སྡེར་ནང་ས་བྲིས་ཀྱི་བྲིས་མཁན་རྣམས་ནི་རང་ཉིད་སྒྲོགས་བསྒྲགས་ལ་མི་དགྱེས་པས།མཐའ་གཅིག་ཏུ་ཡིག་འབྲི་ཁོ་ན་ལ་འབད་དེ་བྲིས་མཁན་རེ་རེས་མི་ཚེ་གང་བོར་བྲིས་ཆོས་པོད་གྲངས་ཕྱེད་བརྒྱ་ལ་ལོངས་བ་རེ་བྲིས་པ་དང་།ཁ་མིན་དོན་གྱིས་ཀུན་སློང་རྣམ་པར་དག་པའི་སྒོ་ནས་རང་ཉིད་ཀྱི་མི་ཚེ་ཧྲིལ་པོ་ཡིག་བྲིས་ཀྱི་ལས་ཁོ་ན་ལ་གཞོལ་ཞིང་།དུས་ཀུན་ཏུ་རང་ཉིད་ཀྱི་བྲིས་རྩལ་གོང་འཕེལ་དུ་གཏོང་བ་ལས་གཞན་ལ་ཕྲག་དོག་དང་འགྲན་སེམས་ཀྱི་བསམ་པ་ཡེ་ནས་མེད་པ།རང་གི་རྩ་བའི་བླ་མ་སོགས་བྲིས་མཁན་གོང་མ་དག་གིས་བརྒྱུད་པའི་ཁྲིད་རྒྱུན་ལ་སྤྲལ་བའི་མིག་ལྟར་དུ་སྲུང་བ། དུས་དང་རྣམ་པ་ཀུན་ཏུ་རང་རྒྱུད་ཀྱི་ཡོན་ཏན་དེ་གཞན་ལ་བརྒྱུད་པ་ལ་ཕངས་སེམས་མེད་པ་སོགས་རང་གི་མི་ཚེ་ཧྲིལ་པོ་གངས་ཅན་བྲིས་ཀྱི་བསྟན་པ་གོང་དུ་སྤེལ་བ་ལ་གཞོལ་བའི་རྣམ་ཐར་བསྐྱངས་དང་སྐྱོང་མུས་སུ་མཆིས། ཡིན་ན་ཡང་ཁོང་ཚོའི་ཡ་རབས་ཀྱི་ཡོན་ཏན་དེ་དག་གི་དབང་པས། ས་བྲིས་ལ་འཁྲབ་སྟོན་རང་བཞིན་གྱི་བྲིས་ཀྱི་སྲོལ་ག་བྱུང་མེད་པ་དང་། བྱ་བླ་མ་མ་གཏོགས་གཞན་པའི་བྲིས་མཁན་མང་ཆེ་ཤོས་ཀྱིས་བྲིས་རྒྱུན་གཙོར་འཛིན་བྱེད་པ་ལས་བྲིས་ཀྱི་སྒྱུ་རྩལ་དང་། བྲིས་མཁན་གྱི་ཁྱད་ཆོས་སོགས་ཀྱི་ཐད་ལ་བརྟོལ་བརྒལ་ཐུབ་མེད་པ་སོགས་ཀྱི་སྐྱོན་ཕྲན་ཚག་རེ་ཡང་སྣང་ངོ་།
སྤྱིར་ཤེས་བྱ་གང་ཞིག་ལ་སྦྱང་བ་ལ་གཟབ་བྱ་གང་མང་ཡོད་པ་བཞིན་སྡེར་ནང་ས་བྲིས་ལ་ཡང་དེ་ལས་མ་འདས་སྟེ། ཅི་སྐད་དུ། ལྔ་བརྒྱ་ཐ་མར་གྱུར་བའི་དུས། ང་ཉིད་ཡི་གེའི་གཟུགས་སུ་སྣང་། ང་ཡིན་སྙམ་དུ་ཤེས་བྱོས་ལ། ། དེ་ཚེ་ང་ལ་གུས་པར་གྱིས།། ཞེས་དང་། འབྲི་དང་ཀློག་པའི་དུས་དག་ཏུ།། ཡི་གེ་སྤྲུལ་བའི་སྐུ་ཡིན་པས་ཞེས་སོགས་གསུང་ཤིང་། སྡེར་ནང་བྲིས་ཆེན་བྱ་བླ་མ་འོད་གསལ་རིག་པའི་རྡོ་རྗེ་དང་མཁས་ཆེན་དམ་པ་གློ་བླ་ཀ་དག་སོགས་སྡེར་ནང་བྲིས་མཁན་གོང་མ་དག་གིས་བྲིས་ཀྱི་སྦྱང་བ་མཐིལ་བྱིན་ཐུབ་པ་བྱུང་ན་རང་ཉིད་ལ་ཞི་གནས་ཀྱི་གོ་འཕང་ཐོབ་པར་གསུང་བས། བྲིས་མཁན་དག་གིས་ནང་ཀུན་སློང་གི་ཐད་ནས་ཡིག་འབྲུ་རེ་རེ་ལའང་རབ་ན་སངས་རྒྱས་དང་བྱང་ཆུབ་སེམས་དཔའི་འདུ་ཤེས་དང་། ཐ་ན་ཡང་གང་ཞིག་གུས་པར་འོས་པའི་འདུ་ཤེས་བཟུང་ནས་ཕྱི་ཀུན་སྤྱོད་ཀྱི་ཐད་ནས་ཀྱང་གང་ཞིག་བྲིས་ཀྱི་ལས་བྱ་སྤེལ་ཚེ་ཁ་ལག་སོགས་གཙང་བོར་བཀྲུ་བ་དང་། བྲིས་ཆས་སྣག་ཤོག་སྨྱུག་གསུམ་སོགས་དྲི་བཟང་དང་བདུག་སྤོས་ཀྱིས་བདུག་སྟེ་གཙང་བར་བྱེད་པ། འབྲི་བའི་ཚེ་ན་འདུ་འཛི་དང་མི་མང་གི་ཁྲོད་དུ་མི་འབྲི་བ། ལུས་ཀྱི་འཛིན་སྟངས་ཚུལ་བཞིན་དུ་གནས་པ། ངག་གི་སྒོ་ནས་འཆལ་གཏམ་མི་སྨྲ་བ། ཡིད་ཀྱི་གཏད་པ་རྩེ་གཅིག་ཏུ་གནས་པ་སོགས་བྱེད་པ་དང་། སྡེར་ནང་ས་བྲིས་སུ་ས་སྨྱུག་གཞན་ལག་ཏུ་འཇོག་མ་ལ་ཤིན་ཏུ་འཛེམ་དགོས་པ་དང་། ཡི་གེ་མ་བྲིས་པའི་སྔ་རོལ་ཏུ་ལག་པས་ལས་ལྕི་མོ་གཏན་ནས་མི་ལས་པ་དང་། ཡི་གེ་འབྲི་ཚེར་ལག་པ་ཆུ་འཁྱག་གི་འཁྲུད་དགོས་ལ། དགོས་མཁོ་མེད་ཚེ་ཤོག་ངོས་གཅིག་ལ་བྲིས་སྨྱུག་མི་བརྗེ་བ། ཡི་གེའི་དག་ཆ་ལ་གཟབ་པ། སྨྱུག་ཁམས་དང་སྨྱུག་ལམ་གཙང་བ། བྲི་གཞི་ཤོག་བུའི་ཁ་དོག་མིག་ལ་མི་གནོད་པ་སོགས་གཟབ་བྱ་ཤིན་ཏུ་མང་བས་འདབ་ཆགས་མི་ཆོས་སུ་བཤད་པ་རིག་པའི་གཏེར་མཛོད་དུ། མཐའ་རྒྱ་ཆོད་ལ་ཡིག་སྣ་སྦྱོངས།། སྨྱུ་གུ་གཟོབས་ལ་ཁྲིགས་སུ་ཆུད། ། མཛེས་པ་གཟུགས་ཀྱི་ཁྱད་དུ་ཐོན། བེ་བ་མྱོང་བའི་ཁྱད་དུ་ཐོན།། གཙང་བ་འགྲིག་གི་ཁྱད་དུ་ཐོན། སྟོབས་ཆེན་ཆད་ལྷག་མེད་པར་གྱིས།། འདི་ནི་ཡོན་ཏན་མཆོག་ཏུ་འགྱུར་ཞེས་པ་ལྟར་གཟབ་པ་ཡིན་ནོ།
|
|
