དཔལ་མཆོག་གངས་ལྗོངས་གསེར་སྨྱུག་ཡིག་མཁན།
ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་སྡུར་ལས་བྱ་དགའ་ཐོཔ་པའི་ཡིག་མཁན་༣༦གི་བརྩམས་ཆོས་འགྲེམ་སྟོན།
༄༅།། སྐྱ་མིང་འཇིག་རྡོ་དང་སེར་མིང་དཔལ་མཆོག་ཏུ་འབོད་པ་ཁོང་ནི་དྲ་མིང་མྱྀ་ཁྲ་ཁྲ་རུ་འབོད་པ་ཁོང་ནི་ལོ་རབས་དགུ་བཅུའི་སྟོད་དང་དུས་རབས་ཉེར་གཅིག་ལ་ཉེ་བའི་སྐབས་ནག་ཆུ་གྲོང་ཁྱེར་སྦྲ་ཆེན་རྫོང་དཀར་ཤོད་སྤུ་ལ་ཞེས་པའི་ཕ་རྒྱུད་དབྲ་ཚ་དང་མ་རུས་གཅུང་པ་ཡིན་པའི་འབྲོག་སྡེ་དཀྱུས་མའི་གཞིས་ཁྱིམ་ཞིག་ན་སྐྱེས། ཆུང་བྱིས་དུས་ཕྱུགས་རྫི་ཕལ་བའི་མི་ཚེ་རྩེད་མོ་ལ་འགྲོགས་ནས་འཚོ་གནས་སྐྱེལ་བ་ལས་སློབ་གྲྭ་ཆུང་འབྲིང་ཆེ་གསུམ་གང་ལའང་འགྲོ་བའི་བསྐལ་བ་མ་སྨིན། རང་ལོ་བཅུ་ཁ་རུ་བསླེབས་སྐབས་ཕ་ཡུལ་གྱི་བྲིས་པ་རྒན་གྲས་ཁོ་བོའི་ཨ་ཁུ་ཀུན་དགའི་མདུན་དུ་བྲིས་ཀྱི་སྨྱུག་ཁ་ཐོག་མར་བསྒྱུར། དེ་ནས་ཡུན་རིང་ཞིག་ལ་འཁྱམ་ཉུལ་གྱི་མི་ཚེ་རོལ་ནས་བསྡད་པ་ལས་རིག་གནས་སློབ་པའི་ཁོར་ཡུག་གི་མཐུན་རྐྱེན་མ་གྲུབ། གང་མཚམས་ཞིག་ལ་རིག་གནས་སྦྱོང་བའི་འདུན་པ་ཟབ་མོར་སྐྱེས་པས་སྐྱ་གོས་ཕུད་དེ་སེར་ཆས་གྱོན་པའི་ལམ་སྒོར་ཞུགས་ནས་ཕ་ཡུལ་གྱི་དགོན་སྡེ་བཤད་སྒྲུབ་ཀྱི་མཚན་ཉིད་གྲྭ་ཚང་ཞུགས་ནས་ད་བར་བགྲང་བྱ་བཅུ་ལྷག་འགོར། ལྷག་པའི་བཀའ་དྲིན་ཅན་མདོ་སྔགས་རབ་འབྱམས་པ་གྲྭ་ས་༧སྨན་རིའི་མཚན་ཉིད་སློབ་དཔོན་ཆེན་མོ་རྒན་«གཤེན་བསྟན་རབ་གསལ་»མཆོག་གི་སྐུ་ཡི་དྲུང་དུ་རྩ་བ་སྡུད་གྲྭ་བཟུང་རྩེ་མོ་སྔགས་རྫོགས་ལ་འཆང་ནས་ད་ལྟའི་བར་སློབ་གཉེར་བྱེད་མུས་སུ་མཆིས། ད་ཆར་ཡང་«བོད་ལྗོངས་ནང་བསྟན་སློབ་གྲྭ་»«བོད་རིག་པའི་ཞིབ་འཇུག་ལྟེ་གནས»་སུ་སློབ་གཉེར་བྱེད་པའི་སྒང་ཡིན། གཞུང་ལུགས་ཀྱི་སློབ་སྦྱོང་གཙོ་བོར་བྱེད་ཀྱིན་རྩོམ་རིག་དང་ལོ་རྒྱུས་ཡིག་བྲིས་སོགས་འགྲོ་ཞོར་འདུག་ཞོར་དོ་སྣང་ཅུང་བྱས་པའི་སྦྱོང་འབྲས་གང་འཚམ་དངོས་གྱུར་ཐོབ། ད་ཆར་ཡང་བོད་རིགས་ཞིང་ལྗོངས་ལྔ་ཡི་ཚུན་མི་རིགས་ཀྱི་བླ་སྲོག་ལྟར་བོད་ཡིག་བྲིས་གཟུགས་ཚ་རླབས་ཤིན་ཏུ་འབར་གྱིན་པའི་སྒང་དུ་ཁོ་བོར་རྒྱལ་ཡོངས་བོད་ཀྱི་ཡིག་གཟུགས་འགྲན་སྡུར་སྐབས་ཨང་རིམ་དང་པོ་སོགས་བྱ་དགའ་མི་ཉུང་བར་ཐོབ་ཅིང་ཉེ་ཆར་«བོད་ལྗོངས་ཡིག་གཟུགས་མཁས་པའི་མཐུན་ཚོགས་དང་ནག་ཆུ་གྲོང་ཁྱེར་ཡིག་གཟུགས་མཁས་པའི་མཐུན་ཚོགས་»ཀྱི་ཚོགས་མི་བཅས་འདེམས་ཐོན་བྱུང་བ་ལགས་སོ།
|
|
