ཀརྨའི་སྒར་བྲིས་ཉམས་གསོ་པ་དགེ་རྒན་ཤེས་ཕུན་ཚོགས་སམ་དྲ་མིང་ལ་ཐོག་འབྲོག་ཕྲུག་ལགས་ནི་སྤྱི་ལོ་༡༩༥༥ལོར་ཁམས་ནང་ཆེན་གྲ་ནང་འབྲོང་ཤོག་འབྲོག་སྡེ་ཕྱུག་མོའི་ཡོབ་གཞུང་བཀྲ་ཤིས་ལྷ་ཐང་དུ། ཕ་ཐོག་དགེ་ཨོ་རྒྱན་དབང་ཕྱུག་དང་མ་གོང་པ་བཟའ་ནོར་འཛིན་དཔལ་མོ་གཉིས་ཀྱི་བུ་རུ་སྐྱེས། ལོ་ངོ་བདུན་གྱི་ཐོག་དགེ་རྒན་ཀརྨ་བསམ་གཏན་རྒྱ་མཚོའི་མདུན་ནས་འབྲི་ཀློག་ཐོག་མར་བསླབས། ལྷག་པར་དུ་ལོ་ཤས་རིང་ཀརྨའི་སྒར་བྲིས་ཀྱི་འཁྲིད་རིམ་མ་ནོར་བ་སྦྱང་བརྩོན་བྱས་ཏེ་བྲིས་རྒྱུན་ཅན་༧ནང་ཆེན་རྒྱལ་སྲས་ཨ་ཆེན་དང་༧ཨ་ལྡེའུ་རིན་པོ་ཆེ་རྣམ་གཉིས་ཀྱི་བསྟོད་བསྔགས་དང་། དགེ་རྒན་གྱི་ལས་གནས་ཐོག་གཞུང་གི་ལས་དོན་ལ་ཞིང་ཆེན་དང་ཁུལ་རྫོང་རིམ་པའི་གཟེངས་རྟགས་ཐུབ་མྱོང་། ཟུར་དུ་ནང་ཆེན་ཡུལ་གྱི་ལས་བཟོ་བ་དང་ཆུང་འབྲིང་སློབ་མ་ཁག་དགོན་པ་ཁག་དང་མི་དམངས་མང་ཚོགས་བཅས་ལ་ལྷག་བསམ་རྣམ་དག་གིས་ལོ་མང་པོའི་རིང་ལ་ཟབ་སྦྱོང་གནད་སྨིན་བྱས་ནས་ཀརྨའི་སྒར་བྲིས་ཀྱི་བྲིས་གཟུགས་སློབ་ཁྲིད་མང་པོ་བྱས་ལ། ཀརྨའི་སྒར་བྲིས་ཀྱི་བྲིས་དཔེ་མ་ནོར་ལམ་སྟོན་ཞེས་བྱ་བ་དཔར་སྐྲུན་བྱས་ཡོད། ད་ལྟ་ནང་ཆེན་རྫོང་བོད་ཀྱི་ཤེས་རིག་ཞིབ་འཇུག་དར་སྤེལ་ཚོགས་པའི་ལས་ཀ་དང་ཀརྨའི་སྒར་བྲིས་ཀྱི་ཉམས་གསོ་ལས་ཀར་ནུས་ཤུགས་གང་ཡོད་འདོན་བཞིན་པ་དང་མི་རིགས་ཀྱི་སྲོལ་རྒྱུན་རིག་གནས་ལ་ཞེན་པ་ཧ་ཅང་ཆེ་བས་རང་ནུས་ཅི་ལྕོག་རྒྱུན་འཁྱོངས་བྱེད་བཞིན་ཡོད་པས། ང་ཚོའི་ནང་ཆེན་ཡུལ་ལ་ཆེས་དར་ཁྱབ་ཆེ་བའི་ཀརྨའི་སྒར་བྲིས་བྲིས་རྒྱུན་ལྷམ་མེར་འཚེར་ནས་སློབ་གྲྭ་ཁག་གི་དགེ་སློབ་དག་བྲིས་རྩལ་གྱི་ཕ་ཡུལ་ཞེས་པའི་མཚན་སྙན་གྱི་མགུལ་རྒྱན་སྒྲོན་ཡོད་པ་རེད།
|
|
