སངས་རྒྱས་སྐྱབས།
སྤྱི་ལོ༡༩༩༨ལོར་མདོ་སྨད་ཀླུ་ཆའི་ཟམ་ཚ་གྲོང་རྡལ་དུ་ཞིང་བའི་ཁྱིམ་ཚང་ཕལ་བ་ཞིག་ནས་སྐྱེས། ༢༠༡༢ལོར་ཀླུ་ཆུ་རྫོང་བོད་རིགས་སློབ་འབྲིང་དུ་སློབ་གཉེར་ལ་གཞོལ་བའི་བར་སྐབས་སུ། བོད་ཀྱི་ཡིག་གཟུགས་སྒྱུ་རྩལ་འདི་ཉིད་ལ་ཐོག་མར་འབྲེལ་འདྲིས་བྱེད་པའི་གོ་སྐབས་བྱུང་བ་དང་། མཐོ་འབྲིང་སྐབས་སུ་རང་ཉིད་ཀྱི་དགའ་མོས་དབང་གིས་ཡིག་གཟུགས་འབྲི་སྦྱོང་རྒྱུན་འཁྱོངས་དང་འབད་འབུངས་བྱས་པ་དང་། འཛིན་གྲྭའི་འཛིན་བདག་གི་རྒྱབ་སྐྱོར་དང་དགེ་རྒན་བསོད་ནམས་རབ་བརྟན་ལགས་ཀྱི་མཛུབ་སྟོན་གྱི་བཀའ་དྲིན་ལས་སློབ་རའི་ཡིག་གཟུགས་འགྲན་བསྡུར་གྱི་བྱ་དགའ་དུ་མ་དང་ཀན་ལྷོ་ཁུལ་ཆུང་འབྲིང་སློབ་མའི་ཡིག་གཟུགས་འགྲན་བསྡུར་ཁྲོད་དབུ་ཅན་གྱི་ཨང་དང་པོ་དང་དབུ་མེད་ཀྱི་ཨང་གསུམ་པའི་མིང་རྟགས་སོགས་བླངས་མྱོང་། ༢༠༡༨ལོར་ཀན་སུའུ་མི་རིགས་དགེ་འོས་སློབ་གྲྭ་ཆེན་མོར་རྒྱུགས་འཕྲོད་ནས་རི་མོའི་སྡེ་ཁག་ནས་མུ་མཐུད་དུ་བོད་རིགས་རང་ཉིད་ཀྱི་ཁྱད་དུ་མཚར་བའི་སྒྱུ་རྩལ་ཇུས་འགོད་དང་ཐང་གའི་ཆེད་ལས་གཉེར་བའི་ཞོར་དུ་བོད་ཀྱི་ཡིག་གཟུགས་སྒྱུ་རྩལ་གྱི་དགའ་ཕྱོགས་འདི་ལའང་སྔར་ལས་མང་པའི་སློབ་གསེང་གི་དུས་ཚོད་བེད་སྤྱད་ནས་བརྩོན་པ་ཆུ་བོའི་རྒྱུན་བཞིན་ཧུར་ཐག་བྱས་པ་དང་། ༢༠༡༩ལོར་ཀླུ་ཆུ་རྫོང་ཡིག་གཟུགས་མཐུན་ཚོགས་སུ་ཞུགས། ཁྱད་པར་དགོན་སྡེ་ཆེན་མོ་བླ་བྲང་བཀྲ་ཤིས་འཁྱིལ་གྱི་དྲུང་ཡིག་ཆེན་མོ་ཨ་ཁུ་སྨོན་ལམ་རྒྱ་མཚོ་ཚང་གི་དངོས་སློབ་རྒན་སངས་རྒྱས་བཀྲ་ཤིས་མཆོག་གི་དྲི་མེད་ཁུངས་བཙུན་གྱི་ཕྱག་རྒྱུན་ལ་མཇལ་བའི་སྐལ་བ་བྱུང་བ་དང་། ༢༠༢༡ལོར་ཀན་ལྷོ་ཁུལ་ཡིག་གཟུགས་མཐུན་ཚོགས་སུ་ཞུགས་ཅིང་། རྒན་ལགས་ཀྱིས་ལྷག་བསམ་ཟོལ་མེད་ངང་དཀའ་ལས་སྐུ་ཚེགས་ལ་མི་འཛེམ་པར་ཡིག་གཟུགས་དང་འཚོ་བ་སོགས་ཕྱོགས་གང་ཅིའི་ཐད་ནས་ཁྲིད་སྟོན་བླ་ལྷག་བྱས་པའི་གྲུབ་འབྲས་སུ་རྒྱལ་ཡོངས་བོད་ཀྱི་ཡིག་གཟུགས་འགྲན་བསྡུར་ཁྲོད་ཕུལ་བྱུང་བྱ་དགའ་ཐོབ་མྱོང་ལ་རང་སློབ་གྲྭའི་འགྲན་བསྡུར་སྣ་ཚོགས་ཁྲོད་བྱ་དགའ་རབ་དང་རིམ་པ་མང་དུ་བླངས་མྱོང་བ་རེད། ད་ལྟ་སློབ་ཆེན་ལོ་རིམ་བཞི་བར་འགྲིམ་པའི་ན་གཞོན་པ་སངས་རྒྱས་སྐྱབས་ཀྱིས་བོད་ཀྱི་ཡིག་གཟུགས་དང་ཐང་གའི་སྒྱུ་རྩལ་འདི་ཉིད་འཛིན་སྐྱོང་སྤེལ་གསུམ་བྱེད་པའི་དམ་བཅའ་བརྟན་པོ་སྙིང་ལ་བཅིངས་ནས་ཁ་ཞེ་གཉིས་མེད་ཀྱིས་འབད་བརྩོན་བྱེད་བཞིན་མཆིས་སོ།།
|
|
