༄༅།། ཡངས་པའི་ཁ་ལྗོངས་འཛིན་མའི་ཁྱོན་ཀུན་དུ།
མ་རིག་རྨོངས་མུན་ཕ་མཐར་བསྐྲོད་བྱེད་པའི།།
ངོ་མཚར་གངས་ཅན་ཡི་གེའི་སྲོལ་མཛད་པོ།།
མི་བོ་ཆེ་དང་སློབ་དཔོན་ཐོན་མི་ཡི།།
ཐུགས་རྗེའི་འཕྲིན་ལས་རླབས་སྟོང་གཡོ་བ་ཡིས།།
སྨན་ལྗོངས་གོ་ལའི་ཡུལ་འདིའི་སྐྱེ་འགྲོ་རྣམས།།
མི་ལོ་སྟོང་ཕྲག་དུ་མའི་སྔ་རོལ་ནས།།
ཤེས་རིག་དཔལ་ལ་རོལ་བའི་སྐལ་བཟང་ཤར།།
འོད་སྟོང་འཕྲོ་བའི་བྷོ་ཊའི་རིག་གནས་ཞེས།།
གྲགས་སྙན་དབྱར་རྔ་སྒྲོག་ལྟར་ཕྱོགས་བཞིར་ཁྱབ།།
དེང་ཡང་དུས་རབས་གསར་པའི་འཛུགས་སྐྲུན་དང་།།
ཚན་རྩལ་དབྱར་མཚོ་རྒྱས་ལྟར་འཕེལ་བའི་ཁྲོད།།
ཐུན་མིན་ཡི་གེའི་སྲོལ་འདིའི་དགེ་མཚན་དག།
རྫོགས་ལྡན་གསར་པ་འདྲེན་པའི་དཔལ་དུ་ཤར།།
བཅུ་ཕྲག་རིག་པའི་གནས་ཀྱི་སྙིང་པོའི་བཅུད།།
རིན་ཐང་གཞལ་དུ་མེད་པའི་ཕ་ནོར་འདི།།
གཅེས་པར་བཟུང་ཞིང་འཛིན་སྐྱོང་སྤེལ་གསུམ་གྱིས།།
སྔར་བས་མཛེས་སྡུག་ལྡན་པའི་ལམ་ཡངས་པོར།།
ལེགས་པར་འགོད་པའི་རྒྱུ་རུ་སྨིན་པ་དང་།།
མི་ཉམས་གོང་ནས་གོང་དུ་འཕེལ་བའི་ཕྱིར།།
ཡི་གེའི་སྲོལ་འདིའི་བྱུང་རིམ་ལོ་རྒྱུས་དང་།།
སྔ་ཕྱི་བར་དུ་ཇི་ལྟར་འཕེལ་བའི་ཚུལ།།
རྒྱས་པར་དྲངས་པའི་བློ་ནུས་མི་ལྡན་ཡང་།།
ཆ་ཙམ་བརྗོད་པར་སྤྲོ་བས་འདི་ན་གླེང་།།
དེ་ཡང་ཐོག་མར་རང་རེའི་བོད་ཀྱི་ཡུལ་འདིར་ཡི་གེ་འབྱུང་བའི་སྤྱིཚོགས་ཀྱི་ཆ་རྐྱེན་དུས་ནམ་ཞིག་བྱུང་བ་ཡིན་མིན་གྱི་སྐོར་གླེང་བར་བྱ་བ་ལ་ཡི་གེ་ནི་འགྲོ་བ་མི་ཡི་སྤྱི་ཚོགས་ཐོག་མ་ཆགས་པ་དང་དུས་གཅིག་ཏུ་བྱུང་བ་ཞིག་མ་ཡིན་པར་སྤྱི་ཚོགས་གོང་འཕེལ་མུ་མཐུད་བྱུང་བའི་ལོ་རྒྱུས་ཀྱི་དུས་སྐབས་ངེས་ཅན་ཞིག་གི་ནང་དུ་བྱུང་བ་ཡིན། ཚང་མས་ཤེས་གསལ་ལྟར་ཆེས་སྔ་བའི་དུས་ཀྱི་ཡ་ཐོག་སྤྱི་ཚོགས་ནང་ཐོན་ལས་དང་། ཤེས་རིག སྤྱི་ཚོགས་ཀྱི་འབྲེལ་བ་སོགས་ཆུ་ཚད་ཧ་ཅང་དམའ་བའི་ཐོག་གནས་ནས་ཡོད་གཤིས་ཡི་གེའི་སྲོལ་འབྱུང་བའི་སྤྱི་ཚོགས་ཀྱི་རྨང་གཞིའམ་ཆ་རྐྱེན་གང་ཡང་མེད། དེའི་དུས་སུ་མི་རྣམས་སོ་སོའི་བརྗོད་འདོད་ཀྱི་བསམ་པ་ཕན་ཚུན་གོ་བརྡ་སྤྲོད་རྒྱུ་དེ་སྒྲ་འཛིན་དབང་པོའི་ནུས་པས་ཟིན་པའི་སྨྲ་བའམ་སྐད་ཀྱི་བྱེད་ལས་ལ་བརྟེན་ནས་ཡོངས་སུ་འགྲུབ་ཐུབ་པ་ཞིག་ཡིན་པས་ཡི་གེའི་དགོས་མཁོ་ཡང་མེད། འོན་ཀྱང་ལོ་རྒྱུས་ཀྱི་གོམ་སྟབས་དལ་འགྲོའི་རྒྱུན་བཞིན་ཡུན་རིང་མདུན་དུ་བསྐྱོད་པའི་བརྒྱུད་རིམ་ནང་སྤྱིཚོགས་ཀྱི་སྒྲིག་གཞི་དང་། ཐོན་ལས་ཀྱི་གཞི་ཁྱོན། མི་རྣམས་ཀྱི་བློ་རིག་ཤེས་རྩལ་སོགས་གང་ཅིར་ཡར་རྒྱས་ཆེན་པོ་བྱུང་ནས་སྤྱི་ཚོགས་ཀྱི་འབྲེལ་བ་དེ་ཡང་སྔར་དང་མི་འདྲ་བའི་རྒྱ་ཆེ་ཞིང་རྙོག་འཛིང་ཆེ་བར་གྱུར་བས་མི་རྣམས་སོ་སོའི་བརྗོད་འདོད་ཀྱི་བསམ་པ་ཕན་ཚུན་གོ་བརྡ་སྤྲོང་ཡུལ་གྱི་ཁྱབ་ཁོངས་ཀྱང་ཧ་ཅང་ཆེན་པོ་ཆགས་ཏེ་སྨྲ་བའམ་སྐད་གཅིག་པུའི་བྱེད་ལས་ལ་བརྟེན་ནས་དོན་གྱི་གོ་བརྡ་སྤྲོད་པའི་དགོས་མཁོ་ཇི་བཞིན་སྐོང་མ་ཐུབ་པ་དཔེར་ན། སྒྲ་འཛིན་དབང་པོའི་ནུས་པས་ཁྱབ་པའི་སར་ཕན་ཚུན་དབར་སྐད་ཀྱི་བྱེད་ལས་ལ་བརྟེན་ནས་དོན་གྱི་གོ་བརྡ་འཕྲོད་ཐུབ་པ་ཞིག་ཡིན་མོད། ས་ཁད་འགྱངས་བའི་ཡུལ་ཕྱོགས་སོ་སོའི་དབར་དང་།མི་ཐོག་སྔ་ཕྱིའི་དབར་སོགས་སྒྲ་འཛིན་དབང་པོའི་ནུས་པས་མ་ཁྱབ་པའི་སར་སྐད་ཀྱི་བྱེད་ལས་གཅིག་པུས་གོ་བརྡ་སྤྲོད་ཐབས་བྲལ་བར་བརྟེན་སྐད་ཀྱི་གོ་དོན་ཇི་ཡིན་གསལ་བར་སྟོན་ཐུབ་པ། ཡུལ་དང་དུས་ཀྱི་བཀག་རྒྱས་མ་ཐོགས་པར་ཤར་མར་བརྡ་སྤྲོད་ཐུབ་པའི་ཐབས་ལམ་གསར་པ་ཞིག་དགོས་ངེས་སུ་གྱུར་བའི་གནས་ལ་སླེབས་ཀྱི་ཡོད་པ་དེ་ནི་ཡི་གེ་འབྱུང་བའི་སྤྱི་ཚོགས་ཀྱི་རྨང་གཞི་རྩ་བའི་ཆར་ཆགས་ཡོང་བ་དང་། ལོ་རྒྱུས་ཀྱི་འཕེལ་རིམ་དུས་མཚམས་གསར་པ་ཞིག་གི་ཐོག་ཏུ་སླེབས་པའི་མཚོན་རྟགས་ཤིག་ཡིན། དེས་ན་ཡི་གེའི་སྲོལ་ནི་འགྲོ་བ་མི་ཡི་སྤྱི་ཚོགས་འཕེལ་རིམ་གྱི་ཆུ་ཚད་ཅུང་མཐོ་ཙམ་སླེབས་པའི་དུས་མཚམས་སུ་མ་གཏོགས་དར་ཐབས་མེད་པ་བརྗོད་མ་དགོས་པ་རེད།
འོ་ན་རང་རེའི་ཡུལ་འདིར་ཡི་གེའི་སྲོལ་དར་བའི་སྤྱི་ཚོགས་ཀྱི་ཆ་རྐྱེན་ནམ་རྨང་གཞི་དེ་ལོ་རྒྱུས་ཀྱི་དུས་སྐབས་གང་གི་སྐབས་སུ་ཆགས་ཡོད་དམ་ཞེ་ན། དོན་གནད་འདིའི་སྐོར་ད་ཕན་ཆེད་དུ་དམིགས་ནས་ངེས་གཏན་གྱི་གསུང་རྒྱུན་འདི་དང་དེ་ཡིན་ཞེས་ཡོད་པ་ཁོ་བོའི་མིག་ལམ་དུ་སྤྱོད་པའི་སྐབས་མ་མཆིས་ཀྱང་བོད་མིའི་གནའ་བོའི་སྤྱི་ཚོགས་འཕེལ་རིམ་ཇི་ཡིན་སྐོར་ཁུངས་བཙན་གྱི་ལོ་རྒྱུས་ཡིག་ཚང་རྣམས་ལ་གཅིག་མཐུན་གསལ་འཁོད་ཡོད་པར་ཆེ་ལོང་ཙམ་དཔྱད་ནས་བརྗོད་ན། བོད་འདིར་ཡི་གེའི་སྲོལ་དར་བའི་སྤྱི་ཚོགས་ཀྱི་ཆ་རྐྱེན་ནམ་རྨང་གཞི་ཆགས་པའི་དུས་སྐབས་དེ་ཕལ་ཆེར་རྒྱལ་ཕྲན་བཅུ་གཉིས་ཀྱི་དུས་སྐབས་སུ་ཡིན་ཞེས་བརྗོད་ཆོག་པ་ཡིན་སྙམ།
གཤམ་དུ་བརྗོད་དོན་འདིའི་སྐོར་ལོ་རྒྱུས་སྨྲ་བ་པོ་རྣམས་ཀྱི་བཞེད་ཚུལ་སྙིང་བསྡུས་ཀྱིས་དྲངས་ཏེ་དབྱེ་ཞིབ་རགས་ཙམ་བྱས་པ་ལ། དེ་ཡང་འཛམ་གླིང་གི་ཡང་རྩེར་གྲགས་པ་སྲིད་པའི་གངས་རིས་མུ་ཁྱུད་དུ་བསྐོར་བའི་ཡུལ་འདི་སྔོན་བསྐལ་པ་གྲངས་མེད་ཀྱི་སྔ་རོལ་དུ་རྒྱ་མཚོའི་ཁོངས་སུ་གཏོགས་པའི་ས་ཆ་ཞིག་ཡིན་ཡང་། རྗེས་སུ་རིམ་པས་འཇིག་རྟེན་སྣོད་བཅུད་ཀྱི་ཆགས་ཚུལ་ལ་འཕེལ་འགྲིབ་ཀྱི་འགྱུར་བ་མང་པོ་བྱུང་བའི་དབང་གིས་ཆུ་རྣམས་རིམ་པས་བྲི་ནས་སྐམ་སར་གྱུར་བ་མ་ཟད། རྩི་ཤིང་ནགས་ཚལ་རྒྱས་ཤིང་། རྩྭ་སྣ་དང་ཆུ་སྣ་འཛོམས་པ། གངས་རི་དང་། གཡའ་རི། རྫ་རི། སྤང་རི་སོགས་ཀྱི་རི་བརྒྱུད་ཀྱིས་འབྲེལ་བ། འདབ་ཆགས་དང་། གཅན་གཟན། སྤྲ་སྤྲེལ་སོགས་སྲོག་ཆགས་སྣ་ཚོགས་སྐྱེ་འཕེལ་བྱུང་ཞིང་བག་ཕེབས་སུ་གནས་པའི་ཡུལ་ཁམས་ཤིག་ཏུ་གྱུར། དེ་ནས་ཉི་ཟླའི་བགྲོད་པ་གྲངས་མེད་སོང་བའི་རྗེས་ལྷན་སྐྱེས་ཀྱི་ཤེས་པའི་རྨང་གཞི་གཞན་ལས་ཅུང་ཟད་བཟང་བའི་སྤྲ་སྤྲེལ་རྣམས་གཅན་གཟན་གྱི་འཇིགས་པ་དང་། ཚ་གྲང་གི་མནར་གདུང་། བཀྲེས་སྐོམ་གྱི་སྡུག་བསྔལ་སོགས་དཀའ་བ་གྲངས་ལས་འདས་པ་མྱོང་བའི་བརྒྱུད་རིམ་ནང་རིམ་པས་ལུས་ཀྱི་སྤུ་རྣམས་བྱི། སྐྱ་བ་བཞིན་གྱི་མཇུག་མ་ཡང་མེད་པར་གྱུར། རང་འབྱུང་གི་ཁམས་ཆེན་པོའི་ནང་ཕྲད་པའི་འཇིགས་སྐྲག་དང་། དཀའ་ཉེན་སྣ་ཚོགས་འགོག་སྲུང་བྱེད་པའི་ཐབས་རྩལ་ཡང་ཕྲན་ཙམ་ཤེས། ལུས་ལ་ཤིང་ལོ་གྱོན་ནས་གྲངས་ངར་འགོག་པ་དང་། རི་དྭགས་ཀྱི་ཤ་ཁྲག་དང་མ་རྨོས་པའི་ལོ་འབྲས་ལ་སྤྱད་ནས་བཀྲེས་སྐོམ་སེལ་བའི་ཐབས་ཤེས་རྙེད། སུག་བཞི་ས་ལ་འཛུགས་མི་དགོས་པར་ཀེར་མར་ལངས་ནས་འགྲོ་ཐུབ་པ་ཆགས། དེ་འདྲའི་ངང་ལོ་ངོ་ཁྲི་ཕྲག་མང་པོ་སོང་བའི་རྗེས་སྤྲ་སྤྲེལ་རྣམས་ཀྱི་གཟུགས་དབྱིབས་དང་། ངོ་རིས། དེ་བཞིན་གཤིས་སྤྱོད་སོགས་ཀྱི་ཐད་འགྱུར་བ་ཆེན་པོ་བྱུང་ནས་སྤྱིར་རི་དྭགས་ཀྱི་ཁྱད་ཆོས་མི་ཉུང་བ་ཞིག་ཡོད་མུས་ཐོག་མི་ཡི་ཁྱད་ཆོས་ཀྱང་མངོན་གསལ་དོད་པོ་ཡོད་པ་ཆགས་ནས་ལོ་རྒྱུས་ཐོག་བརྗོད་པའི་ཡ་ཐོག་དུས་རིམ་ནང་གི་མི་མ་ཡིན་གྱི་དུས་སྐབས་སུ་སླེབས་ཏེ་གངས་ཅན་ཡུལ་འདིར་མི་ཡི་འགྲོ་བ་འབྱུང་བའི་རྨང་གཞི་ཚུགས།
དེ་ནས་མི་མ་ཡིན་རྣམས་སླར་ཡང་ཤིན་ཏུ་རིང་བའི་དུས་རིམ་ནང་རིམ་པས་འཕེལ་རྒྱས་བྱུང་སྟེ་རྡོ་དང་དབྱུག་པ་སོགས་ལག་ཆ་འདྲ་མིན་སྣ་ཚོགས་སྤྱོད་ཤེས་པ་དང་། གཙུབ་ཤིང་ལས་མེ་བཏོན་ཏེ་རྗེན་རིགས་བཙོས་མར་བསྒྱུར་ཐུབ་པ་དང་གྲང་ངར་འགོག་པ་སོགས་རང་བྱུང་ཁོར་ཡུག་ཁྲོད་ཀྱི་འཇིགས་ཉེན་སྣ་ཚོགས་ལས་རྒྱལ་བའི་རིག་པ་དང་ཐབས་རྩལ་སྔར་བས་འཕེལ་རྒྱས་ཆེ་རུ་ཕྱིན་པ་དང་སྦྲགས་ཉེན་འགོག་ཟས་འཚོལ་གྱི་བྱེད་སྒོ་མཉམ་རུབ་ཐོག་སྤེལ་ནས་ཁྱུ་ཚོ་བྱས་ཏེ་སྡོད་པའི་གོམས་གཤིས་ཆགས། ལྷག་པར་དུ་ལུས་ཀྱི་སྐྱེ་ཁམས་འཕེལ་ནས་སྒྲ་སྣ་ཚོགས་འདོན་ཤེས་པ་མ་ཟད། སྒྲ་ཡི་མཐོ་དམན་དང་གྲིམ་ལྷོད་སོགས་ཀྱི་ཁྱད་པར་ལ་བརྟེན་ནས་དོན་གྱི་བརྡ་སྤྲོད་པའི་སྐད་ཆ་ཤོད་ཤེས་པ་བཅས་བྱུང་བ་དེས་ཡ་ཐོག་དུས་ཀྱི་མི་མ་ཡིན་རྣམས་གཟུགས་དང་། ངོ་དབྱིབས། གཤིས་སྤྱོད་སོགས་གང་གི་ཐད་ལ་རྩ་བའི་ཆར་རི་དྭགས་ཀྱི་རང་བཞིན་མེད་པ་ཆགས་ཏེ་ལག་ཆ་སྤྱོད་པའི་རྩལ་དང་ལྡན་པ་དང་། སྨྲ་ཞིང་དོན་གོ་བ་སོགས་མི་ཡི་གཙོ་བོའི་མཚན་ཉིད་ཡོངས་སུ་ཚང་བར་གྱུར་བ་མ་ཟད། རྒྱུད་པ་ཡང་མང་དུ་འཕེལ་ནས་སྟོད་ཤ་རྐྱང་རི་དྭགས་གླིང་དང་། བར་སྟག་གཟིག་གཅན་གཟན་གླིང་། སྨད་འདབ་ཆགས་བྱ་ཡི་གླིང་དུ་གྲུབ་པའི་གནའ་བོའི་བོད་ཁམས་ཀྱི་ཁོར་ཡུག་ཀུན་ཏུ་རྒྱ་ཆེར་ཁྱབ་སྟེ་གངས་ཅན་ཡུལ་འདིར་མི་ཡི་འགྲོ་བའི་བསྐལ་པ་ཡ་ཐོག་གི་དུས་སྐབས་སུ་དངོས་སུ་སླེབས། དེ་ནས་ཡ་ཐོག་གི་མི་རྣམས་ལ་རིམ་པས་སེ་དང་། རྨུ། ལྡོང་། སྟོང་། དབྲ།འབྲུ་སོགས་རུས་ཀྱི་དབྱེ་བ་བྱུང་། མི་རྣམས་ཀྱི་སྡོད་གནས་ཀྱང་རྩ་བའི་ཆར་གཏན་ཆགས་སུ་གྱུར་ཏེ་ཡུལ་ཚོམང་དུ་གྱེས། ཡུལ་ཚོ་སོ་སོར་ཉམས་མྱོང་མང་བ་དང་དཔའ་རྩལ་ཆེ་བའི་མི་ཞིག་འགོ་དཔོན་དུ་བཏོན་ནས་ཚོ་ཤོག་བྱས་ཏེ་སྡོད་པའི་སྲོལ་ཆགས་ཏེ་གནས་པ་སྟེ། 《ཆོས་འབྱུང་མཁས་པའི་དགའ་སྟོན》ལས།
“དང་པོར་གནོད་སྦྱིན་ནག་པོས་དབང་བྱས་ཏེ།།
ཡུལ་གྱི་མིང་ཡང་བཟང་ཡུལ་རྒྱན་མེད་ཟེར།།
མཚོན་ཆ་མདའ་གཞུ་དེ་ཡི་དུས་སུ་བྱུང་།།
དེ་ནས་རེ་ཏེ་མགོ་ཡག་བདུད་ཀྱིས་བྱས།།
མིང་ཡང་བདུད་ཡུལ་ཁ་རག་རོང་དགུར་བཏགས།།
སྟ་རེ་དགྲ་སྟ་དེ་ཡི་དུས་སུ་བྱུང་།།
དེ་ནས་སྲིན་པོ་གཉའ་རིང་ཁྲག་མིག་བྱས།།
ཡུལ་མིང་སྲིན་པོ་ནག་པོ་དགུ་ཡུལ་ཟེར།།
སྲིན་མོ་རྐང་དང་རྒྱགས་གཉིས་ལག་ཆར་བྱུང་།།
བཞི་པ་དམར་འཇམ་ལྷ་ཡིས་དབང་བྱས་ཏེ།།
ལྷ་ཡུལ་གུང་ཐང་ལག་ཆར་ཆུ་གྲི་བྱུང་།།
ལྔ་པར་རྨུ་ཁྲི་ཁོ་རྒྱལ་ཞེས་བྱས་བཟུང་།།
ད་ཕྲང་ཅང་ཕྲང་ལག་ཆར་ཞགས་པ་འཕེན།།
དྲུག་པར་ཀྲོག་ཀྲོག་འདྲེ་ཡིས་དབང་བྱས་ཏེ།།
ལང་ཏང་ལིང་ཏང་བར་ཁ་འུར་རྡོ་འཕེན།།
བདུན་པ་མ་སངས་རུས་དགུས་དབང་བྱས་ཏེ།།
ཡུལ་གྱི་མིང་ནི་བོད་ཁ་ཉ་དྲུག་ཟེར།།
ལག་ཆར་དོང་རལ་གོ་ཆ་ཕུབ་ཆུང་བྱུང་།།
བརྒྱད་པ་ཀླུས་བཟུང་བོད་ཁམས་གླིང་དགུ་བཏགས།།
དགུ་པ་རྒྱལ་པོས་དབང་བྱས་ངམ་པོ་ཅེ།།
བཅུ་པ་འགོང་པོ་དབུན་དགུས་དབང་བྱས་ཏེ།།
ཡུལ་གྱི་མིང་ཡང་སྟོང་སྡེ་བཅོ་བརྒྱད་ཟེར།།”（①ཤོག་གྲངས་151-152)
ཞེས་གསལ་བ་ལྟར་ལོ་རྒྱུས་དུས་མཚམས་དེའི་སྐབས་ཀྱི་གནས་ཚུལ་དེབ་ཐེར་ཁག་གི་ནང་གསུང་ཚུལ་ཕྲན་བུ་མི་འདྲ་ཡང་རྩ་བའི་ཆར་དགོངས་པ་གཅིག་མཐུན་ཡིན་པ་སྟེ། དེའི་དུས་སུ་སེ་དང་རྨུ་ལ་སོགས་པའི་རུས་རྒྱུད་ལས་རྒྱ་ཆེར་མཆེད་པའི་བོད་མི་རྣམས་ཁ་ལྗོངས་ཡུལ་གྱི་ས་ཕྱོགས་ཀུན་ཏུ་ཁྱབ་ཡོད་པ་མ་ཟད། གཏན་ཆགས་སུ་སྡོད་ཡུལ་བཟང་ཡུལ་རྒྱན་མེད་དང་། ཁ་རག་རོང་དགུ། སྟོང་སྡེ་བཅོ་བརྒྱད། བོད་ཁ་ཉ་དྲུག་སོགས་ཡུལ་ཚོ་མང་པོར་གྱེས་ཤིང་། ཡུལ་ཚོ་སོ་སོར་ཡེ་སངས་དཀར་པོ་དང་། གནོད་སྦྱིན་ནག་པོ། རྨུ་ཁྲི་ཁོ་རྒྱལ།མ་སངས་རུས་དགུ་སོགས་ཀྱིས་དབང་དུ་བསྒྱུར་ནས་ཁྲིམས་འགོ་རང་བཙན་གྱི་ཚུལ་དུ་གནས། མི་རྣམས་འཚོ་བྱེད་དུ་མཁོ་བའི་ལག་ཆ་ཡང་རྡོ་དང་དབྱུག་པ་གཅིག་པུ་མ་ཡིན་པར་ལྕགས་རིགས་ལས་གྲུབ་པའི་སྟ་རེ་དང། དགྲ་སྟ། ཆུ་གྲི་དང་། དེ་བཞིན་ཕུབ་དང། འུར་རྡོ་ཞགས་པ་སོགས་བྱུང་ཟིན་པ་བཅས་ལ་བལྟས་ན། དེའི་དུས་སུ་བོད་མིའི་སྤྱིཚོགས་དེ་ཐོན་སྐྱེད་དང་ལག་རྩལ་གྱི་ཆུ་ཚད་གོང་འཕེལ་ངེས་ཅན་ཞིག་བྱུང་ཡོད་ལ་འཕེལ་རིམ་དེ་དང་མཐུན་པའི་སྐད་ཀྱི་ཆུ་ཚད་ཀྱང་དེ་བཞིན་གྱི་ཡར་རྒྱས་བྱུང་ཡོད།
ལྕགས་རིགས་ཀྱི་ལག་ཆ་བེད་སྤྱོད་བྱེད་འགོ་ཚུགས་པ་དེ་ནི་ཡ་ཐོག་བོད་མི་རྣམས་ཀྱིས་རང་བྱུང་ཁོར་ཡུག་ཁྲོད་ཀྱི་ཐོན་རྫས་བེད་སྤྱོད་བྱེད་པའི་ལག་རྩལ་ཡར་རྒྱས་ཆེན་པོ་བྱུང་བའི་མཚོན་རྟགས་ཤིག་ཡིན་པ་མ་ཟད། སྤྱི་ཚོགས་ཀྱི་ཐོན་སྐྱེད་བྱེད་ཐབས་ཀྱང་རྔོན་ལས་ཁོ་ན་མ་ཡིན་པར་ཕྱུགས་གསོ་བ་དང་ལོ་ཏོག་འདེབས་པའི་ལམ་སྲོལ་ཡང་ཐོག་མར་དར་འགོ་ཚུགས་བཞིན་ཡོད་པའི་མཆོན་རྟགས་ཡིན། དེ་ནི་སྤྱི་ལོའི་སྔོན་གྱི་ལོ་སུམ་སྟོང་ཡས་མས་སྐབས་ཀྱི་བོད་མིའི་སྤྱི་ཚོགས་ཀྱི་གནས་སྟངས་ཡིན་པ་འདི་ད་ལྟ་འཛམ་གླིང་ཐོག་གནའ་བོའི་ལོ་རྒྱུས་འཕེལ་རིམ་གྱི་དུས་མཚམས་དབྱེ་སྲོལ་ལྟར་བརྩིས་ན་ཕལ་ཆེར་རྡོ་ཆས་གསར་མའི་དུས་དཀྱིལ་ལམ་དུས་མཇུག་ཐོག་མ་ཚུགས་པའི་སྐབས་ཀྱི་གནས་ཚུལ་ཡིན།
དེ་ནས་ལོ་རྒྱུས་ཀྱི་གོམ་སྟབས་དལ་འགྲོའི་རྒྱུན་བཞིན་མུ་མཐུད་ཡར་ཕྱོགས་སུ་སྤོ་བའི་བརྒྱུད་རིམ་ནང་ཐོག་མར་ཕྱུགས་གསོ་བའི་ལམ་སྲོལ་རྒྱ་ཁྱབ་ཏུ་དར་བ་དང་སྦྲགས་ལོ་ཏོག་འདེབས་སྲོལ་ཡང་རིམ་པས་དར་ཁྱབ་བྱུང་ནས་འབྲོག་ལས་དང་ཞིང་ལས་ཀྱི་རྨང་གཞི་ཚུགས། ཕྱོགས་མཚུངས་ཐོན་སྐྱེད་ཀྱི་ལས་ཀར་མཁོ་བའི་ཡོ་བྱད་སྣ་ཚོགས་དང་། སྡོད་གནས་ཀྱི་སྤྱིལ་བུ། སྟབས་བསྡུས་ཀྱི་རྒྱན་གོས་སོགས་བཟོ་བའི་ལག་ཤེས་བཟོ་རྩལ་ཡང་མང་པོ་ཤེས་ནས་གནའ་བོའི་བོད་མིའི་སྤྱི་ཚོགས་ཀྱི་ལོ་རྒྱུས་འཕེལ་རིམ་དེ་ཆུ་ཚད་གསར་པ་ཞིག་གི་ཐོག་ཏུ་སླེབས། དེའི་དུས་སུ་མི་རྣམས་ཀྱི་ལྟོ་གོས་འཚོལ་ལམ་ཡང་ཅུང་ཟད་མང་དུ་སོང་བས་ལོངས་སྤྱོད་ཀྱིས་ཕོངས་པའི་གནས་ཁོ་ནར་སྡོད་མ་དགོས་པར་སོ་སོའི་ངལ་རྩོལ་ཐོན་འབྲས་ཀྱིས་རྩ་བའི་ཆར་ལྟོ་རྩ་འཕྱིད་ཐུབ་ཙམ་བྱུང་བ་མ་ཟད། ཁ་ཅིག་ལ་ལྷག་འཕྲོ་ཡང་ཕྲན་བུ་བྱུང་ནས་རྒྱུ་དངོས་སྒེར་བདག་ཏུ་བཟུང་བའི་ལམ་སྲོལ་རིམ་པས་ཆགས། སྒེར་བདག་ཏུ་བཟུང་བའི་ལམ་སྲོལ་ཆགས་པ་དེས་དེ་སྔོན་མི་རྣམས་མཉམ་ལས་མཉམ་སྤྱོད་ཀྱིས་འདྲ་མཉམ་ངང་འཚོ་བ་སྐྱེལ་ནས་སྡོད་པའི་གནས་སྟངས་དེ་ཡང་རིམ་པས་འགྱུར་ནས་དབུལ་ཕྱུག་གི་དབྱེ་བ་ཆགས་པ་དང་སྦྲགས། མི་རྣམས་གཞན་འབྱོར་ལ་བརྔམས་པའི་འདོད་སེམས་ཀྱང་ཇེ་ཆེར་སོང་སྟེ་ཡུལ་ཚོ་སོ་སོའི་དབར་འཕྲོག་རྩོད་ཀྱི་དམག་འཁྲུག་རྒྱུན་མ་ཆད་པ་བྱུང་བ་དེས་སྔར་ཡུལ་ཚོ་མང་པོར་གྱེས་ཏེ་ཁྲིམས་འགོ་རང་བཙན་གྱི་ཚུལ་དུ་གནས་པའི་གདོད་མའི་སྤྱི་ཚོགས་ཀྱི་སྒྲིག་གཞི་དེ་དག་རིམ་པས་འཐོར་ནས་གཅིག་གྱུར་གྱི་ཕྱོགས་སུ་འཕེལ་འགྱུར་བྱུང་བ་སྟེ། ཡུལ་ཚོ་སྟོབས་ཤུགས་ཆེ་བ་རྣམས་ཀྱིས་སྟོབས་ཤུགས་ཞན་པའི་ཡུལ་ཚོ་ཆུང་གྲས་མང་པོ་དབང་དུ་བསྡུས་ནས་སོ་སོའི་མངའ་ཁོངས་ཀྱི་ས་རྒྱ་དང་མི་འབོར་སྔར་བས་ཆེ་བར་གྱུར་སྟབས་བོད་ཁམས་ཡོངས་ཀྱི་ཁོངས་ནས་ས་ཐག་རིང་བའི་ལུང་ཁུག་ས་བཙན་དུ་གནས་པའི་ཡུལ་ཚོ་ཁག་གཅིག་སྔར་མུས་བཞིན་སིལ་བུར་གནས་པ་ལས་དེ་མིན་རྣམས་ཡུལ་ཚོ་སྟོབས་ཤུགས་ཆེ་གྲས་ཁག་གཅིག་གི་མངའ་འོག་ཏུ་བསྒྲིལ་ནས་སྤྱི་ཚོགས་ཀྱི་སྒྲིག་གཞི་གསར་པ་ཞིག་ཆགས་ཏེ་ལོ་རྒྱུས་ཐོག་ཡོངས་སུ་གྲགས་པའི་རྒྱལ་ཕྲན་བཅུ་གཉིས་དང་། སིལ་མ་བཞི་བཅུ་ཟེར་བའི་དུས་སྐབས་ཀྱི་འགོ་ཚུགས།
རྒྱལ་ཕྲན་བཅུ་གཉིས་སོ་སོའི་གནས་ཡུལ་དང་རྒྱལ་བློན་གྱི་འབོད་མིང་ཇི་ཡིན་སྐོར་ལོ་རྒྱུས་ཡིག་ཚང་སོ་སོར་གསུང་ཚུལ་མི་འདྲ་བ་ཅུང་ཡོད་ཀྱང་རྩ་བའི་ཆར་མི་མཐུན་པ་མེད་པས་འདིར་《ཆོས་འབྱུང་མཁས་པའི་དགའ་སྟོན་》གྱི་བཞེད་པ་ལྟར་དྲངས་ན།“མཆིམས་ཡུལ་གྲུ་ཤུལ་ན། མཆིམས་རྗེ་ནི་གུ་ཡོད། བློན་པོ་སྣང་དང་དེང་། ༡ ཞང་ཞུང་ཡུལ་ན་ནི། རྒྱལ་པོ་ལེགས་སྙ་ཤུར། རྨ་དང་ར་སངས་བློན། ༢ དེ་བཞིན་དུ་མྱང་རོ་ཕྱོང་དཀར་ན། གཙང་རྗེ་ཐོང་དཀར་བློན་པོ་གནང་། ༣ གནུབས་ཡུལ་གླིང་དགུ་ན་སྣུབས་རྗེ་དམིགས་པ་བློན་པོ་རྨེའུ་དང་འབྲོ། ༤ ཉང་རོ་ཤམ་པོར་ལོ་རྔམ་རྗེ་འབྲོམ་བློན་པོ་ཤེ་སུང་གཉིས། ༥ ཀྱི་རི་ལྗོན་སྔོན་ན་ཀྱི་རྗེ་རྨད་པོ་བློན་པོ་ངམ་དང་འབྲོ། ༦ ངམས་ཤོད་ཁྲ་སྣར་ཟིངས་རྗེ་ཁྲི་འཕྲང་གསུམ་བློན་མགར་དང་མཉན། ༧ འོལ་ཕུ་སྤང་མཁར་དུ་ཟིང་རྗེ་ཐོན་ཕྲེང་བློན་པོ་རྔོག་དང་སྦས། ༨ སྲིབས་ཡུལ་གྱི་རལ་གོང་དུ་བྲང་རྗེ་གོང་ནམ་བློན་པོ་སྤྲད་དང་ཞུགས། ༩ ཀོང་ཡུལ་བྲེ་སྣ་ཀོང་རྗེ་ཀར་པོ་ཏུག་དང་མཁར་པ་བློན། ༡༠ ཉང་ཡུལ་རྣམ་གསུམ་ན་ཉང་བཙུན་གླང་རྒྱལ་བློན་པོ་ཕུག་དང་ངོ་རྗེ། ༡༡ དགས་ཡུལ་གྲུ་བཞི་ན་དགས་རྗེ་མང་པོ་རྒྱལ་བློན་པོ་རླངས་སྐམ་གཉིས། ༡༢”②(ཤོ་ཀ་གྲངས་155-156)ཞེས་གསལ། རྒྱལ་ཕྲན་བཅུ་གཉིས་དང་སིལ་མ་བཞི་བཅུ་བྱུང་ནས་ད་བར་ལོ་གྲངས་ཇི་ཙམ་སོང་མིན་སྐོར་ངེས་གཏན་གྱི་ལོ་གྲངས་འདི་ནས་འདི་བར་ཡིན་ཞེས་བརྗོད་པར་དཀའ་ཡང་། རྡོ་ཆས་གསར་མའི་དུས་མཇུག་ཏུ་ཡིན་པ་ངེས་གཏན་ལགས་ན། ད་ཕན་ཉུང་མཐར་ཡང་མི་ལོ་བཞི་སྟོང་ཡས་མས་ཞིག་སོང་ཟིན་པ་ཡིན།
རང་རེའི་བོད་ཀྱི་ལོ་རྒྱུས་འཕེལ་རིམ་ནང་རྒྱལ་ཕྲན་བཅུ་གཉིས་དང་སིལ་མ་བཞི་བཅུ་བྱུང་བའི་དུས་སྐབས་དེ་བོད་མིའི་སྤྱི་ཚོགས་ལ་འཕེལ་འགྱུར་ཆེན་པོ་བྱུང་བའི་གལ་ཆེའི་དུས་མཚམས་ཤིག་ཡིན།དུས་མཚམས་དེ་ནས་བཟུང་བོད་མིའི་རྒྱལ་ཁམས་ཁྱོན་དུ་སིལ་བུའི་ཚུལ་དུ་གནས་པའི་སྤྱི་ཚོགས་ཀྱི་སྒྲིག་གཞི་དེ་རྩ་བའི་ཆར་ཡོངས་སུ་འཐོར་ནས་མངའ་ཁོངས་རྒྱ་ཆེ་བ་དང་། མངའ་འབངས་མང་བའི་གཅིག་གྱུར་ཀྱི་རྒྱལ་ཕྲན་ཁག་ཏུ་གྱུར། སྤྱི་ཚོགས་ཐོག་དབང་ཐོབ་དང་གནས་བབ་མི་འདྲ་བའི་རྒྱལ་པོ་དང་། བློན་པོ། མངའ་འབངས་སོགས་ཀྱི་ཐ་སྙད་དངོས་སུ་བྱུང་།ཐོན་ལས་གཙོ་བོ་འབྲོག་ལས་དང་ཞིང་ལས་བྱེད་པའི་ཕྱོགས་སུ་གྱུར། ཐོན་རྫས་ཀྱི་ལྷག་འཕྲོ་བདག་གིར་བཟུང་བའི་སྒེར་ལ་དབང་བའི་ལམ་ལུགས་དར་ནས་དབུལ་ཕྱུག་གི་དབྱེ་བ་གསལ་པོ་ཆགས། ལག་ཤེས་ཐད་གཏེར་རྡོ་བཞུས་ནས་ཟངས་ལྕགས་བཏོན་ཏེ་ཐོན་ལས་དང་འཚོ་བྱེད་ཀྱི་ཉེར་མཁོའི་ཡོ་ཆས་སྣ་ཚོགས་དང་མཚོན་ཆ་སོགས་བཟོ་བའི་ལག་རྩལ་ཤེས། རྒྱལ་ཕྲན་སོ་སོས་མངའ་ཁོངས་དང་འབངས་མི་སྐྱོང་བའི་སྲིད་ཀྱི་བྱེད་སྒོ་སྔར་ལས་མང་བར་གྱུར། ཤེས་བྱ་ཇི་ལྟ་བ་བཞིན་ངོས་འཛིན་པའི་རིག་སྟོབས་ཀྱང་ངེས་ཅན་འཕེལ། ལྷག་པར་དུ་སྐབས་དེར་རྒྱལ་ཕྲན་བཅུ་གཉིས་ཀྱི་ནང་ནས་ཕྱོགས་གང་ཅིར་སྔོན་ཐོན་གྱི་ཚུལ་དུ་གནས་པའི་ཞང་ཞུང་དུ་གནའ་བོའི་བོན་ལུགས་དང་ངོ་བོ་ཐ་དད་པའི་གཡུང་དྲུང་བོན་གྱི་བསྟན་པའི་དབུ་བརྙེས་པ་དང་། དར་ཁྱབ་གཏོང་བའི་འགོ་ཚུགས། མི་རྣམས་ཀྱི་སྣོད་བཅུད་འཇིག་རྟེན་གྱི་ཆགས་ཚུལ་དང་འཕེལ་འགྱུར་འགྲོ་ཚུལ་ཐད་ཀྱི་ལྟ་བ་འཛིན་སྟངས་ཀྱང་རིམ་པས་འགྱུར་བ་ཆེན་པོ་བྱུང་བ་སོགས་སྤྱི་ཚོགས་ཀྱི་སྒྲིག་གཞི་དང་། ཐོན་ལས་ཀྱི་གཞི་ཁྱོན། ལག་ཤེས་ཀྱི་རྣམ་གྲངས་སོགས་ཕྱོགས་གང་སར་གོང་འཕེལ་ཆེན་པོ་བྱུང་བ་དང་སྦྲགས་སྤྱི་ཚོགས་ཀྱི་འབྲེལ་བ་ཡང་རང་བཞིན་དུ་རྒྱ་ཆེ་བ་དང་རྙོག་འཛིང་ཆེ་བར་གྱུར།
དེ་འདྲའི་གནས་ཚུལ་འོག་ཐོན་ལས་དང་། རིག་གནས། འཚོ་བ་སོགས་ཀྱི་ཐད་རྒྱལ་བློན་དང་འཁོར་འབངས་དབར་དང་། ཡུལ་ཚོ་དང་ཡུལ་ཚོའི་དབར་ཕན་ཚུན་ཆ་འཕྲིན་བརྡ་སྤྲོད་པར་སྒྲ་འཛིན་དབང་པོས་ཟིན་ཙམ་གྱི་སྐད་དང་སྨྲ་བ་ཁོ་ནའི་ཆ་རྐྱེན་དེས་བརྡ་སྤྲོད་ཀྱི་དགོས་མཁོ་སྐོང་མི་ཐུབ་པ་དང་། ཁྱད་པར་དུ་གཡུང་དྲུང་བོན་གྱི་བསྟན་པ་བོད་མིའི་ཡུལ་ཕྱོགས་གང་སར་སྤེལ་བར་ཡུལ་དུས་ཀྱི་བཀག་རྒྱ་ལས་གྲོལ་ཐུབ་པའི་བརྡ་སྤྲོད་ཀྱི་ཐབས་ལམ་གསར་པ་ཞིག་མ་བྱུང་ཐུ་མེད་ཆགས་པ་སོགས་ནི་བོད་མིའི་སྤྱི་ཚོགས་ཀྱི་འཕེལ་རིམ་ལོ་རྒྱུས་ཀྱི་དུས་མཚམས་གསར་པ་ཞིག་ལ་སླེབས་པའི་མཚོན་རྟགས་ཡིན་ལ། གངས་ཅན་ཡུལ་འདིར་
ཤེས་རིག་དཔལ་ཡོན་གྱི་སྐྱ་རེངས་གསར་པ་འཆར་ཁར་ཉེ་བའི་མཆོན་རྟགས་ཀྱང་ཡིན།
གོང་དུ་བརྗོད་པ་ལྟར་ཡི་གེ་ནི་སྤྱི་ཚོགས་གོང་འཕེལ་མུ་མཐུད་བྱུང་བའི་ལོ་རྒྱུས་ཀྱི་དུས་སྐབས་ངེས་ཅན་ཞིག་གི་ནང་དུ་བྱུང་བ་ཡིན། གནའ་བོའི་བོད་མིའི་སྤྱི་ཚོགས་ཀྱི་འཕེལ་རིམ་སྤྱི་ལ་གཞིགས་ན་རྒྱལ་ཕྲན་བཅུ་གཉིས་ཀྱི་དུས་སྐབས་སུ་རྩ་བའི་ཆར་ཡ་ཐོག་སྤྱི་ཚོགས་ཀྱི་རྣམ་པ་ལས་གྲོལ་བའི་གནས་སུ་གོང་འཕེལ་བྱུང་ཡོད།
གངས་ཅན་ལོ་རྒྱུས་ཀྱི་འཕེལ་རིམ་དུས་མཚམས་དེའི་སྐབས་སུ་སྤྱི་ཚོགས་མུ་མཐུད་གོང་འཕེལ་གཏོང་བའི་དགོས་མཁོ་དང་འཚམས་ཕྱིར་མི་རྣམས་ཀྱི་འདོད་དོན་ཅི་རིགས་བདེ་བླག་ཏུ་བརྡ་སྤྲོད་པའི་མཐུན་རྐྱེན་དུ་ཡི་གེའི་སྲོལ་གསར་དུ་བསྐྲུན་དགོས་པའི་ཐད་མཚམས་སུ་དངོས་སུ་སླེབས་ཟིན་པ་སྟེ་ཡི་གེའི་སྲོལ་འབྱུང་བའི་སྤྱི་ཚོགས་ཀྱི་རྨང་གཞིའམ་ཆ་རྐྱེན་རྩ་བའི་ཆར་གྲུབ་སྟེ་བོད་ཀྱི་ཡིག་སྲོལ་དང་པོ་ཞང་ཞུང་གི་ཡི་གེ་དེ་ཡང་འབྲས་བུ་དུས་སུ་སྨིན་པ་བཞིན་དངོས་སུ་དབུ་བརྙེས་པ་ཡིན་ནོ།།
|
|
