བླ་བྲང་གསེར་གླིང་གི་སྒོ་འབྱེད་མཛད་སྒོ་གཟབ་རྒྱས་ངང་སྤེལ།
དེ་རིང་དེ་༢༠༢༤ལོའི་༦ཚེས༩་སྟེ་ལུགས་རྙིང་གི་ཟླ་༥ཚེས་༤་ཉིན་ཀན་སུའུ་ཞིང་ཆེན་བླ་བྲང་གསེར་བྲིས་གླིང་དབུ་བརྙེས་པའི་མཛད་སྒོ་གཙོས་གྲོང་ཁྱེར་ནས་གཟབ་རྒྱས་སུ་སྤེལ།
མཛད་སྒོའི་སྟེང་ཀན་ལྷོ་བོད་རིགས་རང་སྐྱོང་ཁུལ་སྲིད་གྲོས་རྒྱུན་ཨུ་ཁང་གི་ཀྲུའུ་ཞི་ཟུར་བའམ་བོད་ཀྱི་སློབ་གསོ་བ་སྒྲོལ་མ་སྐྱབས་དང་། མི་དམངས་སྲིད་གཞུང་གི་སྲིད་ཇུས་བློ་འདོན་པ། བོད་རིག་པའི་ཆེད་མཁས་དཀོན་མཆོག་སྒྲ་དབྱངས་རྒྱ་མཚོ། ཀན་སུའུ་མི་རིགས་དགེ་འོས་སློབ་ཆེན་གྱི་སློབ་དཔོན་ཆེན་མོ། དེང་རབས་བོད་ཀྱི་སྙན་ངག་པ་ལྷ་རྒྱལ་ཚེ་རིང་དང་། ཀན་སུའུ་མི་རིགས་དགེ་འོས་སློབ་ཆེན་གྱི་སློབ་དཔོན་ཆེན་མོ། ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་ཀྱི་ཚོགས་གཙོ་ཟུར་པ་སངས་རྒྱས་བཀྲ་ཤིས། ཀན་སུའུ་ཞིང་ཆེན་ནང་བསྟན་སློབ་གྲྭའི་སློབ་དཔོན་ཆེན་མོའམ་བོད་རིག་པའི་ཆེད་མཁས་ཟམ་ཚ་ཚེ་རིང་དོན་གྲུབ། ཀན་ལྷོ་ཁུལ་རྩོམ་པ་པོ་མཐུན་ཚོགས་ཀྱི་ཚོགས་གཙོ་ཕྱག་རྡོར་ཚེ་རིང་། ཁུལ་བོད་ཀྱི་ཡིག་མཁན་མཐུན་ཚོགས་ཀྱི་ཚོགས་གཙོ་རྡོར་བྷ་སོགས་མཛད་སྒོར་ཞུགས་པ་མ་ཟད། གཞན་རྫོང་བདུན་གྲོང་གཅིག་གི་ཡིག་གཟུགས་མཐུན་ཚོགས་ཀྱི་ཀྲུའུ་ཞི་དང་ཚོགས་མའི་སྐུ་ཚབ། ཀན་ལྷོ་ཁུལ་གཙོས་གྲོང་ཁྱེར་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་མགོན་པོ་སྐྱབས་དང་ཚོང་དཔོན་བླ་གོ ཚོང་དཔོན་ཐང་དགེ་འབྲུག་ཐར་སོགས་ཀན་ལྷོའི་བོད་ཀྱི་ཁེ་ལས་པ། དེ་མིན་སྦྱིན་བདག་གི་སློབ་གྲོགས་ལྷན་རྒྱས། སྤྱི་ཚོགས་དང་ལས་རིགས་སོའི་རིག་གནས་པ་དང་ཡིག་གཟུགས་དགའ་ཞེན་པ་མི་བརྒྱ་དང་ལྔ་བཅུ་ལྷག་ཡུལ་དངོས་སུ་འཛོམས་ཤིང་གསེར་བྲིས་གླིང་གི་སྒོ་འབྱེད་ལ་རྟེན་འབྲེལ་ཞུས།
གསེར་བྲིས་སྦྱིན་བདག་ཆེན་མོ་ཐང་དགེ་བླ་མ་སྐྱབས་ནི་ཀན་ལྷོ་ཁུལ་ཁྲག་མཛོད་ཁང་གི་གསོ་རིག་འབུམ་རམས་པ་དང་། ཀན་ལྷོ་ཁུལ་ཡིག་མཁན་མཐུན་ཚོགས་ཀྱི་ཚོགས་གཙོ་གཞོན་པའམ་དྲུང་ཆེ་དང་ཁུལ་རིམ་པའི་སྨོན་ལམ་ཡིག་གཟུགས་རྒྱུད་འཛིན་པ་བཅས་ཡིན། ཁོ་རང་ཆུང་དུས་ནས་བཟུང་གཟུགས་རིས་སྣ་ཚོགས་བྲི་རྒྱུར་དགའ་ཞིང་། སློབ་ཆུང་གི་སྐབས་སུ་རྒན་དུ་མར་བསྟེན་ནས་བོད་ཀྱི་ཡིག་གཟུགས་འབྲི་སྦྱོང་གི་མགོ་བརྩམས། སློབ་གྲྭ་ཆུང་འབྲིང་ནས་ཡི་གེ་སྦྱངས་པའི་གོམས་གཤིས་དོར་མ་མྱོང་ལ། ལས་གནས་སུ་ཐོན་རྗེས་ཀྱང་སྔར་བཞིན་རང་གི་དགའ་ཕྱོགས་ཀྱི་རྒྱུན་བསྐྱངས་ཏེ། ལས་ཞོར་ལ་རང་སྦྱོང་གཙོས་དགེ་རྒན་གང་མང་བསྟེན་ནས་སྦྱངས་པ་གནད་སྨིན་བྱས།
༢༠༡༦ལོ་ནས་བཟུང་ཀན་སུའུ་ཞིང་ཆེན་བླ་བྲང་གསེར་བྲིས་རིག་གནས་ཐོན་ལས་སྤྱི་གཉེར་ཁང་བཙུགས་ཏེ། གསེར་བྲིས་གཙོས་རིན་ཆེན་སྣ་ལྔའི་ཡིག་གཟུགས་འབྲི་མགོ་བརྩམས་ཤིང་། དེའི་ཞོར་ལ་བོད་ཀྱི་སྲོལ་རྒྱུན་ལག་རྩལ་གྱི་ཡིག་ཆས་སྣ་ཚོགས་དང་ཡིག་རིས་འབྲི་དེབ་སོགས་ཇུས་འགོད་ཐོན་སྐྱེད་བྱས།
༢༠༡༥ལོར་ཆེད་དུ་དབུས་གཙང་ལ་སོང་སྟེ་པོ་ཏ་ལའི་ཡིག་མཁན་ཆེ་མོ་སྙེ་འཕྲིན་ལས་རྒྱལ་མཚན་སོགས་ཀྱི་མདུན་སར་ཡིག་རྒྱུན་བླངས་ཤིང་། ལྷ་སའི་པོ་ཏ་ལ་ནས་གསེར་བྲིས་ཀྱི་བྲིས་རྒྱུན་དང་ལག་རྩལ་ཕྱོགས་ནས་སྦྱངས་པ་དཔྱིས་ཕྱིན་པ་བྱས།
༢༠༢༤ལོའི་སྤྱི་ཟླ༦པའི་ཚེས༩ཉིན། ཀན་ལྷོ་ཁུལ་གཙོས་གྲོང་ཁྱེར་དུ་བླ་བྲང་གསེར་བྲིས་གླིང་དངོས་སུ་སྒོ་ཕྱེས་ཏེ་ལས་སྒོ་འབྱེད་མགོ་བརྩམས། བླ་བྲང་གསེར་བྲིས་གླིང་ནི་ཀན་ལྷོ་ཁུལ་ལམ་ཀན་སུའུ་མངའ་ཁོངས་ཀྱི་གསེར་བྲིས་གླིང་ཐོག་མར་གྱུར་ཞིང་། རིན་ཆེན་སྣ་ལྔའི་ཆོས་དཔེ་བྲི་ས་དང་། ཡིག་གཟུགས་སྣ་ཚོགས་བྲི་ས། སྒྲོམ་གཞི་ཇུས་འགོད་བྱེད་ས། ཡིག་མཁན་དགེ་རྒན་དུ་བསྟེན་ས། གསར་བྲིས་པས་སྦྱངས་པ་བྱེད་ས་བཅས་གཞི་གཅིག་ཅན་གྱི་ཡིག་གཟུགས་གླིང་ཞིག་ཡིན་པ་མ་ཟད། ཀན་ལྷོ་ཁུལ་དུ་ལོ་བརྒྱའི་རིང་གསེར་བྲིས་ཀྱི་རྒྱུན་ཉམས་པ་སླར་གསོ་བྱས་ཡོད་པས། ཀན་ལྷོ་ཁུལ་གྱི་གསེར་བྲིས་ཀྱི་སྟོང་ཆ་ཡང་བསྐངས་ཡོད་དོ།།
སྤྱིའི་ལྟ་སྐུལ་བ། རྟ་མགྲིན་མགོན་པོ།
གསར་འགོད་པ། དཔལ་མགོན་ཚེ་རིང་།
ཞུ་དག་པ་མགོན་པོ་དོན་གྲུབ།
|
|
