བསོད་ནམས་བསྟན་འཛིན་གངས་ལྗོངས་གསེར་སྨྱུག་ཡིག་མཁན།
ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་སྡུར་ལས་མི་༣༦གི་ཁྲོད་དུ་ཚུད་པའི་ཡིག་མཁན་གྱི་བརྩམས་ཆོས་འགྲེམ་སྟོན།
དངོས་མིང་ལ་བསོད་ནམས་བསྟན་འཛིན་ནམ་སྨྱུག་མིང་སྐར་གླིང་བསྟན་འཛིན་དུ་འབོད་པ་ཁོང་ནི༡༩༩༣ལོར་བོད་ལྗོངས་ལྷོ་ཁ་སྣ་དཀར་རྩེ་རྫོང་སྒོ་གླིང་གྲོང་ཚོར་ཚེ་སྲོག་གི་ངུ་ངག་ཐོག་མ་དེ་གྲགས་ཤིང་། ཕ་མ་བཟང་པོའི་བཀའ་དྲིན་འོག་གོམ་ཁའི་ཁ་ལོ་ཤེས་རིག་གི་སྐྱེས་ཚལ་དུ་སྤོ་འགོ་བརྩམས། ཆུང་དུས་ནས་མི་རིགས་ཀྱི་སྐད་ཡིག་སློབ་སྦྱོང་བྱ་རྒྱུར་དགའ་ཞིང་། བོད་ཡིག་ཡིག་གཟུགས་སྦྱོང་རྒྱུར་དེ་བས་སྤྲོ། ༢༠༡༥ལོར་བོད་ལྗོངས་གཞིས་རྩེ་གྲོང་ཁྱེར་རྣམ་གླིང་རྫོང་དུ་བོད་སྐད་ཡིག་སློབ་ཁྲིད་ཀྱི་ལས་གནས་སུ་འཁོད། སྤྱི་ལོ་༢༠༢༠ལོ་ནས་བཟུང་བཀའ་དྲིན་ཞལ་དུ་མེད་པའི་བཤེས་གཉེན་དམ་པ་བཟང་ལྡན་ལགས་ཀྱི་ཞབས་ལ་གཏུག་ནས་བོད་ཀྱི་ཐུན་མིན་གྱི་མཛུབ་རིས་གཞུང་བྲིས་ཕྱག་རྒྱུན་ལ་དངོས་སུ་སློབ་སྦྱོང་དང་འབད་པ་ཡང་ཡང་ཞུས་མཐར་འབྲས་བུ་ཡང་མི་དམན་པ་ཞིག་ཐོབ་ཡོད། སྔ་རྗེས་སུ་རྫོང་དང་གྲོང་ཁྱེར། ལྗོངས་རིམ་པ་སོགས་ཀྱི་ཡིག་གཟུགས་འགྲན་བསྡུར་ནང་བྱ་དགའ་ཡང་མང་དག་ཅིག་ཐོབ་མྱོང་། ད་ཆ་བོད་ལྗོངས་ལྷ་ས་གྲོང་ཁྱེར་ཡིག་མཁན་མཐུན་ཚོགས་ཀྱི་ཚོགས་མི་དང་ལྷོ་ཁའི་ཡིག་གཟུགས་ཚོགས་པའི་ཚོགས་མི་ཡིན།
|
|
