ཀན་ལྷོ་ཁུལ་རིག་རྩལ་མཉམ་འབྲེལ་ལྷན་ཚོགས་ཀླུ་ཆུ་རྫོང་གི་རིག་གནས་སྒྱུ་རྩལ་ལས་དོན་ཐད་ཀྱི་བྱ་བར་རྟོག་ཞིབ་ཏུ་ཕེབས་པ།
ཟླ་འདིའི་ཚེས་༢༤ཉིན་གྱི་སྔ་དྲོ་ཀན་ལྷོ་བོད་རིགས་རང་སྐྱོང་ཁུལ་ཨུའི་དྲིལ་བསྒྲགས་པུའུ་ཀྲང་གཞོན་པའམ། ཁུལ་རིག་རྩལ་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཧྲུའུ་ཅི། ཚོགས་གཙོ་ཀྲོའོ་ལིན་ཧོང་ལགས་ཀྱིས་《ཟླ་ཟེར་》རྩོམ་སྒྲིག་ཁང་གི་གཙོ་སྒྲིག་པའམ་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་རྒན་ཕྱག་རྡོར་ཚེ་རིང་དང་། 《སྐལ་བཟང་མེ་ཏོག》དུས་དེབ་རྩོམ་སྒྲིག་ཁང་གི་ཀྲུའུ་རེན་གཞོན་པའམ། རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ་ཝང་ཞོའོ་ཀྲུང་། ཁུལ་རིག་རྩལ་མཉམ་འབྲེལ་ལྷན་ཚོགས་གཞུང་ལས་ཁང་གི་ཀྲུའུ་རེན་ཨ་པན་སོགས་འབྲེལ་ཡོད་མི་སྣ་ཁྲིད་དེ་ཀླུ་ཆུ་རྫོང་གི་རིག་གནས་སྒྱུ་རྩལ་ལས་དོན་ཐད་ཀྱི་བྱ་བར་རྟོག་ཞིབ་ཏུ་ཕེབས།
ཀན་ལྷོ་བོད་རིགས་རང་སྐྱོང་ཁུལ་ཨུའི་དྲིལ་བསྒྲགས་པུའུ་ཀྲང་གཞོན་པའམ། ཁུལ་རིག་རྩལ་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཧྲུའུ་ཅི། ཚོགས་གཙོ་ཀྲོའོ་ལིན་ཧོང་གིས་གསུང་བཤད་གནང་བཞིན་པ།
ཐེངས་འདིའི་རིག་རྩལ་རྟོག་ཞིབ་བྱ་བར་ཡུལ་དངོས་རྟོག་ཞིབ་དང་། བགྲོ་གླེང་གྲོས་ཚོགས་བཅས་གོ་རིམ་གཉིས་སུ་བསྡུས་ཤིང་། ཐོག་མར་པར་ལེན་དང་རྒྱ་བོད་ཡིག་གཟུགས། མཛེས་རིས་མཛེས་རྩལ། བརྙན་ལམ་འོས་སྦྱོར་སོགས་ཀྱི་ལམ་ནས་མཚོན་པའི་ཀྲུང་ཧྭ་མི་རིགས་ཐུན་མོང་གཞི་གཅིག་གི་འདུ་ཤེས་དང་། མི་རིགས་མཐུན་སྒྲིལ་དང་ཆོས་ལུགས་འཆམ་མཐུན་བཅས་ཀྱི་བརྗོད་དོན་འགྲེམ་སྟོན་ལ་གཟིགས་སྐོར་མཛད་པ་དང་ཆབས་ཅིག ཀླུ་ཆུ་རྫོང་ཤ་བཙོས་ཐང་རིག་གནས་ཐོན་ལས་གླིང་གི་ཉིས་ཐོག་གྲོས་ཚོགས་ཁང་ནས་ཆུ་ཚོད་གཉིས་དང་ཕྱེད་རིང་གི་བགྲོ་གླེང་ཚོགས་འདུ་བསྡུས། བགྲོ་གླེང་ཚོགས་འདུ་ཧྲིལ་བོ་རྫོང་ཨུའི་དྲིལ་བསྒྲགས་པུའུ་ཡི་དུས་རབས་གསར་བའི་དཔལ་ཡོན་ལག་ལེན་ལྟེ་གནས་ཀྲུའུ་རེན་གཅོད་པ་སྐྱབས་ཀྱིས་མདོ་འཛིན་མཛད།
རྫོང་རིག་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཀླུ་མཚོ་སྨན་གྱིས་༢༠༢༣ལོ་ཚུན་གྱི་ཀླུ་ཆུའི་རིག་རྩལ་ལས་དོན་སྐོར་གྱི་བྱ་བའི་སྙན་ཞུ་འབུལ་བཞིན་པ།
ཚོགས་ཐོག་ཏུ་རྫོང་རིག་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཀླུ་མཚོ་སྨན་གྱིས་༢༠༢༣ལོ་ཚུན་གྱི་ཀླུ་ཆུའི་རིག་རྩལ་ལས་དོན་སྐོར་གྱི་བྱ་བ་ཚང་མ་ཞིབ་དག་གསལ་གསུམ་གྱི་སྒོ་ནས་ཚོགས་འདུ་ལ་སྙན་ཞུ་ཕུལ། གཞན་པར་ལེན་མཐུན་ཚོགས་དང་། མཛེས་རྩལ་དང་ཡིག་གཟུགས་མཐུན་ཚོགས། རྩོམ་པ་པོ་མཐུན་ཚོགས། རོལ་མོ་མཐུན་ཚོགས། རྣམ་ཐར་དང་གླུ་གར་མཐུན་ཚོགས། རྩོམ་པ་པོའི་སྐུ་ཚབ་དང་བཅས་མཐུན་ཚོགས་དྲུག་གི་བྱ་བའི་ཆ་ནས་ལོ་གཅིག་རིང་གི་ཀླུ་ཆུའི་རིག་རྩལ་ལས་དོན་ཐད་གོང་རིམ་རྫོང་ཨུ་དང་རྫོང་སྲིད་གཞུང་། རྫོང་ཨུའི་དྲིལ་བསྒྲགས་པུའུ་སོགས་ཀྱི་ཡང་དག་མགོ་ཁྲིད་གནང་ཚུལ་དང་། བྱམས་བརྩེའི་ཐུགས་ཁུར་གནང་ཚུལ། རྫོང་རིག་གནས་ཡུལ་སྐོར་ཅུས། རྫོང་རིག་གནས་ཁང་སོགས་འབྲེལ་ཡོད་ལས་ཁུངས་སོ་སོས་རྒྱ་ཆེའི་རོགས་སྐྱོར་མཛད་ཚུལ། འཐབ་ཕྱོགས་སོ་སོ་ནས་ཆེ་འབྲིང་ཆུང་གསུམ་གྱི་གྲུབ་འབྲས་གསར་བ་ཐོབ་ཚུལ། དེང་ཕྱིན་གྱི་སྒྱུ་རྩལ་ལམ་བུའི་འཚོལ་རྟོག་དང་ལམ་བུ་གསར་གཏོད། དམིགས་སྔའི་དཀའ་ཁག མ་འོང་འཆར་གཞི་སོགས་ཀྱི་ཆ་ནས་གཅིག་རྗེས་གཉིས་མཐུད་ཀྱི་གཏམ་གླེང་སྣ་ཚོགས་རྒྱ་ཆེར་མཛད། ཁྱད་པར་དུ་ཁུལ་རིག་རྩལ་མཉམ་འབྲེལ་ལྷན་ཚོགས་ཀྱི་ཚོགས་གཙོ་ཀྲོའོ་ལིན་ཧོང་གིས་ཐོག་མར་ཀླུ་ཆུའི་ལོ་འདི་འགའི་རིག་རྩལ་ལས་དོན་དང་ཁྱད་པར་ཡིག་གཟུགས་དང་པར་ལེན་སོགས་ཀྱི་བྱ་བར་གདེངས་འཇོག་མཐོན་པོར་གནང་ཞིང་། གཙོ་འཛིན་ཞི་ཅིན་ཕིང་གི་རྒྱལ་ཡོངས་རིག་རྩལ་བྱ་བའི་གསུང་བཤད་གལ་ཆེན་གྱི་དགོངས་དོན་དང་། ཞིང་ཆེན་སྐབས་དྲུག་པའི་རིག་རྩལ་འཐུས་ཚོགས་ཆེན་མོའི་དགོངས་དོན་སོགས་གཞིར་བཟུང་ནས་རྫོང་ཡོངས་ཀྱི་རིག་རྩལ་མི་སྣ་གསོ་སྐྱོང་དང་། སྣ་མང་ཕུན་སུམ་ཚོགས་པའི་རིག་རྩལ་བྱེད་སྒོ་སྤེལ་བའི་བརྒྱུད་ལམ་དང་ཐབས་ཤེས། སྤྱི་ཚོགས་ལས་རིགས་དང་ཁུལ་དང་རྫོང་ཡོངས་ཀྱི་ལས་དོན་གལ་ཆེན་ལ་ཞབས་ཞུ་བསྒྲུབ་སྟངས། ཚོགས་མིའི་བསམ་བློའི་སློབ་གསོ་དང་སྤྱི་ཚོགས་ཀྱི་འགན་འཁྲིའི་འདུ་ཤེས་འཛུགས་གཉེར། དམིགས་སྔའི་དཀའ་ཁག་སེལ་ཐབས་བཅས་ཀྱི་ཆ་ནས་གྲོས་འདོན་དང་མཛུབ་སྟོན་གང་ལེགས་མཛད། གཞན་དེང་ཕྱིན་གྱི་བྱ་བའི་ཁྲོད་ང་ཚོས་བློ་མཐུན་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་དོན་ལག་ལེན་མཐར་ཕྱིན་བྱས་ནས་གོང་འོག་དཔུང་བ་མཉམ་གཤིབ་ཀྱིས་དཀའ་སྤྱད་འབད་བརྩོན་དང་། མཐུན་སྒྲིལ་གཅིག་རྟེན་བཅས་ཀྱི་བྱེད་ཐབས་སྣ་ཚོགས་ལ་བརྟེན་ནས་དེང་ཕྱིན་གྱི་བྱ་བ་མ་ལུས་རྒྱུ་སྤུས་མཐོ་པོའི་འཕེལ་རྒྱས་ཀྱི་ཕྱོགས་སུ་བསྐྱོད་དགོས་བའི་བླང་བྱ་ནན་མོ་བཏོན། དེར་མཐུད་དེ་རྩོམ་སྒྲིག་པ་ཕྱག་རྡོར་ཚེ་རིང་ལགས་ཀྱིས་ཁུལ་ཡོངས་ཀྱི་རྩོམ་པ་པོ་མཐུན་ཚོགས་ཀྱི་ལས་དོན་བསྒྲུབས་ཚུལ་དང་། ཁྱད་པར་ཀླུ་ཆུའི་རྩོམ་པ་པོ་མཐུན་ཚོགས་ཀྱི་བྱ་བའི་གྲུབ་འབྲས་ལ་ཕྱོགས་གསུམ་གྱི་སྤྱི་སྡོམ་དང་བསྔགས་བརྗོད་བྱས་པ་མ་ཟད། མ་འོངས་ལས་དོན་ལ་ཡང་ཐབས་འདོན་ཇུས་འདོན་གང་མང་གནང་།
《སྐལ་བཟང་མེ་ཏོག》དུས་དེབ་རྩོམ་སྒྲིག་ཁང་གི་ཀྲུའུ་རེན་གཞོན་པའམ། རྩོམ་སྒྲིག་པ། རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ་ཝང་ཞོའོ་ཀྲུང་གིས་གཏམ་བཤད་གནང་བཞིན་པ།
|
|
