དེ་ཡང་ཡིག་ཆ་མང་པོའི་ནང་ལོ་ངོ་ཉིས་སྟོང་གོང་ནས་སྟག་གཟིག་སྤུངས་ཡིག ཞང་ཞུང་སྨར་ཆེན་སྨར་ཆུང་སོགས་ཡོད་པར་གསུངས་བཞིན་ཡོད། འོན་ཀྱང་སྐབས་འདིར་བཤད་བྱའི་དོན་ནི་དུས་རབས་བདུན་པ་ནས་བཟུང་ཐོན་མི་སམ་བྷོ་ཊས་རྒྱ་གར་ཡི་གེར་རྨང་གཞིར་བཟུང་ནས་བརྩམས་པའི་ཡིག་གཟུགས་དང་སུམ་རྟགས་བརྩམས་པ་ནས་འཕེལ་རྒྱས་ཕྱིན་པའི་བོད་ཡིག་གི་གཟུགས་ལ་རགས་ཙམ་བཤད་རྒྱུ་ཡིན།
ཐོན་མིའི་ཡིག་ཕུད་ཕ་བོང་ཁའི་མ་ནི་ཡིག་དྲུག་གི་ཡིག་གཟུགས་ནི་སྦལ་ནག་བགྲད་འདྲ་ཡིན་པ་དང་དེ་ནས་རིམ་གྱིས་འཕེལ་རྒྱས་ཕྱིན་ཏེ་སོ་ཕག་བཤིབ་འདྲ། མུ་ཏིག་བསྟར་བརྒྱུས་སོགས་དབུ་ཅན་ཡིག་གཟུགས་སྣ་ཁ་བརྒྱད་ཙམ་བོད་བཙན་པོའི་དུས་སུ་བྱུང་། ཕལ་ཆེར་ཁྲི་སྲོང་ལྡེ་བཙན་གྱི་སྐབས་སུ་ལྡན་མ་རྩེ་མང་གིས་དབུ་ཅན་གྱི་གཟུགས་ལ་འགྱུར་བ་བྱུང་བའི་དབུ་མེད་ལ་ལེགས་བཅོས་གནང་ནས་ལྡན་ལུགས་བྱུང་བ་ཡིན། དུས་རབས་༡༣ནང་ཁྱུང་པོ་གཡུ་ཁྲིས་སྔོན་བྱུང་དབུ་ཅན་རྣམས་ཀྱི་ལེགས་ཆ་བསྡུས་ནས་དབུ་ཅན་ཚད་ལྡན་ཁྱུང་བྲིས་སུ་གྲགས་པ་སྲོལ་གཏོད་གནང་བ་དང་འབྲས་སྤུངས་ཀྱི་བཀའ་འགྱུར་འཛམ་གླིང་གཡས་བཞག་ཀྱང་དེའི་ལུགས་ཡིན། དུས་རབས་༡༥པའི་ནང་རྒྱལ་རྩེ་རབ་བརྟན་ཀུན་བཟང་འཕགས་ཀྱིས་དབུ་མེད་ཀྱི་ཡིག་གཟུགས་ལ་ཐིག་བཤད་བརྩམས་ཏེ་ཚད་ལྡན་གྱི་བྲིས་རྒྱུན་དར་སྤེལ་བྱུང་ངོ་། དུས་རབས་༡༣པའི་ནང་འབྲུ་ཚ་ཞབས་རིང་དང་ཞབས་སྒོང་ནི་ས་སྐྱའི་གཞུང་ཡིག་གི་ཚོད་དུ་བེད་སྤྱོད་གཏོང་བ་དང་དར་ཁྱབ་བྱུང་།
བཀའ་གདམས་པའི་སྐབས་སུ་སྐུང་ཡིག་དར་ཁྱབ་ཆེན་པོ་བྱུང་ཡོད་པ་ནི་བཀའ་གདམས་ཀྱི་དཔེ་ཆ་མང་པོ་ཞིག་སྐུང་ཡིག་ལས་བྲིས་པས་མཚོན་པ་ཡིན། འཁྱུག་ཡིག་ནི་དུས་རབས་༡༥ནས་༡༦བར་དགའ་ལྡན་ཕོ་བྲང་གི་སྤྱི་སྒྲགས་ཕུད་དེ་བྱིངས་ཕལ་མོ་ཆེ་འཁྱུག་ཡིག་ཁོ་ན་བེད་སྤྱོད་བྱས་སྟབས་དུས་རབས་༡༧པའི་ནང་དམངས་ཁྲོད་དུ་འཁྱུག་ཡིག་དར་རྒྱས་ཆེན་པོ་བྱུང་། དུས་རབས་༡༥པ་ནས་བཟུང་ཤིང་དཔར་ལ་དར་བཟོ་ཆེན་པོ་བྱུང་བས་ཆོས་ཕྱོགས་ཀྱི་ཡི་གེ་ཕལ་ཆེ་བ་དཔར་བརྐོས་བྱས་ཡོད། དུས་རབས་༡༦པའི་སྐབས་སུ་ཡང་གཞུང་ཡིག་ནི་འབྲུ་ཚ་ཞབས་ཐུང་བེད་སྤྱོད་གཏོང་བ་དང་། རྒྱལ་བ་སྐུ་ཕྲེང་བཅུ་གསུམ་པས་འཁྱུག་མ་ཚུགས་གཞུང་ཡིག་ལ་གཏན་འབེབས་གནང་བ་མ་ཟད་ཡིག་གཟུགས་མཁས་ཅན་ཀོག་པོ་བའི་ཡིག་གཟུགས་དཔར་དུ་བཀོད་དེ་ཡིག་གཟུགས་མ་དཔེར་གཏན་འབེབས་གནང་ངོ་།
|
|
