨང་གཞི་བཟང་བའི་སློབ་ཆེན་སློབ་མ་དུ་མ་དགེ་རྒན་དུ་མ་གདན་འདྲེན་བྱས་ནས་ཟླ་ཕོགས་རང་གྲོན་གྱིས་ཡིག་གཟུགས་རིག་གནས་ཆུང་བྱིས་པ་ནས་རྨང་འདིང་བའི་བྱ་བཞག་གཉེར་རྒྱུ་རྒྱུན་འཁྱོངས་བྱས་པ་རེད།
འཛིན་གྲྭ་འདིའི་སློབ་བུ་ཚོ་ནི་ཀ་ཁ་མི་ཤེས་པའི་བྱིས་པ་ལོ་ན་བཞི་ལྔ་ཅན་ཁོ་ན་ཡིན་རུང་། དགེ་རྒན་རྣམ་པའི་དཀའ་སྤྱད་འབད་བརྩོན་ལ་བརྟེན་ནས་ད་བར་གཞུང་བྲིས་ཚུགས་རིང་ལ་སྦྱང་བ་བྱེད་པ་དང་། བོད་ཡིག་གསལ་བྱེད་སུམ་བཅུ་ཀློག་ཤེས་ལ་བོད་ཀྱི་སྲོལ་རྒྱུན་ཡིག་གཟུགས་ཀྱི་ཁྲིད་རྒྱུན་གཙང་མ་རྡོ་ལག་རྒྱུན་གྱི་ཚུལ་དུ་སློབ་བུ་ཚོའི་ཡིད་སེམས་གོར་མོའི་རྡོ་ལ་ཕབ་ཅིང་། སྔ་རབས་མཁས་པའི་ཕྱག་རྒྱུན་གཙང་མའི་བག་ཆགས་ཀྱི་ས་བོན་ཡག་པོ་ཞིག་འདེབ་ཅིང་མཆིས།
སྔོན་འགྲོའི་མཉམ་ཀློག་གནས་ཚུལ།
དང་པོ། དགེ་རྒན་གྱི་ཡིག་གཟུགས་དཔེ་ཁྲིད་གནས་ཚུལ།
གཉིས་པ། སློབ་མ་ཚོས་འབྲི་སྦྱོང་བྱེད་པ་དང་དགེ་རྒན་གྱི་ཁྲིད་སྟོན་གནས་ཚུལ།
གསུམ་པ། གདན་ཞུའི་དགེ་རྒན་གྱིས་ཁྲིད་སྟོན་གནང་བཞིན་པ།
|
|
