༄༅། །འདྲེན་འཁྱུག་མན་ངག་བཞིན་འབྲི་བའི་བརྙན་རིས།
སྤྱིར་གཞུང་བྲིས་འཁྱུག་ཡིག་ནི་སྨྱུག་རིས་མང་པོ་མི་དགོས་པར་ཡི་གེ་ཕལ་ཆེ་བ་སྨྱུག་རིས་གཅིག་དང་གཉིས་ཀྱིས་བྲི་ཐུབ་པའི་མགྱོགས་བྲིས་ཀྱི་ཡིག་གཟུགས་ཁྱད་དུ་འཕགས་པ་ཞིག་ཡིན། འཁྱུག་ཆེན་ནམ་འདྲེན་འཁྱུག་ཅེས་པ་ནི་སྨྱུག་རིས་ཀྱི་འགྲོས་བཞིན་ཡི་གེ་སྔ་མས་ཕྱི་མ་འདྲེན་པའམ། ཡི་གེ་སྔ་ཕྱི་གཉིས་སྦྲེལ་ནས་འབྲི་བ་དཔེར་ན། སྔོན་འཇུག་གིས་མིང་གཞི་འདྲེན་པའམ། མིང་གཞིས་རྗེས་འཇུག་འདྲེན་པ། རྗེས་འཇུག་གིས་ཚེག་ཐུང་དང་ཡང་འཇུག་གང་རུང་འདྲེན་པ། དབྱངས་ཀྱིས་ཚེག་ཐུང་དང་རྗེས་འཇུག་འདྲེན་པ། དེ་བཞིན་ཚེག་ཁྱིམ་གོང་མའི་ཚེག་གིས་ཕྱི་མའི་ཡི་གེ་འདྲེན་པས་ན་འདྲེན་འཁྱུག་ཅེས་ཟེར། དེ་ནི་ཡི་གེ་སྔ་ཕྱི་སྦྲེལ་བའམ་མཐུད་ནས་འབྲི་བའི་དོན་ཡང་ཡིན། དེ་ལྟར་སྦྲེལ་བས་ཡི་གེ་མགྱོགས་ཇུས་ལ་ཕན་ཐོགས་ཆེན་པོ་ཡོད་པས་རྒྱུན་གཏན་བརྗེད་ཐོ་ཟིན་བྲིས་སོགས་ལ་མེད་དུ་མི་རུང་བའི་ཡིག་གཟུགས་སྤྱོད་གོ་ཆེ་ཤོས་ཤིག་ཡིན། འདི་ནི་བྲིས་ཀྱི་རྩལ་ལ་ཤིན་ཏུ་བྱང་གོམས་ཅན་གྱིས་འབྲི་བ་ལས། འཁྱུག་མ་ཚུགས་དང་འཁྱུག་ཡིག་ལ་བྱང་གོམས་མེད་པ་དག་གིས་འབྲི་ན་ཡིག་རྩ་འཐོར་ཉེན་ཆེ་བས་ཐོག་མར་འདྲེན་འཁྱུག་འདི་འབྲི་མི་རུང་བ་ཡིན།
འདྲེན་འཁྱུག་དེ་ཡང་ཐོག་མར་ནན་ཏན་གྱིས་ཡིག་འབྲུ་རེ་རེ་བཞིན་སློབ་དཔོན་གྱི་བྲིས་རྒྱུན་བཞིན་སྦྱོང་དགོས་པ་ལས། འཁྱུག་ཡིག་མགྱོགས་བྲིས་ཡིན་པ་རྒྱུ་མཚན་བྱས་ནས་གང་འདོད་གང་མགྱོགས་སྦྲེལ་ནས་འབྲི་མི་རུང་། དེ་ཡང་འདྲེན་འཁྱུག་གི་རིགས་པའི་གཞུང་ལུགས་དང་། མན་ངག་བཞིན་འདྲེན་རུང་བའི་སྨྱུག་རིས་ཀྱིས་འདྲེན་པ་ལས། འདྲེན་རུང་མིན་ལ་མ་ལྟོས་པར་བཙན་གྱིས་འདྲེན་པའམ། གང་འདོད་ཀྱིས་འདྲེན་ན་འདྲེན་ལོག་ཏུ་གྱུར་ནས་དོན་མི་རྟོགས་པའམ། ཐ་ན་བརྡ་སྤྲོད་ཀྱི་ནུས་པ་ཉམས་འགྲོ་བས་ངེས་པར་དུ་གཟབ་དགོས་པ་མ་ཟད། གལ་ཆེ་བའི་དོན་དང་། ཚིག་བཙན་པའི་གཞུང་ཡིག །གན་རྒྱའི་རིགས་སོགས་ལ་བརྡ་མ་འཕྲོད་ནས་དོན་ལ་འགལ་འཛོལ་འགྲོ་ཉེན་ཆེ་བས་འདྲེན་འཁྱུག་སྤྱོད་མི་རུང་ལ། ཞུ་ཡིག་དང་སྐྱབས་ཐོ་སོགས་ལ་འདྲེན་འཁྱུག་འབྲི་བ་མ་གུས་པར་འགྲོ་བས་རྩ་བ་ནས་འབྲི་མི་རུང་བའི་གནད་འདི་ཡང་ངེས་པར་དུ་ཤེས་དགོས་སོ། །ཁ་སྤུ་ཅན་གྱིས།
བོད་ཀྱི་ཡིག་མཁན་ཆེན་མོ་བཀྲ་ཐང་བསྟན་པའི་ཉི་མས་མཛད་པའི་འདྲེན་འཁྱུག་མན་ངག་དབུས་ཀྱི་ཡིག་མཁན་ཁ་སྤུ་ཅན་གྱིས་བརྙན་ལམ་ནས་འགྲེལ་བ།
གངས་ཅན་ཡིག་གཟུགས་རིག་གཞུང་དང་ལག་ལེན་བསྡེབས་ཏེ་བསྟན་པ་གཡུ་ཁྲིའི་ཞལ་ལུང་ལས། འདྲེན་འཁྱུག་འབྲི་ཚུལ་དང་སྤྱོད་སྟངས་སྐོར་ལ་འདི་ལྟར་གསུངས་སྟེ།
བརྙན། ཡིག་མཁན་ཁ་སྤུ་ཅན།
སྒྲིག་སྦྱོར། ཀྲུང་གོའི་བོད་ཀྱི་ཡིག་གཟུགས་དྲ་བའི་བརྙན་སྦྱོར་ལྟེ་གནས།
རྩོམ་སྒྲིག་པ། གཅན་རང་བསད།
སྤྱི་ཁྱབ་རྩོམ་སྒྲིག་པ། ཧེ་རམ་པ།
|
|
