ཆབ་མདོ་གྲོང་ཁྱེར་མཛོ་སྒང་རྫོང་ཐེམ་ཐོག་གྲོང་སློབ་ཆུང་གིས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་དྲུག་པ་བསུ་བའི་ཡིག་གཟུགས་འགྲན་སྡུར་སྤེལ།
བོད་ཀྱི་ཡིག་གཟུགས་དུས་ཆེན་ལ་ཕུལ་བའི་ལེགས་སྐྱེས་ཉེར་བཞི་བ།
རྩོམ་པ་ལེགས་ཀྱང་སུག་བྲིས་མི་འབྱོར་ན།དཔའ་རྩལ་ཆེ་བའི་དཔའ་བོ་ལག་རྡུམ་འདྲ།ཞེས་གསུངས་པ་ནང་བཞིན་བོད་ཀྱི་ཡིག་གཟུགས་ཀྱིས་བོད་ཀྱི་རིག་གནས་ཁྲོད་དུ་གོ་གནས་གལ་ཆེན་བཟུང་ཡོད་པས།བོད་ཀྱི་ཡིག་གཟུགས་སྒྱུ་རྩལ་དར་སྤེལ་དང་གཟུགས་འདུས་ཤུལ་བཞག་རིག་གནས་རྒྱུན་འཛིན་བྱེད་པའི་ཆེད་དུ།ཆབ་མདོ་གྲོང་ཁྱེར་མཛོ་སྒང་རྫོང་ཐེམ་ཐོག་གྲོང་སློབ་ཆུང་གི་བོད་ཡིག་དགའ་མོས་ཚོགས་ཆུང་གི་ཚོགས་གཙོ་ཕུ་རྣམ་དང་བཀྲ་ཤིས་ཆོས་རྒྱལ་གཉིས་གཙོ་བྱས་པའི་སློབ་གྲྭའི་མགོ་ཁྲིད་དག་གི་ཐུགས་ཁུར་དང་རྒྱབ་སྐྱོར་འོག སྤྱི་ལོ་༢༠༢༢ལོའི་ཟླ་༤བའི་ཚེས་༢༩ཉིན་སློབ་གྲྭའི་ལུས་རྩལ་ཐང་ཆེན་དུ། རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་དྲུག་པ་བསུ་བའི་ཡིག་གཟུགས་འགྲན་སྡུར་གྱི་བྱ་འགུལ་སྤེལ།
ཐེངས་འདིར་ཐེམ་ཐོག་གྲོང་ཆུང་གི་སློབ་གཙོ་སྤན་རྡོར་ལགས་དང་བོད་ཡིག་དགེ་རྒན་རྣམས་འགྲན་སྡུར་གྱི་ཡུལ་དངོས་སུ་འབྱོར་ནས་བྱ་འགུལ་གྱི་ཐོག་མཐའ་བར་གསུམ་དུ་རང་འགན་ལེགས་བསྒྲུབས་བྱས།
བྱ་འགུལ་འདིའི་ཁ་གཏད་ཡུལ་ནི་བོད་ཡིག་དགའ་མོས་ཚོགས་ཚུང་གི་སློབ་མ་ཡོངས་དང་བོད་སྐད་ཡིག་གི་དགེ་རྒན་ཡོངས་ཡིན་ལ་བསྡོམས་པས་བྲིས་པ་ལེགས་པའི་དགེ་སློབ་༣༠ལྷག་འགྲན་སྡུར་དུ་ཞུགས།
སློབ་གྲྭའི་མགོ་ཁྲིད་དག་གིས་བྱ་དགའ་ཐོབ་མཁན་གྱི་དགེ་སློབ་རྣམས་ལ་དགའ་ཕྱོགས་སྐྱེད་སྲིང་དང་སྐུལ་འདེད་ཀྱི་ཚུལ་དུ་རིམ་པ་བཞིན་བྱ་དགའ་གནང་།
མཐར་དགེན་ཕུར་རྣམ་ལགས་ཀྱིས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་གྱི་བྱུང་བ་རགས་ཙམ་ངོ་སྤྲོད་དང་སློབ་གྲྭའི་དགེ་སློབ་ཡོངས་ཀྱིས་ཡིག་གཟུགས་བརྩམས་ཆོས་ལ་མྱོང་རོལ་བྱས་པ་བརྒྱུད་ནས་བྱ་འགུལ་ཡོངས་སུ་མཇུག་བསྡུས།
|
|
