༄༅།། ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་མཚོ་ཉིན་གྲོང་རྡལ་ལྟེ་བའི་སློབ་ཆུང་གིས་བོད་ཀྱི་ཡིག་གཟུགས་དུས་ཆེན་ཉིན་མོ་བསུ་བའི་བྱ་འགུལ་སྤེལ།
བོད་ཀྱི་ཡིག་གཟུགས་དུས་ཆེན་ལ་ཕུལ་བའི་ལེགས་སྐྱེས་བཞི་བ།
བོད་ཀྱི་ཡིག་གཟུགས་ལ་ལོ་ངོ་ཆིག་སྟོང་སུམ་བརྒྱ་ལྷག་གི་ལོ་རྒྱུས་ལྡན་ཞིང་།བྲིས་རྒྱུན་སྣ་མང་ཕུན་སུམ་ཚོགས་པ་དང་། ཡི་གེའི་གཟུགས་མཛེས་ཤིང་སྒྱུ་རྩལ་གྱི་མཛེས་ཉམས་ལྡན་པ་དང་།ཡི་གེ་འདི་ལ་བརྟེན་ནས་བོད་སྔ་རབས་པས་དམ་པའི་ལྷ་ཆོས་དང་། འཇིག་རྟེན་མི་ཆོས་ཏེ།འཇིག་རྟེན་གྱི་ལུགས་གཉིས་ཀྱིས་ཆར་གསུང་རབ་དང་བསྟན་བཅོས་མང་དུ་མཛད་ཅིང་།འཛམ་གླིང་རིག་གནས་ཀྱི་གན་མཛོད་ཆེན་མོར་བྱིན་རླབས་ཀྱི་ཚན་ཁ་འབར་ཞིང་།བོད་མིའི་ཆབ་སྲིད་དང་དཔལ་འབྱོར། རིག་གནས་སོགས་ཀྱི་འཕེལ་རྒྱས་ལ་སྐུལ་འདེད་ཀྱི་ནུས་པ་ཆེན་པོ་ཐོན།
ཡིག་གཟུགས་སྒྱུ་རྩལ་གྱི་ཐད་ནས་ད་ལྟའི་དུས་སུའང་བོད་མདོ་དབུས་ཁམས་གསུམ་གྱི་ཡིག་མཁན་མང་པོས་མ་ཉམས་གོང་སྤེལ་དང་ཉམས་པ་སོར་ཆུད་ཀྱི་ལས་ལ་གཞོལ་མུས་སུ་ཡོད་པ་དང་།རིན་ཐང་དང་ལྡན་པའི་རིག་གནས་གང་དེ་མུ་མཐུད་དུ་རྒྱུན་འཛིན་གནང་རྒྱུ་ནི་ང་ཚོའི་བོད་མི་སོ་སོའི་ཕྲག་ཏུ་བབས་པའི་ལྡོག་མེད་ཀྱི་འགན་འཁྲི་ཡིན་པས།བོད་ཀྱི་ཡིག་གཟུགས་དུས་ཆེན་ཐོན་ལ་ཉེ་བའི་སྐབས་འདིར་ཀླུ་ཆུ་རྫོང་མཚོ་ཉིན་གྲོང་རྡལ་ལྟེ་བའི་སློབ་ཆུང་གིས་སློབ་མའི་ཡིག་གཟུགས་སྦྱོང་བརྩོན་གྱི་འདུན་པ་བསྐྱེད་བསྲིང་དང་།ཀྲུང་ཧྭ་མི་རིགས་ཀྱི་ཐུན་མོང་གི་འདུ་ཤེས་བསྐྱེད་དེ། རྒྱལ་ཁབ་དང་མི་རིགས་ཀྱི་རིག་གནས་ལ་དགའ་ཞེན་བྱེད་པའི་འདུན་པ་བསྐྱེད་བསྲིང་བྱེད་པ།ཁྱིམ་བདག་རྣམ་པས་རང་གི་བུ་ཕྲུག་གིས་ཡིག་གཟུགས་སློབ་སྦྱོང་གི་གནས་ཚུལ་རྒྱུས་ལོན་བྱེད་པ་དང་།སྤྲོ་སེམས་འཁོལ་བའི་ངང་ནས་ཏང་གི་ཚོགས་ཆེན་ཉི་ཤུ་བ་བསུ་བའི་ཕྱིར་དུ། ༢༠༢༢ལོའི་ཟླ༤ཚེས༢༧ཉིན་ཡིག་གཟུགས་དུས་ཆེན་བསུ་བའི་བྱ་འགུལ་གཟབ་རྒྱས་ངང་སྤེལ་བ་རེད།
ཟླ༤བའི་ཚེས༢༦ཉིན་སློབ་གྲྭས་སྐད་ཡིག་དགེ་རྒན་དང་ཡིག་གཟུགས་ཚོ་ཆུང་གི་སློབ་མ་ཡོངས་རྩ་འཛུགས་བྱས་ཏེ།དུས་ཆེན་བསུ་བའི་བརྙན་ཕབ་བསྐྲུན་བྱས་ཤིང་།བོད་ཀྱི་ཡིག་གཟུགས་དུས་ཆེན་གྱི་ཉིན་མོ་ཁྱབ་བསྒྲགས་བྱས།
ཟླ༤ཚེས༢༧ཉིན་ཡིག་གཟུགས་དུས་ཆེན་བསུ་བའི་བྱ་འགུལ་དངོས་སུ་སྤེལ་བ་སྟེ།ཐོག་མར་སློབ་གྲྭའི་ཡིག་གཟུགས་ཚོ་ཆུང་གི་སློབ་མའི་འཐུས་ཚབ་པས་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་བསུ་བའི་ཤིས་ཚིག་ཕུལ་བ་དང་།སློབ་གྲྭའི་ཡིག་གཟུགས་མཛུབ་སྟོན་དགེ་རྒན་མགོན་པོ་སྐྱབས་ཀྱིས་ཡིག་གཟུགས་དུས་ཆེན་གྱི་དམིགས་ཡུལ་དང་གལ་ཆེའི་རང་བཞིན། ད་དུང་སློབ་གྲྭའི་ཡིག་གཟུགས་ཚོ་ཆུང་གི་བྱ་འགུལ་སྤེལ་བའི་གནས་ཚུལ་དང་།ལོ་འདི་དག་གི་རིང་བླངས་པའི་གྲུབ་འབྲས་སོགས་ཀྱི་ཐད་ནས་གཏམ་བཤད་གནངས། དེར་མཐུད་དེ་སློབ་གྲྭའི་དགེ་སློབ་ཡོངས་ཀྱིས་དགེ་རྒན་དང་སློབ་མའི་ཡིག་གཟུགས་འབྲི་སྦྱོང་དང་།ཡིག་གཟུགས་ཀྱི་བརྩམས་ཆོས་ལ་རོལ་མྱོང་བྱས། བྱ་འགུལ་གྱི་མཇུག་ཏུ་ཡིག་གཟུགས་ཚོ་ཆུང་གི་སློབ་མའི་ཁྱིམ་བདག་རྣམ་པར་ཡིག་གཟུགས་ཀྱི་བརྩམས་ཆོས་སུམ་ཅུ་ལྷག་ལེགས་སྐྱེས་སུ་གནངས།
ཐེངས་འདིའི་ཡིག་གཟུགས་དུས་ཆེན་བསུ་བའི་བྱ་འགུལ་ནི་སློབ་གྲྭ་དང་ཁྱིམ་བདག་གྱིས་བསྒྲུབས་ཤིང་།བྱ་འགུལ་འདིས་སློབ་གྲྭའི་དགེ་སློབ་དང་ཁྱིམ་བདག་ཡོངས་ཀྱིས་བོད་ཀྱི་ཡིག་གཟུགས་སྒྱུ་རྩལ་ལ་དགའ་ཞེན་དང་མཐོང་ཆེན་བྱེད་པའི་འདུ་ཤེས་ཤུགས་དྲག་ཏུ་བཏང་བ་དང་།ཀྲུང་ཧྭ་མི་རིགས་ཀྱི་སྲོལ་རྒྱུན་རིག་གནས་ལ་བཅངས་པའི་སྤྲོ་སེམས་དང་དེ་རྒྱུན་འཛིན་དར་སྤེལ་གཏོང་བའི་ཆོད་སེམས་མཚོན་པར་བྱས་ཡོད།
|
|
