བོད་ལྗོངས་ནག་ཆུ་གྲོང་ཁྱེར་འབྲི་རུ་རྫོང་ཡོངས་ཀྱིས་སྐབས་དང་པོའི་ཡར་བརྩོན་བུམ་པ་རྟགས་མའི་རྒྱ་བོད་ཡིག་གཟུགས་འགྲན་བསྡུར་གྱི་བྱེད་སྒོ་སྤེལ་བ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཡིག་གཟུགས་ནི་ཀྲུང་ཧྭའི་རིག་གནས་ཀྱི་ཁྱད་ནོར་ཡིན་ཞིང་། དེར་བློ་གྲོས་ཀྱི་དྭངས་མའམ་རིག་པའི་ཟུངས་སྟོབས་སོགས་མང་པོ་འདུས་ཡོད་པས། ངེས་པར་དུ་རྒྱུན་འཛིན་དང་དར་སྤེལ་གང་ལེགས་བྱེད་དགོས།”ཞེས་པའི་བཀའ་སློབ་ཀྱི་དགོངས་པ་དོན་འཁྱོལ་ཐུབ་ཆེད་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་དྲན་གསོའི་ཉིན་མོ་སྟེ། རྒྱལ་སྟོན་དུས་ཆེན་ལ་རྟེན་འབྲེལ་ཞུ་བ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏོང་བ། རྫོང་ཡོངས་ཀྱི་ལས་བྱེད་ལས་བཟོ་དང་ཁྱིམ་བདག་རྣམ་པས་རྒྱལ་གཅེས་བརྩེ་སེམས་དང་སྒྱུ་རྩལ་གྱི་ཉམས་འགྱུར་མངོན་པའི་ཆེད་དུ་“སྨྱུག་རྩལ་ངོམས་ཏེ། རྒྱལ་སྟོན་དུས་ཆེན་བསུ།”ཞེས་པའི་བརྗོད་དོན་གཙོ་བོའི་བོད་ཡིག་ཡིག་གཟུགས་འགྲན་བསྡུར་གཉེར་བ་རེད།
ཐེངས་འདིའི་བྱེད་སྒོར་རྫོང་ཨུད་དྲིལ་བསྒྲགས་པུའུ་དང་། རྫོང་རིག་གནས་ཡུལ་སྐོར་ཅུས། རྫོང་སློབ་གསོ་ལུས་རྩལ་ཅུས་སོགས་ཀྱིས་ཤུགས་ཆེའི་རྒྱབ་སྐྱོར་གནང་ཞིང་། བོད་ལྗོངས་རིག་པའི་རལ་གྲིའི་རིག་གནས་ཚད་ཡོད་སྤྱི་གཉེར་ཁང་གིས་གཙོ་སྒྲུབ་བྱས་ཤིང་ཐོག་མཐའ་བར་གསུམ་གྱི་ལས་འགན་ཡོངས་སུ་རྫོགས་པར་འགན་བཞེས་གནང་ཡོད་པ་རེད།
ཐེངས་འདིའི་འགྲན་བསྡུར་གྱི་ཁྱབ་ཁོངས་ནི་འབྲི་རུ་རྫོང་ཡོངས་ཀྱི་ལས་བྱེད་ལས་བཟོ་དང་རྒྱ་ཆེའི་ཁྱིམ་བདག་ཡོངས་ལ་དམིགས་ནས་གཉེར་བ་ཞིག་ཡིན་པ་མ་ཟད། འབྲི་བྱའི་ནང་དོན་ཐད་གཅིག་གྱུར་ངང་ཏང་དང་མེས་རྒྱལ་ལ་བསྟོད་པའི་ནང་དོན་བཀོད་སྒྲིག་བྱས་པ་འདི་ལྟ་སྟེ།
སྟོབས་འབྱོར་མངའ་ཐང་རྒྱས་པའི་ཀྲུང་ཧྭ་ཡི། ། སྐུ་ཡི་འཁྲུངས་སྐར་བཅུ་པའི་ཚེས་གཅིག་ཉིན།
སྐར་ལྔའི་དར་དམར་ཆེམ་ཆེམ་གཡོ་བཞིན་དུ།། མི་རིགས་ང་དྲུག་མཐུན་པའི་བསྟོད་གླུ་གྱེར།། ཞེས་པའི་ཚིགས་བཅད་ཚན་པ་འདི་ཡིན་ཞིང་། ཡིག་གཟུགས་ཀྱི་རྣམ་པར་ཚུགས་རིང་དང་། ཚུགས་ཐུང་། འཁྱུག་ཡིག འབྲུ་ཚ་བཅས་རང་གི་མོས་པ་ལྟར་བྲིས་ཆོག་པ་ཞིག་ཡིན། དཔྱད་འདེམས་བྱེད་པའི་དུས་ཚོད་ནི་༢༠༢༤ལོའི་ཟླ་༡༠པའི་ཚེས་༡༣ཉིན་གྱི་སྔ་དྲོར་བརྩམས་ཆོས་བསྡུ་ལེན་བྱས་ཤིང་ཆེད་ལས་དགེ་རྒན་གྱིས་དཔྱད་འདེམས་བྱས་པ་མ་ཟད། ཕྱི་དྲོའི་ཆུ་ཚོད་གསུམ་པའི་ཐོག་འགྲན་བཞུགས་པ་ཡོངས་དང་དེ་བཞིན་རྫོང་ཨུད་དྲིལ་བསྒྲགས་པུའུ་ཡི་བློ་མཐུན་མཚོ་མོ་ལགས་དང་། རྫོང་རིག་གནས་ཡུལ་སྐོར་ཅུས་ཀྱི་བློ་མཐུན་པད་མ་ཆོས་སྒྲོན་ལགས། རྫོང་སློབ་གསོ་ལུས་རྩལ་ཅུས་ཀྱི་ཅུས་ཀྲང་གཞོན་པ་བློ་མཐུན་ཉི་མ་སྒྲོལ་མ་ལགས། བོད་ལྗོངས་རིག་པའི་རལ་གྲིའི་རིག་གནས་ཚད་ཡོད་སྤྱི་གཉེར་ཁང་གི་འགན་འཛིན་པ། རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་གཅུང་བསླབ་གསུམ་ལགས། རྫོང་སློབ་ཆུང་དང་པོའི་ཧྲུའུ་ཅི་བཀྲ་ཤིས་དོན་གྲུབ་ལགས་དང་རྫོང་སློབ་ཆུང་གཉིས་པའི་ཧྲུའུ་ཅི་བསམ་གྲུབ་རྡོ་རྗེ་ལགས་བཅས་ཐེངས་འདིའི་བྱ་དགའ་སྤྲོད་པའི་མཛད་སྒོའི་ནང་བཞུགས་ཡོད་པ་རེད། ཐེངས་འདིའི་འགྲན་བསྡུར་ཁྲོད་བོད་ཡིག་བརྩམས་བྱ་༡༨༠ལྷག་ཙམ་འབྱོར་ཡོད་ཅིང་། རྒྱ་ཡིག་བརྩམས་ཆོས་༣༠ལྷག་འབྱོར་ཡོད་པ་དང་། དེ་དག་གི་ཁྲོད་ལས་བྱ་དགའ་རིམ་པ་དང་པོ་༥དང་། བྱ་དགའ་རིམ་པ་གཉིས་པ་༧ བྱ་དགའ་རིམ་པ་གསུམ་པ་༡༡ ཕུལ་བྱུང་བྱ་དགའ་༦བཅས་འདེམས་ཐོན་བྱུང་ཡོད་ཅིང་སོ་སོར་གཟེངས་བསྟོད་དཔང་ཡིག་དང་གཟེངས་རྟགས་དེ་བཞིན་བྱ་དགའི་དངོས་པོ་སོགས་གྱ་ནོམ་པ་ཕུལ་གནང་ཡོད་པ་རེད།
དེའི་རྗེས་སུ་ཐེངས་འདིའི་འགྲན་བསྡུར་ནང་བྱ་དགའ་ཐོབ་པའི་བརྩམས་ཆོས་དང་དེ་བཞིན་འགྲན་བསྡུར་ནང་སྐྱེལ་བའི་བརྩམས་ཆོས་ཡོངས། ལྷག་ཏུ་བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་གཅུང་བསླབ་གསུམ་ལགས་དང་ཁོང་གི་སློབ་མ་ཚོའི་ཡིག་གཟུགས་བརྩམས་ཆོས་མང་དག་ཅིག་བཤམས་སྟོན་གནང་བ་མ་ཟད། ཡིག་མཁན་རྣམ་པས་ཡུལ་དངོས་སུ་སོར་མོའི་རྩལ་ལ་བརྟེན་ནས་སྨྱུག་རྩལ་ངོམས་ཤིང་གཟིགས་མོ་བ་ཚོའི་ཡིད་ཀྱི་དྭངས་བ་དབང་མེད་དུ་འདྲེན་པར་བྱས་ལ་ཁོང་རྣམ་པར་བཀྲ་ཤིས་རྟེན་འབྲེལ་མཚོན་པའི་ཤིས་ཚིག་མང་པོའི་ཕྱག་རྟགས་ཀྱང་ཕུལ་གནང་བ་རེད།
བོད་ལྗོངས་རིག་པའི་རལ་གྲིའི་རིག་གནས་ཚད་ཡོད་སྤྱི་གཉེར་ཁང་གི་འགན་འཛིན་པ། རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་གཅུང་བསླབ་གསུམ་ལགས་ཀྱིས། ཐེངས་འདིའི་ཡིག་གཟུགས་དཔྱད་འདེབས་བྱེད་ཕྱོགས་སྐོར་དང་ཡིག་གཟུགས་སྦྱོང་བའི་དགེ་མཚན་དང་།མ་འོངས་པར་སློབ་ཕྲུག་གཅིག་པུ་མ་ཡིན་པར་དགེ་རྒན་དང་ཁྱིམ་བདག་རྣམས་ཀྱིས་མུ་འཐུད་དེ་ཡིག་གཟུགས་ལེགས་པར་སྦྱོང་ནས་སློབ་མར་མིག་དཔེ་བཟང་པོ་སྟོན་དགོས་པའི་སྐོར་གྱི་སློབ་སྟོན་བྱེད་བཞིན་པ།
དཔྱད་འདེམས་ཀྱི་བརྒྱུད་རིམ་མཚོན་ཙམ་བཀོད་པ།
མགྲོན་པོ་ཚོས་ཡིག་གཟུགས་བརྩམས་ཆོས་རོལ་མྱོང་གནང་བཞིན་པའི་ཟུར་ཙམ།
ཡིག་མཁན་རྣམས་པས་ཡུལ་དངོས་སུ་ཕྱག་རྩོམ་སྤེལ་བཞིན་པ།
འགྲན་ཞུགས་བརྩམས་ཆོས་ལས་ཕུལ་བྱུང་བརྩམས་ཆོས་ཁག་དྲ་འགྲེམ་བྱས་པའི་གནས་ཚུལ།
སྤྱི་ཁྱབ་ལྟ་སྐུལ་བ།རྟ་མགྲིན་མགོན་པོ།
གསར་འགོད་པ། ཐོ་ཤར་བུ།
ཞུ་དག་པ།བཀྲ་ཤིས་དོན་གྲུབ།
སྒྲིག་བཟོ་བ།མགོན་པོ་དོན་གྲུབ།
|
|
