བཞག་པ་འཆི་མེད་ཚེ་བརྟན་གྱིས་བོད་ཀྱི་ཡིག་གཟུགས་དུས་ཆེན་ལ་ལེགས་སྐྱེས་འདི་འདྲ་ཕུལ་ཡོད།
བོད་ཀྱི་ཡིག་གཟུགས་དུས་ཆེན་ལ་ཕུལ་བའི་ལེགས་སྐྱེས་བཅོ་བརྒྱད་པ།
བཞག་པ་འཆི་མེད་ཚེ་བརྟན་ནི་དཀར་མཛེས་ཁུལ་བོད་ཡིག་ཡིག་གཟུགས་མཐུན་ཚོགས་ཀྱི་ཚོགས་མི་དང་། ལི་ཐང་རྫོང་ཡིག་གཟུགས་མཐུན་ཚོགས་ཀྱི་ཚོགས་མི།སི་ཁྲོན་ཞིང་ཆེན་བོད་ཡིག་སློབ་གྲྭའི་ཡིག་གཟུགས་མཐུན་ཚོགས་ཀྱི་ཚོགས་གཙོ་བཅས་ཀྱི་འགན་ཁུར་ཡོད།༢༠༠༢ལོར་སི་ཁྲོན•ལི་ཐང་དུ་སྐྱེས།ཆུང་དུས་ནས་ཡིག་གཟུགས་ལ་དགའ་པོ་ཡོད་པས་ཡིག་གཟུགས་སྒྱུ་རྩལ་ནི་འཚོ་བའི་ཐད་ཀྱི་དགའ་ཕྱོགས་དང་དོན་གཉེར་བྱ་དགོས་པའི་བྱ་གཞག་ཅིག་ལ་བརྩི་གི་ཡོད། ཁོང་དམའ་འབྲིང་སྐབས་ལི་ཐང་རྫོང་སློབ་འབྲིང་གི་རྒན་བློ་བཟང་ཚེ་རིང་དང་ཡེ་ཤེས་རྣམ་རྒྱལ་གཉིས་ཀྱིས་མཛུབ་སྟོན་དང་རང་གི་འབད་བ་ལྷོད་མེད་ཀྱིས་བློ་སྒོ་འབྱེད་པ་དང་།རིམ་བཞིན་བོད་ཀྱི་ཡིག་གཟུགས་སྣ་མང་ལ་སྦྱོང་པ་ལྷོད་མེད་བྱས། དམའ་འབྲིང་མཐར་ཕྱིན་རྗེས།སི་ཁྲོན་ཞིང་ཆེན་བོད་ཡིག་སློབ་གྲྭར་རྒྱུགས་འཕྲོད་ནས་སློབ་གྲྭ་དེར་ཁོར་ཡུག་གི་མཐུན་རྐྱེན་དང་དགེ་རྒན་གྱི་མཐུན་རྐྱེན་ཆ་འཛོམས་ཡིན་བས།རང་ཉིད་ཀྱིས་བོད་ཡིག་ཡིག་གཟུགས་ལ་དགའ་ཞེན་དང་དོན་གཉེར་བྱེད་འདོད་ཀྱི་འདུན་པ་བོར་མ་མྱོང་ལ་སྔར་བཞིན་སློབ་གྲྭར་དགེ་རྒན་དཔལ་བསྡུས་དང་།དགེ་རྒན་ཀུན་དགའ་རྒྱལ་མཚན།དགེ་རྒན་ཉི་མ་དཔལ་ལྡན།དེ་བཞིན་འཛིན་བདག་དགེ་རྒན་དང་དགེ་རྒན་ཁག་གི་ཐུགས་ཁུར་དང་།བསྔགས་བརྗོད་དང་སྐུལ་མ།མཛུབ་སྟོན་བཅས་འོག་སྲོལ་རྒྱུན་རང་བཞིན་དང་སྒྱུ་རྩལ་རང་བཞིན་གྱི་ཡིག་གཟུགས་དང་གསར་རྩོམ་གྱི་ཐབས་ཤེས་མང་པོ་ཁོང་དུ་ཆུད་ཡོད། ལྟག་ཨོ་རྒྱན་ཆོས་འཕེལ་རིན་པོ་ཆེ་དང་།དགེ་རྒན་དཔག་བསམ་དོན་འགྲུབ།དགེ་རྒན་བསྟན་འཛིན་ཚེ་རིང་བཅས་ཀྱིས་གསར་རྩོམ་བྱས་པའི་ཡིག་གཟུགས་སྒྱུ་རྩལ་བརྩམས་ཆོས་དང་དོན་སྤྱི་གསར་པའི་ཐང་གའི་མཛེས་རྩལ་ལ་སློབ་སྦྱོང་བྱས་པ་བརྒྱུད།སྲོལ་རྒྱུན་རིག་གནས་དང་དེང་རབས་ཀྱི་ཡིག་གཟུགས་སྒྱུ་རྩལ་གསར་པ་ཤེས་རྟོགས་ཐུབ་ཡོད།
སི་ཁྲོན་ཞིང་ཆེན་བོད་ཡིག་སློབ་གྲྭར་སློབ་སྦྱོང་བྱེད་རིང་རང་ཉིད་ཀྱིས་འབད་བརྩོན་ལ་བརྟེན་ནས་ཡིག་གཟུགས་སྣ་མང་གིས་《ཚངས་དབྱངས་རྒྱ་མཚོའི་སྙན་ངག་གཅེས་བསྡུས》ཁྱོན་ཤོ་ལོ་ཀ༦༥བྲིས་པ་མ་ཟད།ལི་ཐང་རྫོང་ཚངས་དབྱངས་རིག་གནས་སྨྱན་སྦྱོར་ཀུང་སི་ཡིས་ཉར་ཚགས་བྱས་པ་དང་།《རྒྱལ་སྲས་ལག་ལེན》དྲིལ་འཐེན་གྱི་རིང་ཚད་ལ་སྨི་༢༣ཡོད་པར་ཡིག་གཟུགས་རིགས་ལྔ་བཀོལ་ནས་བྲིས་པའི་བརྩམས་ཆོས་མཐོང་བ་ཀུན་སྨོན་ཡོད་ལ། ལེགས་བཤད་དང་།གཏམ་དཔེ།སྒྱུ་རྩལ་གྱི་ཡིག་གཟུགས་སོགས་བརྩམས་ཆོས་མང་པོ་བྲིས་ཡོད།༢༠༡༨ ལོར་ལི་ཐང་རྫོང་སྒྱུ་རྩལ་དུས་ཆེན་གྱི་ཡིག་གཟུགས་འགྲན་བསྡུར་ཁྲོད་ཨང་དང་པོའི་བྱ་དགའ་ཐོབ།
༢༠༡༩ལོར་ལི་ཐང་རྫོང་ན་རོའི་ཁྱིམ་རིག་གནས་སློབ་གསོའི་མཐུན་ཚོགས་ཀྱི་ཡིག་གཟུགས་འགྲན་བསྡུར་ཁྲོད་ཕུལ་བྱུང་བྱ་དགའ་ཐོབ།༢༠༢༠ལོའི་ཟླ༨པར་ལི་ཐང་ཡིག་གཟུགས་མཐུན་ཚོགས་ཀྱིས་གདན་ཞུས་ལྟར་མི་སྒེར་གྱི་ཡིག་གཟུགས་འགྲེམས་སྟོན་བྱས་པ་དང་འགྲེམས་སྟོན་ཁྲོད་བོད་ཡིག་གི་ཡིག་གཟུགས༤༠ལྷག་ཙམ་སྤྱད་དེ་ཁྱོན་བརྩམས་ཆོས༡༣༣ཡོད།༢༠༢༠ལོའི་དགེ་རྒན་དུས་ཆེན་ལ་སི་ཁྲོན་ཞིང་ཆེན་བོད་ཡིག་སློབ་གྲྭར་མི་སྒེར་གྱི་ཡིག་གཟུགས་འགྲེམས་སྟོན་བྱ་འགུལ་སྤེལ།༢༠༢༠ལོར་སི་ཁྲོན་ཞིང་ཆེན་སྡེ་རོང་རྫོང་གི་སྐབས་དང་པོའི་བོད་ཡིག་ཡིག་གཟུགས་འགྲེམས་སྟོན་ཐོག་བརྩམས་ཆོས་མང་པོ་བདམས་ཐོན་བྱུང་ཡོད་པ་དང་།དུས་ཡུན་རིང་པོའི་ནང་འབད་བརྩོན་ལྷོད་མེད་བྱས་པ་བརྒྱུད་ཡིག་གཟུགས་མཁས་ཅན་དང་ཡིག་གཟུགས་ལ་དགའ་པོ་ཡོད་མཁན་ཚོས་རྒྱབ་སྐྱོར་དང་།ཁས་ལེན་གདེང་འཇོག་ཆེན་པོ་གནང་།༢༠༢༡ལོར་སི་ཁྲོན་ཞིང་ཆེན་བོད་ཡིག་སློབ་གྲྭའི་ཡིག་གཟུགས་འགྲན་བསྡུར་ཁྲོད་དབུ་མེད་ཨང་དང་པོའི་བྱ་དགའ་ཐོབ་པ་དང་མཛེས་རྩལ་ཡིག་གཟུགས་ཨང་གཉིས་པ་བྱ་དགའ་ཐོབ་པ་རེད། ༢༠༢༡ལོར་བརྩམས་ཆོས་གཉིས་སི་ཁྲོན་ཞིང་ཆེན་སློབ་གསོ་པུ་དང་རྒྱལ་ཡོངས་སློབ་གསོ་པུས་འགྲེམས་སྟོན་བྱས་པ་རེད། ༢༠༢༡ལོར་དཀར་མཛེས་ཁུལ་རིག་གནས་བཤམས་སྟོན་ཁང་དུ་འགྲེམས་སྟོན་བྱས།
|
|
