ཞང་ཞུང་ནི་ཁ་བའི་ལྗོངས་སུ་ཤེས་བྱའི་ཆུ་ཀླུང་གིས་འཁྱིལ་བར་བྱེད་པའི་ཆུ་འགོ་གཙོ་བོ་ཞིག་ཡིན་པ་དང་། བོད་མི་རིགས་འདིའི་ཤེས་རིག་དཔལ་ཡོན་མངོན་པར་བཞད་པའི་རྩ་བ་ཐོག་མ་ཚུགས་ས་དེ་ཡིན་གཤིས་བོད་ཀྱི་ལོ་རྒྱུས་ཐོག་གལ་ཆེའི་གནས་བབ་ཏུ་འཁོད་པའི་རྒྱལ་ཕྲན་ཞིག་ཡིན་ལ་བོད་ཀྱི་ཡིག་སྲོལ་ཐོག་མ་དབུ་བརྙེས་ཡུལ་ཡང་ཡིན། དེར་བརྟེན་སྐབས་འདིར་ཞང་ཞུང་གི་ལོ་རྒྱུས་ཞིབ་ཕྲ་ཇི་ཡིན་དཔྱད་འགྲེལ་བྱེད་པ་སྐབས་བབས་ཀྱི་བརྗོད་དོན་མ་ཡིན་ཡང་། ང་ཚོས་བོད་ཀྱི་ཡི་གེའི་སྐོར་གླེང་བའི་སྐབས་ཡི་གེ་བྱུང་བའི་ལོ་རྒྱུས་ཀྱི་གཞི་གང་ཡིན་གསལ་བར་རྟོགས་ཕྱིར་སྙིང་བསྡུས་ཀྱི་ཐོག་ནས་ཞང་ཞུང་གི་གནས་ཚུལ་མདོ་ཙམ་ཞིག་བརྗོད་པ་དགོས་གལ་ཆེ་བར་སྙམ།
ཞང་ཞུང་ནི་རྒྱལ་ཕྲན་བཅུ་གཉིས་ནང་གི་ཡ་གྱལ་ཞིག་ཡིན། སྤྱིར་ན་དེའི་དུས་སུ་རྒྱལ་ཕྲན་རྣམས་རྩ་བའི་ཆར་ལོ་རྒྱུས་ཀྱི་དུས་མཚམས་གཅིག་གི་ཐོག་ཏུ་གནས་ཡོད་ཀྱང་ཡུལ་དུས་ཀྱི་ཆ་རྐྱེན་སོགས་རྒྱུ་རྐྱེན་སྣ་ཚོགས་ཀྱིས་རྐྱེན་པས་རྒྱལ་ཕྲན་ཚང་མ་གོམ་པ་གཅིག་སྤོས་ལྟར་གྱི་འཕེལ་རྒྱས་འགྲོ་ཚད་མཉམ་པ་བྱུང་མེད་ལ་འབྱུང་ཐབས་ཀྱང་མེད། སྐབས་དེར་རྒྱལ་ཕྲན་སོ་སོའམ་ས་གནས་སོ་སོའི་དབར་འཕེལ་རྒྱས་ཆེ་ཆུང་གི་ཁྱད་པར་གྱིས་སྔོན་ཐོན་དང་རྗེས་ལུས་ཕྱོགས་གཉིས་ཀྱི་རྣམ་པ་ཡང་མངོན་གསལ་ཅུང་ཆེ་ཙམ་ཡོད་པའི་ཁོངས་ནས་ཐོན་སྐྱེད་དང་ཤེས་རིག་སོགས་གང་སྤྱིར་ས་གནས་གཞན་ལས་ཡར་རྒྱས་འགྲོ་ཚད་ཆེ་བ་བྱུང་ནས་སྔོན་ཐོན་གྱི་ཚུལ་དུ་གནས་པའི་རྒྱལ་ཕྲན་ནི་ཞང་ཞུང་ཡིན་པས། བོད་ཀྱི་ཡི་གེའི་སྲོལ་ཐོག་མ་དེ་ཡང་ཞང་ཞུང་དུ་བྱུང་། ཡི་གེའི་སྲོལ་ཐོག་མ་ཞང་ཞུང་དུ་དར་བ་དེ་ནི་ལོ་རྒྱུས་དང་སྤྱི་ཚོགས་ཀྱི་མཐུན་རྐྱེན་མང་པོ་ཞིག་འདུས་པ་ལས་བྱུང་བའི་འབྲས་བུ་ཞིག་ཡིན་པ་ལས་སྟེས་དབང་དུ་བྱུང་བ་ཞིག་མ་ཡིན། དེ་ཡང་ལོ་རྒྱུས་ཐོག་ཞང་ཞུང་ཞེས་འབོད་པའི་རྒྱལ་ཕྲན་འདིའི་གནས་ཡུལ་གཙོ་བོ་ནི་ཁ་བའི་ལྗོངས་ཀྱི་ནུབ་ཕྱོགས་འཛམ་གླིང་ཡང་རྩེའི་ཡང་རྩེར་གྲགས་པའི་མངའ་རིས་སྐོར་གསུམ་གྱི་རྒྱུད་དུ་ཡིན།
སྤྱི་ལོའི་སྔོན་གྱི་དུས་སྐབས་སུ་གངས་ཏེ་སེ་དང་མཚོ་མ་ཕམ་གྱིས་ལྟེ་བར་བྱས་པའི་ཡངས་པའི་མངའ་རིས་མཐོ་སྒང་ཁྱོན་གྱི་སྣོད་བཅུད་འཇིག་རྟེན་གྱི་ཆགས་ཚུལ་དེང་སྐབས་དང་མི་འདྲ་བར་ཧ་ཅང་བཟང་བ་སྟེ། རྨ་བྱ་དང་། རྟ་མཆོག གླང་ཆེན། སེང་གེ་བཅས་ཁ་བབས་ཆུ་བོ་བཞི་ཡིས་ལེགས་པར་བསྲིངས་པའི་ཡུལ་ཕྱོགས་གང་སར་རྩི་ཤིང་སྣ་ཚོགས་རྒྱས་པ་དང་། སྤང་ལྗོངས་རྒྱ་ཆེར་ཁེབས་པ། མཚོ་དང་མཚེའུ་མང་བ། འདབ་ཆགས་རི་དྭགས་སྣ་ཚོགས་བག་ཕེབས་སུ་གནས་པ། ཕྱོགས་མཐར་མི་རིགས་གཞན་གྱི་གནས་ཡུལ་དང་ས་འབྲེལ་ཡིན་པ་སོགས་ཐོན་སྐྱེད་གོང་སྤེལ་དང་མི་སྡེ་འཚོ་གནས་ཀྱི་རང་འབྱུང་མཐུན་རྐྱེན་བཟང་བས། མི་འབོར་ཡང་ད་ལྟ་ལས་ལྡབ་མང་པོས་མང་བ་ཡོད། དེ་འདྲའི་ཁོར་ཡུག་གི་ཁྲོད་དུ་གནས་པའི་ཞང་ཞུང་རྒྱལ་ཕྲན་འདིའི་མངའ་ཁོངས་སྤྱི་ལ་ཡོངས་གྲགས་སུ་ཞང་ཞུང་ཕུག་པ་དང་། ཞང་ཞུང་བར་པ། ཞང་ཞུང་སྒོ་པ་བཅས་ཚན་གསུམ་དུ་དབྱེ་བ་དང་། དེ་ལ་ཡང་གཞི་རྒྱ་ཆེ་ཆུང་གི་དབྱེ་སྲོལ་གཉིས་ཡོད་པར་བཤད་པ་ལ། གཞི་རྒྱ་ཆེ་བའི་ངོས་ནས་བཤད་ན་མདོ་སྨད་ཕྱོགས་ལ་སྒོ་པ་དང་། དབུས་གཙང་གི་ཕྱོགས་ལ་བར་པ། མངའ་རིས་ཀྱི་ཕྱོགས་ལ་ཕུག་པ་ཅེས་བརྗོད་པ་དང་། གཞི་རྒྱ་ཆུང་བའི་ངོས་ནས་བཤད་ན་ཞང་ཞུང་གི་གནས་ཡུལ་གཙོ་བོ་སྒོ་པ་སྟེ་མངའ་རིས་ལ་དྭགས་རྒྱུད་དུ་ཡང་སྒོ་ཕུག་བར་གསུམ་གྱི་དབྱེ་བ་ཡོད་པར་བཤད་པ་སྟེ《སྟོད་མངའ་རིས་སྐོར་གསུམ་གྱི་ལོ་རྒྱུས་འབེལ་གཏམ་རིན་ཆེན་གཏེར་གྱི་ཕྲེང་བ》ལས“ཞང་ཞུང་ས་གནས་འདི་བོན་གྱི་འབྱུང་གནས་ཞེས་གྲགས་ཤིང་།དེ་ལ་ཡང་སྒོ་ཕུག་བར་གསུམ་ཡོད་པ་ལ་ཕུག་བར་གཉིས་བཤད་པ་རྒྱ་ཆེ་བས་ལོགས་སུ་གསལ། སྒོ་པ་འདི་ནི་ཞང་ཞུང་དངོས་ཀྱི་ཡུལ་ཡིན། སྒོ་པ་ལའང་སྒོ་ཕུག་བར་གསུམ་ཡོད་པའི་ཕུག་པ་ནི་གངས་རི་མཚོ་ཡིས་བསྐོར་བའི་ཞང་ཞུང་གུ་གེའི་ཡུལ་ཡང་ཟེར། བར་པ་ནི་རྟ་གོ་དང་དྭངས་རྭའི་སྐོར། སྒོ་པ་ནི་གྱིམ་ཤོད་རི་རྩེ་དྲུག་གི་སྐོར་ཡིན”ཞེས་དང་། དེ་ཡི་ཁོངས་སུ“ཞང་ཞུང་གི་རྒྱལ་ས་གྲགས་ཆེ་བ་ཁྱུང་ལུང་དངུལ་མཁར། པུ་ཧྲང་རྟ་ལྷ་མཁར། མ་པང་སྤྲོས་མོ་མཁར། སྨོ་ཤང་བྱེ་བ་མཁར།གད་ཀྱི་བྱི་བ་མཁར་སོགས་མཁར་རྣམས་དང་། དྭངས་རྭ་ཁྱུང་རྫོང་། སེ་རིབ་འབྲུག་མོ་རྫོང་། རུ་ཐོག་སེང་གེ་རྫོང་། མང་ཡུལ་སྟག་མོ་རྫོང་། སྦལ་རི་ཧྲང་རྫོང་སོགས་རྫོང་རྣམས་དང་། གཞན་ཡང་ཡུལ་ཆེན་བཅོ་བརྒྱད། ཡུལ་ཁམས་དྲུག་ཅུ། ཁྲི་སྡེ་བརྒྱད་ཅུ་ཡོད(ཤོག་གྲངས་༢༨༢）ཅེས་གསལ་བ་དང་། ལོ་རྒྱུས་དེབ་ཐེར་གཞན་མའི་ནང་དུ་ཡང་ཞང་ཞུང་གི་མངའ་འོག་ཏུ་སྟོད་ཀྱི་སྟོང་སྡེ་ལྔ་དང་། སྨད་ཀྱི་སྟོང་སྡེ་ལྔ་ཡོད་པར་བཞེད་པ་བཅས་ལ་གཞིགས་ན་གཞི་རྒྱ་ཆུང་བའི་སྒོ་ཕུག་བར་གསུམ་གྱི་ཁོངས་སུ་ཡང་མཁར་རྫོང་དང་ཡུལ་སྡེ་ཧ་ཅང་མང་པོ་ཡོད་པ་གསལ་བར་མཐོང་ཐུབ། སྤྱིར་ཞང་ཞུང་གི་མངའ་ཁོངས་རྒྱ་ཆེ་ཆུང་དང་།སྒོ་ཕུག་བར་གསུམ་གྱི་ས་ཁོངས་དབྱེ་སྟངས་སོགས་ཀྱི་ཐད་ཤོད་ཚུལ་མི་འདྲ་བ་མང་དུ་མཆིས་པའི་ནང་གང་ཞིག་ཁུངས་བཙན་གྱི་ཤོད་ཚུལ་ཡིན་མིན་ནི་ལོ་རྒྱུས་མཁན་པོ་རྣམས་ཀྱིས་མཐའ་གཅོད་མཛད་ངེས་པས། ཁོ་བོས་ཚིག་ཐལ་གྱི་འོལ་གཏམ་བརྗོད་པར་མི་རིགས་ཀྱང་། གང་ལྟར་ཞང་ཞུང་གི་མངའ་འོག་ཏུ་དངོས་སུ་འདུས་པའི་ཡུལ་ཁམས་སྤྱིའི་རྒྱ་ཁྱོན་ཧ་ཅང་ཆེ་བ་སྟེ། ཕལ་ཆེར་ད་ལྟའི་མངའ་རིས་སྐོར་གསུམ་གྱི་ས་ཁོངས་ཕུད་པའི་ད་དུང་དེ་དང་ས་འབྲེལ་གྱི་ཡུལ་སྡེ་མང་པོ་འདུས་ཡོད་པ་ནི་གོར་མི་ཆག གཞི་རྒྱ་དེ་ལྟར་ཆེ་བའི་མངའ་ཁོངས་ནང་ཞང་ཞུང་གི་ཆབ་སྲིད་དང་། དཔལ་འབྱོར། རིག་གནས་བཅས་ཀྱི་ལྟེ་གནས་སུ་གྱུར་བའི་ཞང་ཞུང་སྒོ་པ་ཞེས་པ་འདི་གངས་ཏེ་སེ་དང་། མ་ཕམ་གཡུ་མཚོའི་རྒྱུད་ལྟེ་བར་བྱས་པའི་ཡུལ་རྒྱུད་དུ་ཡིན་པ་ངེས་གཏན་དང་ཞང་ཞུང་རྒྱལ་ཕྲན་འདིའི་སྲིད་ཀྱི་དབང་ཐང་ཡང་གཡུང་དྲུང་བོན་གྱི་བསྟན་པ་བོད་ཡུལ་གང་སར་ཁྱབ་པ་དང་སྦྲགས་རྒྱ་ཆེར་ཁྱབ་ཡོད་པ་བཅས་ནི་ལོ་རྒྱུས་ཀྱི་དངོས་དོན་རང་ཡིན་སྙམ།
ཞང་ཞུང་ཡུལ་ཁམས་སུ་སྲིད་ཀྱི་ཁ་ལོ་བསྒྱུར་བའི་རྒྱལ་རབས་ཀྱང་རིམ་པ་བྱུང་བ་སྟེ། ཞང་ཞུང་རྒྱལ་ཕྲན་ཐོག་མ་ཆགས་པ་ནས་མ་ནུབ་བར་རྒྱལ་རབས་བཞི་བཅུ་ལྷག་ཙམ་དང་། གྲགས་པ་ཆེ་བའི་བྱ་རུ་ཅན་གྱི་རྒྱལ་པོ་བཅོ་བརྒྱད་བྱུང་བ་ཡིན་ཞེས་གྲགས། ཞང་ཞུང་རྒྱལ་རབས་ཀྱི་ཐོག་མ་ནི་ཁྲི་ཝེར་གསེར་གྱི་བྱ་རུ་ཅན་ཞེས་པ་དེ་ཡིན། ཁོང་ནི་མི་ལོ་ཆིག་ཁྲི་བརྒྱད་སྟོང་ཙམ་གྱི་སྔོན་དུ་གསས་ཆེན་ཧོས་ཀྱི་གདུང་རྒྱུད་ཅིག་འཛམ་གླིང་དབུས་སུ་ཆད་པ་དེ་ལས་མཆེད་པ་ཡིན་ཞེས་བོན་གཞུང་དུ་གསལ། ཁྲི་ཝེར་གསེར་གྱི་བྱ་རུ་ཅན་དང་གཤེན་རབ་མི་བོ་ཆེ་དུས་སྐབས་གཅིག་གི་མི་ཡིན་པས། གཤེན་རབ་མི་བོ་ཆེས་གཡུང་དྲུང་བོན་གྱི་བསྟན་པ་གཏོད་སྤེལ་མཛད་པའི་སྐབས་སུ་རྒྱལ་པོ་འདིས་དགེ་ཕན་གྱི་མཐུན་རྐྱེན་ཕུན་སུམ་ཚོགས་པ་སྦྱར་ནས་བསྟན་པའི་སྦྱིན་བདག་ཆགས་པ་མ་ཟད་ཆོས་འབྲེལ་ཡང་ཤིན་ཏུ་ཟབ་པས་གཤེན་རབ་མི་བོ་ཆེའི་དངོས་སློབ་གྲས་སུ་གྱུར། རྒྱལ་པོ་འདིའི་དུས་ནས་ཞང་ཞུང་གི་ལོ་རྒྱུས་འགོ་ཚུགས་ཏེ་དེ་ནས་རིམ་བཞིན་ཞང་ཞུང་གི་ཟིལ་གནོན་རྒྱལ་པོ་རླབས་ཆེན་ཁྱུང་གི་བྱ་རུ་ཅན་དང་། ཧྲི་དོ་གྱེར་སྤུངས་རྒྱལ་པོ་ཀང་ཀ་ཤེལ་གྱི་བྱ་རུ་ཅན་སོགས་རིམ་པས་བྱོན་ཏེ་ཞང་རྒྱལ་ཐ་མ་ལེགས་མི་རྐྱ་བར་རྒྱལ་རབས་བཞི་བཅུ་ལྷག་ཙམ་བྱུང་ནས་ཞང་ཞུང་ཡུལ་དུ་ཧ་ལམ་མི་ལོ་ཉིས་སྟོང་ཙམ་གྱི་རིང་དུ་དབང་བསྒྱུར་བ་ཡིན་པས་ཞང་ཞུང་ནི་རྒྱལ་ཕྲན་བཅུ་གཉིས་ནང་ནས་གནས་ཡུན་རིང་ཤོས་དང་། མངའ་ཐང་རྒྱས་ཤོས་བྱུང་བའི་རྒྱལ་ཕྲན་གཅིག་ཡིན། དེ་ལྟར་དུས་ཡུན་རིང་བའི་ལོ་རྒྱུས་ཀྱི་བགྲོད་རིམ་ནང་ཞང་ཞུང་སྤྱི་ཚོགས་ཀྱི་ཐོན་སྐྱེད་དང་། རིག་གནས་བཟོ་རྩལ་སོགས་ཀྱང་གོང་འཕེལ་ཆེན་པོ་བྱུང་ཡོད་པ་སྟེ། 《ལེགས་བཤད་རིན་པོ་ཆེའི་གཏེར》ལས་“དེའི་དུས་སུ་རྒྱ་གར་ན་ཆོས། རྒྱ་ནག་ཏུ་རྩིས། ཁྲོམ་ན་སྨན་དཔྱད། བོད་དང་ཞང་ཞུང་གི་ཡུལ་དུ་གཡུང་དྲུང་བོན་རྐྱང་པ་དར་ཞིང་། ཡན་ལག་ཏུ་རིག་པའི་གནས་གཞན་རྣམས་ཀྱང་ཤིན་ཏུ་དར་རོ”ཞེས་གསལ་བ་ལྟར། ཐོག་མར་གཤེན་རབ་མི་བོ་ཆེ་བྱོན་པ་ནས་བཟུང་བོན་ཆོས་དེ་གདོད་མའི་ཆོས་ཀྱི་ངོ་བོ་ནས་གྲོལ་ཏེ་ལྟ་སྒོམ་སྤྱོད་གསུམ་གྱི་གཞུང་ལུགས་ཅུང་ཆ་ཚང་བ་ཆགས་ཤིང་བོད་ཀྱི་ཡུལ་གྲུ་ཀུན་ཏུ་རིམ་པས་དར་།གདོད་མའི་བོན་དང་ཁྱད་པར་འབྱེད་པའི་ཆེད་དུ་གཡུང་དྲུང་བོན་ཞེས་པའི་ཐ་སྙད་གསར་དུ་ཆགས། ཡི་གེའི་སྲོལ་ཡང་དེའི་དུས་སུ་བྱུང་།
གཡུང་དྲུང་བོན་གྱི་བསྟན་པ་རྒྱ་ཆེར་དར་བ་དེས་རིག་པའི་གནས་སྤྱི་དང་བྱེ་བྲག་གོང་འཕེལ་འགྲོ་རྒྱུར་ཕན་རྐྱེན་ཆེ་ཙམ་བྱུང་ཡོད་པར་གདོན་མི་ཟ་ཞིང་། དེའི་སྐོར《ཐེག་ཆེན་སངས་རྒྱས་གཡུང་དྲུང་བོན་གྱི་ངོ་སྤྲོདབློ་གསར་སྒོ་འབྱེད》ཀྱི་ཤོག་གྲངས་(༡༢ -༡༤)ནང་གནད་བསྡུས་ཀྱི་ངོ་སྤྲོད་ཅིག་འདུག་པ་དེ་ལྟར་དྲངས་བ་ལ། སྟོན་པ་གཤེན་རབ་མི་བོ་ཆེས་སྲོལ་ཕྱེ་བའི་རིག་ལམ་གྱི་གཞུང་ལུགས་གཙོ་བོ་ཁག་ལྔ་ཡོད་པ་སྟེ། བཟོ་རིག་པ་དང་། སྒྲ་རིག་པ། གསོ་བ་རིག་པ། ཕྱི་རིག་པ། ནང་རིག་པ་བཅས་ཡིན་པ་དང་། རིག་པའི་གནས་ལྔ་པོ་དེ་དག་སོ་སོར་གཞུང་ལུགས་གཙོ་བོ་འབུམ་སྡེ་གསུམ་ཡོད་པ་སྟེ། ལག་ཤེས་བཟོ་རྩལ་ཐད་ཀྱི་ནང་དོན་གཙོ་བོར་གསལ་བའི་བསྐལ་པ་སྣང་སྲིད་འཁོར་ལོ་འབུམ་དང་། སྲིད་པ་མིའུ་རྒྱུད་ཀྱི་འབུམ། འབྱུང་བ་ཆགས་གནས་འཇིག་སྟོང་འབུམ་བཅས་བཟོ་རིག་པའི་འབུམ་སྡེ་གསུམ་དང་། སྒྲ་དང་ཚད་མའི་སྐོར་གྱི་ནང་དོན་གཙོ་བོར་གསལ་བའི་ལྷ་སྲིན་གྱི་འཁྲུགས་འབུམ་ནག་པོ། སྒྲ་ཚད་ཀྱི་རྩོད་འབུམ་ཁྲ་བོ། དག་པའི་ལྷ་འབུམ་དཀར་པོ་བཅས་སྒྲ་རིག་པའི་འབུམ་སྡེ་གསུམ། སྨན་དཔྱད་ཀྱི་ནང་དོན་གཙོ་བོར་གསལ་བའི་གསོ་བྱའི་ནད་འབུམ་ནག་པོ། འཚོ་བྱེད་དཔྱད་འབུམ་ཁྲ་བོ། རྣམ་རྒྱལ་གྱི་ལྷ་འབུམ་དཀར་པོ་བཅས་གསོ་བ་རིག་པའི་འབུམ་གསུམ། གནམ་རིག་སྐར་དཔྱད་སོགས་རང་འབྱུང་ཆོས་ཉིད་ཀྱི་ནང་དོན་གཙོ་བོར་གསལ་བའི་སྣང་སྲིད་ཀྱི་གཏོ་འབུམ་ནག་པོ་དང་།རིན་ཆེན་གྱི་ཀུན་འབུམ་ཁྲ་བོ། གཙུག་ལག་གི་དཔལ་འབུམ་དཀར་པོ་བཅས་ཕྱི་རིག་པའི་འབུམ་སྡེ་གསུམ། ཀླང་འབུམ་དཀར་ནག་ཁྲ་གསུམ།ཞེས་པ་ནང་རིག་པའི་འབུམ་སྡེ་གསུམ་སོགས་རིག་པའི་གནས་ཀྱི་གཙུག་ལག་མང་པོ་བྱུང་བ་དང་འབྲེལ་བཟོ་ལ་མཁས་པ་བཟོ་རྗེ་ལྷ་དབང་དང་། ཕུབ་ལ་མཁས་པ་སྒྱུ་འཕྲུལ་དབང་ཕྱུག བླུག་ལ་མཁས་པ་བླུག་ཐོག་པ་སངས། མགར་ལ་མཁས་པ་མགར་ལྷ་ཡུག་པ།ལྷ་ལ་མཁས་པ་ལྷ་སྲས་པད་མ། བྲིས་ལ་མཁས་པ་ཡི་གེ་འཕྲུལ་ཆུང་ཞེས་བསྟན་པའི་རྒྱན་དྲུག་ཟེར་བ་དང་། དེ་བཞིན་དམུ་ཚ་ཊ་ཧེ་དང་། ལེགས་ཏང་རྨང་པོ། ལྷ་བདག་སྔགས་གྲོལ། ཁྲི་ཐོག་སྤར་ཙ ཧུ་ལི་སྤར་ཡ། གསེར་ཐོག་ལྕེ་འབྱམས་ཞེས་པ་ལོ་ཙཱ་བ་ཆེན་པོ་མཁས་པའི་རྒྱན་དྲུག་ཟེར་བ། དེ་བཞིན་ཁྱུང་པོ་སྟག་སྒྲ་དོན་གཙུག སྙ་ལི་ཤུ་སྟག་རིང་།བྷེ་ཤོས་ཀྲམ།གཙོ་ཁྲི་གཙུག་བཅས་མཁས་པ་བཞི་ཟེར་བ་སོགས་རིག་པའི་རྩལ་གྱིས་ཕྱུག་པའི་གྲགས་ཅན་མི་སྣ་ཡང་མང་པོ་བྱུང་ཚུལ་གསལ་བ་བཅས་ལ་གཞིགས་ན་ཞང་ཞུང་གི་ལོ་རྒྱུས་དུས་རིམ་ནང་ཤེས་རིག་བཟོ་རྩལ་སྤྱི་བྱེ་ཡར་རྒྱས་ཆེན་པོ་བྱུང་ཡོད་པ་གསལ་པོར་མངོན་ཐུབ་པ་ཞིག་ཡིན།
ཞང་ཞུང་རྒྱལ་ཕྲན་གྱི་མངའ་ཁོངས་ལ་སྒོ་ཕུག་བར་གསུམ་གྱི་སྲིད་འཛིན་ས་ཁུལ་དབྱེ་བ་དང་། མཁར་རྫོང་མང་པོ་བཙུགས་པ། ཡུལ་སྡེའི་ནང་ཁྲི་སྡེ་དང་སྟོང་སྡེ་མང་པོ་ཡོད་པ།རྒྱུད་འཛིན་གྱི་རྒྱལ་རབས་རིམ་པ་བྱུང་བའི་ལོ་རྒྱུས་སོགས་ལ་བལྟས་ན་སྲིད་དབང་གི་སྒྲིག་གཞི་ཡང་ཅུང་ཟད་ཆ་ཚང་ཙམ་ཞིག་ཡོད་པ་མ་ཟད། ཞང་ཞུང་གི་སྤྱི་ཚོགས་དེ་སྒོ་རྒྱག་རང་སྡོམ་གྱི་ཚུལ་དུ་གནས་པ་ཞིག་མ་ཡིན་པར་མཐའ་འཁོར་དུ་ཡོད་པའི་རྒྱ་གར་རྒྱ་ནག་དང་།བལ་ཡུལ། ཏ་ཟིག་སོགས་ཀྱི་མི་རིགས་དབར་ཆོས་དང་། རིག་གནས། ཚོང་ལས་སོགས་ཀྱི་འབྲེལ་བ་ཡང་རྒྱ་ཆེ་ཙམ་ཡོད་པས་ལོ་རྒྱུས་སྨྲ་བ་པོ་འགའ་རེས་གནའ་བོའི་དུས་སུ་མངའ་རིས་ས་ཁུལ་དེ་ཨ་ཤེ་ཡ་ཤར་ལྷོའི་རྒྱུད་ཀྱི་ཚོང་ལས་དང་། རིག་གནས་སྤེལ་རེས་བྱེད་པའི་ལྟེ་གནས་ཤིག་ཡིན་པར་བཤད་པ་དེ་ཡང་རྒྱུ་མཚན་མེད་པ་ཞིག་གཏན་ནས་མིན། མདོར་ན་གནའ་བོའི་ཞང་ཞུང་གི་སྤྱི་ཚོགས་དེ་ཕྱི་ནང་གང་སའི་མཐུན་རྐྱེན་མང་པོ་ཞིག་འཛོམས་པོ་བྱུང་བར་བརྟེན་ནས་ཐོན་ལས་དང་། ཤེས་རིག་བཟོ་རྩལ་སོགས་གནའ་དུས་བོད་མིའི་ཡུལ་ལུང་གཞན་ལས་གོང་འཕེལ་ཆེ་བ་བྱུང་བ་ནི་ཡི་གེའི་སྲོལ་ཐོག་མ་དེ་ཡང་ཞང་ཞུང་དུ་དར་བའི་ལོ་རྒྱུས་ཀྱི་ཆ་རྐྱེན་ནམ་སྤྱི་ཚོགས་ཀྱི་རྨང་གཞི་དེ་ཡིན། མིའི་རིགས་ཀྱི་ཤེས་རིག་འཕེལ་རིམ་གྱི་ལོ་རྒྱུས་ཐོག་ནས་བཤད་ན་མི་རིགས་གང་ཞིག་གི་ཁྲོད་དུ་ཡི་གེའི་སྲོལ་ཐོག་མ་དར་བ་ནི་ཤེས་རིག་དཔལ་ཡོན་གྱི་ལམ་སྣེ་ཟིན་པའི་ལོ་རྒྱུས་ཀྱི་འཕེལ་འགྱུར་དོན་སྙིང་ཤིན་ཏུ་ཆེ་བ་ཞིག་ཡིན།
ཞང་ཞུང་དུ་བོད་ཀྱི་ཡི་གེའི་སྲོལ་ཐོག་མ་བྱུང་བ་དེས་སྨག་ཏུ་སྒྲོན་མེ་བཏེགས་པ་ལྟ་བུར་རང་རེའི་ཡུལ་འདིའི་མི་རྣམས་རྨོངས་མུན་གྱིས་བཏུམས་པའི་གནས་ལས་གྲོལ་ཏེ་བློ་གྲོས་ཀྱི་འཇུག་སྒོ་ཡངས་བར་ཕྱེ་བའི་ལོ་རྒྱུས་ཀྱི་དུས་རབས་གསར་པ་ཞིག་གི་ཐོག་སླེབས་ཐུབ་པ་བྱུང་བ་ཡིན་ནོ།།
|
|
