རྡོར་བྷ། དངོས་མིང་ལ་ཆོ་ཚང་རྡོ་རྗེ་རྣམ་རྒྱལ་ཟེར། མཐོ་རིམ་འཆད་ཁྲིད་པ།(སློབ་དཔོན་གཞོན་པ།) རྒྱུད་པ་ཨ་མཆོག་གི་ཡིན་ལ། ༡༩༦༦ལོར་བླ་བྲང་བཀྲ་ཤིས་འཁྱིལ་གྱི་ཉེ་བའི་སར་དཔོན་ཚང་ཞེས་པ་ནས་དལ་རྟེན་རྙེད། ཐེམ་སྐས་རིམ་འཛེག་བཞིན་སློབ་གྲྭ་ཆུང་འབྲིང་ཆེ་གསུམ་ལེགས་པར་ཐོན་ཡོད། དེ་ལས་ཅུང་གསལ་བོར་ཞུ་འདོད་པ་ཞིག་ནི། ༡༩༨༣ལོར་བསང་ཆུ་རྫོང་བོད་རིགས་སློབ་འབྲིང་གི་རབས་དང་པོའི་སློབ་ཐོན་པ་ཡིན་པའི་ཐོག་ནས་ཀན་ལྷོ་ཁུལ་མི་རིགས་སློབ་གྲྭར་རྒྱུགས་ཚད་ལོན། དེ་གར་སློབ་ཡུན་ལོ་བཞིའི་ལུགས་སུ་བྱས་པའི་འགོ་མར་གྱུར་ཏེ་སློབ་གཉེར་བྱེད་སྐབས། མཁས་དབང་སྨོན་ལམ་རྒྱ་མཚོ་མཆོག་དང་མཇལ་ཞིང་བསྟེན་པའི་སྐལ་བཟང་ཐོབ་པ་དང་། དེ་ཡང་ཕྲན་གྱི་མི་ཐོག་སྔ་མའི་འབྲེལ་བཟང་གི་མཐུ་ལས། མཁས་དབང་དམ་པ་ཁོང་གི་མདུན་ནས་ཧ་ལམ་ལོ་ཡི་བགྲང་བྱ་བཞིའི་རིང་ལ་དབུ་ ཅན་དབུ་མེད་ལན་ཝར་དང་བཅས་པ་ལ་སྔོན་གྱི་ཕྱག་ལེན་ཇི་བཞིན་ཡི་གེའི་ཐིག་རྩ་དང་། ཁུངས་ལུང་། རིགས་པ་སོགས་ལུ་གུ་ལག་སྐྱེས་ལྟ་བུར་ཐུགས་བརྩེ་བས་རྗེས་སུ་བཟུང་ཡོད།
གཞན་ཡང་མཁས་དབང་དམ་པ་གང་གི་གསུང་བཀོད་བཞིན་དུ། ༡༩༨༩ལོར་བླ་བྲང་བཀྲ་ཤིས་འཁྱིལ་གྱི་རྩེ་སློབ་གྲྭ་ནས་ཁོང་དང་ཡིག་རྒྱུད་གཅིག་པའི་ཆོས་གྲོགས་སུ་གྱུར་བ་དགེ་བཤེས་རྡོ་རམས་པ་རྗེ་བཀྲ་ཤིས་རྒྱ་མཚོ་དང་། རྗེ་ཡེ་ཤེས་རྒྱ་མཚོའི་མདུན་ནས་ཀྱང་ཡིག་གཟུགས་ཀྱི་ཕྱོགས་སུ་སྦྱངས་བརྩོན་བྱས་མྱོང་། ད་ལྟ་ཀན་ལྷོ་ཁུལ་བོད་རིགས་སྣ་འཛོམས་ཆེད་གཉེར་སློབ་གྲྭ་རུ་དགེ་རྒན་གྱི་ལས་ཀ་གཉེར་མུས་ཡིན།
གཞན་ཀན་ལྷོ་ཁུལ་ཡིག་གཟུགས་མཐུན་ཚོགས་ཀྱི་ཚོགས་གཙོ་གཞོན་པ་དང་ཀན་ལྷོ་ཁུལ་ལས་བཟོ་བའི་ཡིག་གཟུགས་དང་རི་མོའི་མཐུན་འབྲེལ་ལྷན་ཚོགས་ཀྱི་ཚོགས་གཙོ་གཞོན་པ་སོགས་ཀྱི་སྤྱི་ཚོགས་ལས་འགན་གཅིག་ལྕོགས་སུ་བཞེས་ཡོད་པ་བཅས་སོ།།
|
|
