ཀླུ་ཆུས་བོད་ཀྱི་ཡིག་གཟུགས་དུས་ཆེན་འདི་ལྟར་བསུས།
བོད་ཀྱི་ཡིག་གཟུགས་དུས་ཆེན་ལ་ཕུལ་བའི་ལེགས་སྐྱེས་ཉེར་གཉིས་པ།
ཏང་གི་ཚོགས་ཆེན་ཐེངས་ཉི་ཤུ་བར་བསུ་མ་དང་མི་རིགས་ཀྱི་ཕུལ་བྱུང་རིགས་གནས་རྒྱུན་འཛིན་དར་སྤེལ་གཏོང་ཆེད། ཟླ༤པའི་ཚེས་༣༠ཉིན། ཀླུ་ཆུ་རྫོང་མཛེས་རྩལ་ཡིག་མཁན་མཐུན་ཚོགས་ཀྱིས་རྒྱལ་ཡོངས་བོད་ཀྱི་ཡིག་གཟུགས་ཉིན་མོ་དང་སྐབས་གཉིས་པའི་ཀླུ་ཆུའི་ཡིག་གཟུགས་ཀྱི་བཞུགས་མོལ་ཚོགས་འདུ་རྫོང་སྲིད་དོན་ལྟེ་བའི་ལྔ་ཐོག་ནས་ཚོགས།
བགྲོ་གླེང་ཚོགས་འདུའི་ཡུལ་དངོས།
བཞུགས་མོལ་ཚོགས་འདུའི་སྟེང་། མཐུན་ཚོགས་ཀྱིས་ལོ་གཅིག་རིང་གི་ལས་དོན་གནས་ཚུལ་དང་། བྱ་བའི་གནད་ས། ཐབས་ལམ་འཚོལ་ཞིབ་སོགས་ཀྱི་ཐད་ནས་སྤྱི་སྡོམ་དང་། དེང་ཕྱིན་གྱི་བྱ་བའི་ཆ་ལ་གྲོས་བསྡུར་བྱས།
ཚོགས་ཞུགས་མི་སྣ་རེ་རེ་ནས་རང་སོ་སོའི་ཡིག་གཟུགས་འབྲི་སྦྱོང་དང་བརྩམས་ཆོས་གསར་རྩོམ་ཁྲོད་ཀྱི་གནས་ཚུལ་དང་འབྲེལ་ནས་ཡིག་གཟུགས་དར་སྤེལ་གཏོང་བ་དང་། མཐུན་ཚོགས་ཀྱི་ལས་དོན་རྒྱ་ཆེར་གཏོང་ཚུལ་སོགས་དང་། ཡིག་གཟུགས་སྒྱུ་རྩལ་གྱི་འཛིན་སྐྱོང་སྤེལ་གསུམ་མམ། སྒྱུ་རྩལ་གྱི་རོ་བཅུད་འཚོལ་ཞིབ་བཅས་ཀྱི་ཆ་ནས་ཆུ་ཚོད་གསུམ་ལྷག་ལ་བགྲོ་གླེང་ཕུན་སུམ་ཚོགས་པ་བྱས།
ཚོགས་འདུ་གྲོལ་རྗེས། ཚོགས་ཞུགས་མི་སྣས་མཐུན་ཚོགས་ཀྱིས་གཅིག་གྱུར་བཀོད་སྒྲིག་བྱས་པའི་ཡིག་གཟུགས་ལས་བྱར་མྱོང་རོལ་དང་དཔྱད་བརྗོད་གནང་པ་མ་ཟད། ཡུལ་དངོས་ནས་བྲིས་རྩལ་ཕུལ་ནས་དུས་ཆེན་ལ་མཆོད་བསྟོད་གནང་།
|
|
