བསོད་ནམས་བཟང་པོ་གངས་ལྗོངས་གསེར་སྨྱུག་ཡིག་མཁན།
ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་སྡུར་ལས་མི་༣༦གི་ཁྲོད་དུ་ཚུད་པའི་ཡིག་མཁན་གྱི་བརྩམས་ཆོས་འགྲེམ་སྟོན།
ཡིག་མཁན་བསོད་ནམས་བཟང་པོ་ནི་རྔ་བ་ཁུལ་འཛམ་ཐང་རྫོང་འཛམ་ཐང་སྡེར་ནང་ཡུལ་ཚོ་ནས་ཡིན། ཆུང་དུས་ནས་རང་གི་ཕ་དམ་པ་བོད་ཀྱི་ལྷ་རིས་པ་སྦྱིན་སྐྱབས་ཀྱི་ལམ་སྟོན་འོག་བྲིས་དང་རི་མོ་སོགས་བོད་ཀྱི་སྲོལ་རྒྱུན་རིགས་གནས་སྣ་ཚོགས་ལ་སློབ་གཉེར་གྱི་རྨང་གཞི་བརྟན་པོ་བཞག
2002ལོར་ཇོ་ནང་སྐྱབས་མགོན་མཆོག་སྤྲུལ་༧འཇིགས་མེད་རྡོ་རྗེའི་སྐུ་མདུན་ནས་རབ་ཏུ་བྱུང་།དུས་འཁོར་སྦྱོར་དྲུག་གི་ཉམས་ལེན་མི་ལོ་དྲུག་ལ་བྱས། 2008ལོར། འཛམ་ཐང་གཙང་བ་དགོན་ཆེན་གྱི་ཇོ་ནང་སྤྱིའི་ཆེས་མཐོའི་མདོ་སྔགས་སློབ་གླིང་ནས་གཞུང་ཆེན་བཀའ་པོད་ལྔ་སྔགས་དང་བཅས་པར་མི་ལོ་བཅུ་གསུམ་རིང་ལ་སློབ་གཉེར་མཐར་ཕྱིན་པ་མཛད། དེ་བཞིན་དགེ་རྒན་སེངྒེ་དར་རྒྱས་ཀྱི་མདུན་ནས་སྡེར་ནང་ས་བྲིས་དང་། དགེ་རྒན་ཕུན་ཚོགས་ཐུབ་ཆེན་གྱི་མདུན་ནས་འབྲུ་ཚ་བསླབས།གཞན་ཡང་རང་དང་ཕ་ཡུལ་གཅིག་པའི་ཡིག་མཁན་ལྔ་ལྷག་གི་མདུན་ནས་དབུ་ཅན། དབུ་མེད་ཆེ་ཆུང་སོགས་རྒྱུན་སྤྱོད་ཡིག་རིགས་དུ་མ་ཞིབ་ཏུ་བསླབས།2020ལོ་ནས་སི་ཁྲོན་བོད་བརྒྱུད་ནང་བསྟན་སློབ་གླིང་གི་ཡིག་གཟུགས་དགེ་རྒན་ཆེན་མོ་རྒན་ཆོས་འཛིན་གྱི་མདུན་ནས།ཚུགས་རིང་། ཚུགས་ཐུང་། ཚུགས་ཆུང་། འཁྱུག་ཡིགཧོར་ཡིག ལཉྫ་བཅས་ལ་ཞིབ་པར་བསླབས་པ་སོགས་སྔ་ཕྱིར་སྐད་གྲགས་ཆོད་པའི་བྲིས་གཟུགས་དགེ་རྒན་བཅུ་ཕྲག་ལྷག་བསྟེན་ནས་བོད་ཀྱི་ཡིག་གཟུགས་སྣ་ཚོགས་ལ་མི་ལོ་ཉི་ཤུ་ལྷག་གི་རིང་སློབ་གཉེར་མི་དམན་པ་བྱས།
གཞན་ཡང་བོད་ཀྱི་ཡིག་མཁན་རྣམས་ཀྱི་ཕྱག་རྒྱུན་རྩ་བར་བཟུང་ནས་བོད་ཀྱི་ཡིག་གཟུགས་སྒྱུ་རྩལ་ལ་མོས་པ་ཡོད་པའི་སློབ་མ་སྟོང་ལྷག་ལ་ཡིག་གཟུགས་བསླབས་མྱོང་ཡོད།
2022ལོར་འཛམ་ཐང་རྫོང་གཟུགས་མིན་ཤུལ་བཞག་རིག་གནས་རྣམ་གྲངས་ལས་བོད་ཡིག་ཡིག་གཟུགས་ཀྱི་ཚབ་མཚོན་རྒྱུད་འཛིན་པའི་དཔང་ཡིག་ཐོབ།
ད་ལྟ་སི་ཁྲོན་བོད་བརྒྱུད་ནང་བསྟན་སློབ་གླིང་དུ་ནང་བསྟན་རིགས་གཞུང་གཙོས་པའི་རིག་གནས་སྣ་མང་ལ་སློབ་གཉེར་བྱེད་བཞིན་མཆིས་སོ།།
སྤྱི་ཚོགས་སུ་བྱ་དགའ་ཐོབ་པའི་རྣམ་གྲངས།
2019ལོར་ཇོ་ནང་ཆེས་མཐོའི་མདོ་སྔགས་སློང་གླིང་དུ། འཛམ་ཐང《སྒར་བྲིས》བརྒྱུད་སྦྱོང་ཁང་གི་ཡིག་གཟུགས་འགྲན་སྡུར་ཁྲོད་ཨང་དང་པོའི་གཟེངས་རྟགས་ཐོབ།
2020ལོར། 《རྒྱལ་ཡོངས་ཀྲུང་གོའི》ཡིག་གཟུགས་འགྲན་བསྡུར་ཁྲོད།ཨང་གསུམ་པའི་གཟེངས་རྟགས་ཐོབ་པར་མ་ཟད།དེང་རབས་རྒྱལ་ཡོངས་ཀྲུང་གོའི་ཡིག་གཟུགས་ཆེད་མཁས་པའི་མཚན་རྟགས་ཀྱང་ཐོབ།
2020ལོར། ཛམ་ཐང་རྫོང་རིམ་པའི་ཛཾ་བྷ་ལའི《གཟུགས་མིན་ཤུལ་བཞག》རིག་གནས་རྣམ་གྲངས་ལས་བོད་ཡིག་ཡིག་གཟུགས་ཀྱི་ཚབ་མཚོན་རྒྱུད་འཛིན་པ་ངོས་འཛིན་མཛད་དེ་དཔང་ཡིག་གནང་།
2021ལོར། འཛམ་ཐང་རྫོང་རིམ་པའི་ཡིག་གཟུགས་དང་རི་མོ་འགྲན་བསྡུར་ཐོག་ཕུལ་བྱུང་བྱ་དགའ་དང་ཨང་གསུམ་པའི་བྱ་དགའ་ཐོབ།
2022ལོར། འཛམ་ཐང་རྫོང་ཛཾ་བྷ་ལའི《རིག་གནས》ཡུལ་སྐོར་དམངས་ཁྲོད་ལག་རྩལ་འགྲན་བསྡུར་ཁྲོད།བོད་ཀྱི་ཡིག་གཟུགས་ཨང་དང་པོའི་གཟེངས་རྟགས་ཐོབ།
2022ལོར།སི་ཁྲོན་བོད་བརྒྱུད་ནང་བསྟན་སློབ་གླིང་དང་། སི་ཁྲོན་ཞིང་ཆེན་ཐབས་ཕྱོགས་གཅིག་གྱུར་པུའུ་དང་། སི་ཁྲོན་ཞིང་ཆེན་བོད་འབྲེལ་གཞུང་དོན་ཁང་།སི་ཁྲོན་ཞིང་ཆེན་མི་རིགས་ཆོས་ལུགས་དོན་གཅོད་ཨུ་ཡོན་ལྷན་ཁང་བཞི་ཡིས་མཉམ་འབྲེལ་བྱས་ཏེ《ཁུལ་རིམ་པའི》ཡིག་གཟུགས་འགྲན་བསྡུར་ཁྲོད་ཨང་གཉིས་པའི་གཟེངས་རྟགས་ཐོབ།
2023ལོར།ཀན་ལྷོ་མི་རིགས་རང་སྐྱོང་ཁུལ་གྱི་གཙོ་སྒྲུབ་མཛད་པའི།《ཐོན་མིའི་ཡིག་རྒྱུན》རྒྱལ་ཡོངས་བོད་ཀྱི་ཡིག་གཟུགས་འགྲན་བསྡུར་སྐབས་གསུམ་པའི་ཁྲོད་ཕུལ་བྱུང་བྱ་དགའི་གཟེངས་རྟགས་ཐོབ།
2023ལོར།སི་ཁྲོན་བོད་བརྒྱུད་ནང་བསྟན་སློབ་གླིང་གི་ཡིག་གཟུགས་འགྲེམ་སྟོན་སྐབས་སུ་བྲིས་པའི་ཡིག་གཟུགས་བརྩམས་ཆོས《སངས་རྒྱས་ཀྱི་བསྟན་པ།》ཞེས་པ་སི་ཁྲོན་བོད་བརྒྱུད་ནང་བསྟན་སློབ་གླིང་གི་འགྲེམ་སྟོན་ཁང་དུ་བཤམས་སྟོན་ཡིག་གཟུགས་ཏུ་ཚུད་པས་ཉར་ཚགས་དཔང་ཡིག་ཀྱང་ཐོབ།
2023 ལོར། སྐབས་གཉིས་པའི《ཧན་ཡུན་བུམ་པའི》རྒྱལ་ཡོངས་ཀྲུང་གོའི་ཡིག་གཟུགས་དང་རི་མོའི་འགྲན་བསྡུར་ཁྲོད། རི་མོའི་ཨང་དང་པོའི་བྱ་དགའ་དང་གསེར་གྱི་རྟགས་མ་ཐོབ།
|
|
