བསམ་འཕེལ་ནོར་བུ།
ཆུང་རྒྱུད་བྲིས་པ་བསམ་འཕེལ་ནོར་བུ་ནི་སྤྱི་ལོ་༡༩༩༨ལོར་བོད་ལྗོངས་ཆབ་མདོ་གྲོང་ཁྱེར་ཁྱུང་པོ་སྟེང་ཆེན་རྫོང་ཟམ་ཞིག་གྲོང་ཚོའི་ཆུང་རྒྱུད་ཚང་དུ་སྐྱེས། ཆུང་དུས་རང་ཡུལ་གྱི་སློབ་ཆུང་འགྲིམས། དེའི་རྗེས་སྤྱི་ལོ་༢༠༡༠ལོར་ནས་ཁོང་གི་ཡབ་ཆུང་རྒྱུད་ཚེ་དབང་མཐར་ཕྱིན་གྱི་མདུན་ནས་ཡིག་གཟུགས་ལ་ཆེད་སྦྱངས་ཧུར་བརྩོན་བྱས་མཐར་སྤྱི་ལོ་༢༠༡༣ལོར་ཁྱུང་ཡུལ་གྱི་རྒྱལ་བའི་བཀའ་འགྱུར་གསེར་བྲིས་མའི་ཡིག་མཁན་གྱི་གྲལ་དུ་ཚུད། ད་དུང་རང་ཉིད་ཀྱི་ཡིག་གཟུགས་གོང་འཕེལ་གཏོང་ཐབས་ལ་འབད་པ་ལྷོད་མ་མྱོང་ཞིང་། དུས་དང་རྣམ་པ་ཀུན་ཏུ་ཕ་རྒན་ཚེ་དབང་མཐར་ཕྱིན་གྱིས་སློབ་སྟོན་ཇི་ལྟ་བ་བཞིན་དུ་ཉམས་སུ་ལེན་གང་ཐུབ་བྱས། སྤྱི་ལོ་༢༠༡༨ལོར་༼ཡིག་གཟུགས་ཀུན་བཏུས་གསེར་ཐང་ཆེན་མོ༽ཞེས་པ་འཛམ་གླིང་ཅི་ཉི་སའི་ཟིན་ཐོར་ཚུད་པ་དེ་བཞེངས་སྐབས་ཡིག་མཁན་ཚད་ལྡན་གྱི་གྲལ་དུ་བདམས་ཐོན་བྱུང་། ད་ལྟ་ནི་བོད་ལྗོངས་ཆབ་མདོ་གྲོང་ཁྱེར་ཡིག་གཟུགས་མཛེས་རྩལ་མཁས་ཅན་ལྷན་ཚོགས་ཀྱི་ཨུ་ཡོན་དང་། ཁྱུང་པོ་རྩེ་དྲུག་དགོན་པའི་བཀའ་འགྱུར་གསེར་བྲིས་གླིང་གི་རྩེར་སོན་གསེར་བྲིས་པ་ཡིན། དམིགས་གསལ་ཞུ་བྱ་ནི་ཁོང་ཉིད་བློ་བརྟན་ཞིང་སེམས་རྣལ་དུ་ཕབས་ཐུབ་པའི་མི་ཞིག་ཡིན་པས། ཁོས་གསུང་རབ་གང་བྲིས་ཀྱང་དག་སྣང་སྦྱང་བ་དང་གཟབ་ཚུལ་ལེགས་པ། དང་དོད་ཆེ་བས། ཡིག་འབྲུ་རེ་རེའི་ལྷུ་ཚུགས་ཀྱི་ཉམས་འགྱུར་ལེགས་ཤིང་། ཆད་ལྷག་མེད་པ་སོགས་ཀྱི་དགེ་མཚན་ཤིན་ཏུ་མང་། དུས་རྒྱུན་གསུང་རབ་རིན་པོ་ཆེ་གསེར་བྲིས་དངུལ་བྲིས་ཀྱི་ལས་ལ་འབད་བརྩོན་ཆུ་བོའི་རྒྱུན་ལྟར་སྐྱོང་བཞིན་ཡོད་པ་ལགས་སོ།
|
|
