སྐལ་བཟང་ཚེ་བརྟན།
སྐལ་བཟང་ཚེ་བརྟན་ལགས་ནི་སྤྱི་ལོ༡༩༧༧ལོར་མདོ་སྨད་ཀན་ལྷོ་ཀླུ་ཆུ་རྫོང་ཟམ་ཚ་གྲོང་བརྡལ་རྡོ་གཟུགས་མདོ་སྡེ་བ་ནས་སྐྱེས་ཤིང་།ཕ་ཡུལ་ཀླུ་ཆུ་ནས་སློབ་ཆུང་དང་སློབ་འབྲིང་སོགས་རིམ་པར་བརྒྱུད་དེ་༡༩༩༨ལོའི་ཟླ༧པར་ཀན་ལྷོ་བོད་རིགས་འབྲིང་རིམ་ཆེད་གཉེར་སློབ་གྲྭ་ནས་མཐར་ཕྱིན། ༡༩༩༨ལོའི་ཟླ༩བར་བྱ་བའི་ལས་གནས་དུ་ཞུགས་ཤིང་ད་ལྟ་ཀླུ་ཆུ་རྫོང་སློབ་གསོ་ཅུས་སུ་སྤྱིར་བཏང་གི་བྱ་བའི་ལས་འགན་ཙམ་གཉེར་གྱིན་ཡོད། སྤྱིར་ཆེད་ལས་དགེ་རྒན་ཡིན་མོད་ད་ལྟ་སྲིད་ཀྱི་ལས་ཀ་བསྒྲུབས་ཞོར་རང་ཉིད་ཀྱི་དགའ་ཕྱོགས་ལྟར་ཡིག་གཟུགས་སྒྱུ་རྩལ་གྱི་ལམ་ཁ་འདི་ཡང་ལུས་དང་གྲིབ་མ་བཞིན་འགྲོགས་མུས་སུ་ཡོད། ལྷག་པར་དུ་ཀན་ལྷོ་བོད་རིགས་འབྲིང་རིམ་སློབ་གྲྭ་ནས་བོད་ཡུལ་ན་མིང་དུ་གྲགས་པའི་ཡིག་མཁན་དྲུང་ཡིག་སྨོན་ལམ་རྒྱ་མཚོ་ཚང་གི་དངོས་སློབ་རྒན་རྡོར་བྷ་མཆོག་གི་སློབ་བུར་གྱུར་ནས་དབུ་ཅན་དང་དབུ་མེད་སོགས་ཡིག་གཟུགས་རིགས་མི་ཉུང་བ་ཞིག་ལ་གཞུང་ལུགས་དང་བཅས་པའི་སྒོ་ནས་སློབ་སྦྱོང་བྱེད་པའི་སྐལ་བ་ལྡན།༢༠༡༥ལོའི་ཟླ་མཇུག་ཙམ་ནས་བཟུང་གློག་ཀླད་རྩིས་འཁོར་ཡིག་གཟུགས་སྒྲིག་བཟོ་དང་ཞིབ་འཇུག་བྱེད་པའི་ཞོར་དུ་ཡིག་གཟུགས་སྣ་ཚོགས་ལ་སྦྱང་བ་བྱས། ད་སྔའི་བར་དུ་ཁོས་རང་ཉིད་ཀྱི་ལག་ལེན་དང་ཉམས་མྱོང་བརྒྱུད་དེ་གློག་ཀླད་དམ་རྩིས་འཁོར་ཡིག་གཟུགས་སྟེ་རྒན་ཟམ་ཚ་ཚེ་རིང་དོན་གྲུབ་ལགས་ཀྱིས་མིང་འདོགས་མཛད་པའི་གཡུ་ཁྲིའི་ཡིག་གཟུགས་ཞེས་དབུ་ཅན་རིགས་གསུམ་དང་།འབྲི་ཚ་རིགས་གསུམ། མཛེས་བྲིས་རིགས་གཉིས། ད་དུང་ལྕགས་སྨྱུག་གི་ཡིག་གཟུགས་རིགས་གཅིག་བཅས་བསྡོམས་པས་ཡིག་མཛོད་རིགས་དགུ་ཙམ་སྒྲིག་བཟོ་བྱས་ཡོད་ཅིང་།ད་ལྟ་རིན་མེད་ངང་དྲ་གནས་སོ་སོར་འགྲེམ་སྤེལ་བྱས་ཡོད་པ་དེ་བཞིན་ནོ། །
ད་ལྟ་ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་ཀྱི་ཚོགས་མི་དང་།ཁུལ་རིམ་པའི་དངོས་པོ་མ་ཡིན་པའི་ཤུལ་བཞག་རིག་གནས་ཀྱི་རྒྱུད་འཛིན་པ་དང་། ཀླུ་ཆུ་རྫོང་མཛེས་རྩལ་དང་ཡིག་མཁན་མཐུན་ཚོགས་ཀྱི་དྲུང་ཡིག་གི་འགན་བཞེས་ཡོད།གཞན་བརྩམས་ཆོས་མི་ཉུང་བ་ཞིག་སྔ་ཕྱིར་<སྦྲང་ཆར>དང<ཟླ་ཟེར> <ཀན་ལྷོའི་འཕེལ་རྒྱས><གཟའ་མཇུག་ཚགས་པར>སོགས་དུས་དེབ་མང་པོའི་སྟེང་བཀོད་པ་དང་། ༢༠༡༩ལོར་པེ་ཅིན་དུ་ཚོགས་པའི“ཀན་ལྷོ་བོད་རིགས་རང་་སྐྱོང་ཁུལ་མི་རིགས་ཀྱི་ཚད་ལྡན་ཡིག་ཆ་དང་ཡིག་གཟུགས་བརྩམས་ཆོས་འགྲེམ་སྟོན”སྟེང་དུ་ཁོའི་བརྩམས་ཆོས་གཉིས་འགྲེམ་སྟོན་ལ་ཞུགས་པ་མ་ཟད།ད་དུང་རྒྱལ་ཁབ་རིམ་པའི་མི་རིགས་དཔེ་མཛོད་ཁང་དུ་ཉར་ཚགས་བྱས་ཡོད། དེ་ལས་གཞན་ད་དུང་དཔལ་དོན་གྲུབ་རྒྱལ་གྱི་《རྒྱལ་སྲིད་སྣ་བདུན་ལ་སྦྱར་བའི་འབེལ་གཏམ》སྣ་རིང་མ་གཅིག་དང་། 《སྤྲིན་གྱི་ཕོ་ཉ》ཆ་ཚང་གཅིག 《ས་སྐྱ་ལེགས་བཤད》སྣ་རིང་མ་གཅིག གཞན་ལེགས་བཤད་དང་བསླབ་བྱ། སྔོན་བྱོན་མཁས་པའི་གསུང་དུམ་སོགས་སྡོམ་པས་བརྩམས་ཆོས༢༠༠ལྷག་དང་། ལྷག་པར་དུ་དབུ་ཅན་ཡིག་གཟུགས་ཀྱི་ཀ་དཔེ《དབུ་ཅན་ཡིག་གཟུགས་མཐོང་བ་ཀུན་སྨོན》ཞེས་པ་གཅིག་དང་། སློབ་ཆུང་སློབ་མར་འཚམ་པའི་《ཡིག་གཟུགས་འབྲི་སྦྱོང་ལག་བྲིས་མ》སྟོད་སྨད་ཆ་སྡོམ་པས་དེབ་བཅུ་གཉིས་ཀྱི་བདག་ཉིད་ཅན་ཉེ་ཆར་ཀན་སུའུ་མི་རིགས་དཔེ་བསྐྲུན་ཁང་ནས་དཔར་བསྐྲུན་བྱས་དེ་ད་ལྟ་ཚོང་ར་སོ་སོར་བཀྲམ་ཡོད་དོ།།
|
|
