བཟའ་མི་ཚང་མས་ཡིག་གཟུགས་ཀྱི་ལས་དོན་ལ་དཀའ་བ་སྐྱེད་པའི་འབྲས་བུ།
བོད་ཀྱི་ཡིག་གཟུགས་དུས་ཆེན་ལ་ཕུལ་བའི་ལེགས་སྐྱེས་དང་པོ།
དང་པོ། བུ་ཆུང་སྐལ་བཟང་ལུང་རྟོགས་རྒྱ་མཚོ། སྨྱུག་མིང་ལྡན་མ་རྩེ་སྨྱུག།
སྤྱི་ལོ༢༠༡༠ལོའི་ཟླ༩ཚེས་༡༢ཉིན་མདོ་སྟོད་མི་ཡི་ཆོལ་ཁའི་ཁོངས་གཏོགས་ཡིག་མཁན་ཆེན་མོ་ལྡན་མ་རྩེ་མང་གི་འཁྲུངས་ཡུལ་ཁམས་ལྡན་མའམ་འདན་ཁོག་ཏུ་མི་ལུས་རིན་པོ་ཆེའི་སྐྱེ་བ་བཞེས། ཆུང་ནས་རྣམ་རིག་གསལ་ཞིང་ཕ་མ་ལ་གུས་པ། རོགས་པ་ཆུང་ཆུང་ཚོ་དང་རྩེ་རྒྱུར་དགའ་ཞིང་གཞན་དང་མཐུན་པ། བགྲང་བྱ་བདུན་པའི་ཐོག་སློབ་ཆུང་དུ་ཞུགས་ཤིང་འབད་བརྩོན་ཆེ་བས་འཛིན་གྲྭའི་ནང་གྲུབ་འབྲས་རྩེར་སོན་འབའ་ཞིག་བླངས། ཞོར་དུ་ཕ་རྒན་འདན་ཚ་འཇམ་དབྱངས་ཆོས་དར་གྱིས་ཁྲིད་སྟོན་དང་རང་འགུལ་ཐོག་བོད་ཀྱི་ཡིག་གཟུགས་ལ་འབད་པ་ཤ་ཐང་དུ་བགྱི་བཞིན་ཡོད། ༢༠༢༠ལོའི་ཟླ་༦པར་ཆབ་མདོ་གྲོང་ཁྱེར་སློབ་གསོ་ཚན་རིག་ཞིབ་འཇུག་ཁང་གིས་གཙོ་གཉེར་གནང་བའི་གྲོང་ཁྱེར་དགེ་སློབ་ཡོངས་ཀྱི་ཡིག་གཟུགས་འགྲན་བསྡུར་ལས་སློབ་ཆུང་སློབ་མའི་ཁྲོད་ནས་ཨང་དང་པོའི་བྱ་དགའ་ཐོབ། ༢༠༢༠ལོའི་ཟླ་༨པར་༼སྒ་ཆབ་མདོ་ནོར་བུའི་ཕ་ས་རེད༽༼ཚངས་དབྱངས་རྒྱ་མཚོའི་མགུར་གླུ༽༼སྡེར་ནང་ས་བྲིས་ཡིག་ཆེན་གྱི་སྡོམ་ཚིག་གསལ་བའི་མེ་ལོང༽ཅེས་པའི་བརྩམས་ཆོས་གསུམ་ཆབ་མདོ་གྲོང་ཁྱེར་དྲིལ་བསྒྲགས་པུའུ་དང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་གཉིས་ཀྱིས་གཙོ་གཉེར་གནང་བའི་ཆབ་མདོ་བཅིངས་འགྲོལ་བཏང་ནས་ལོ་ངོ་༧༠འཁོར་བར་རྟེན་འབྲེལ་ཞུ་བའི་ཡིག་གཟུགས་འགྲེམ་སྟོན་གྱི་བརྩམས་ཆོས་སུ་བདམས་ནས་འགྲེམ་སྟོན་བྱས། ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་༢༠༢༠ལོའི་ཟླ་༡༠པར་སྤེལ་བའི་དགེ་སློབ་ཡོངས་ཀྱི་བོད་ཡིག་ཡིག་གཟུགས་འགྲན་བསྡུར་ཁྲོད་སློབ་མའི་འགྲན་ཚོགས་ཀྱི་ཨང་དང་པོའི་བྱ་དགའ་ཐོབ། ཆབ་མདོ་གྲོང་ཁྱེར་ཁ་རུབ་ཆུས་འགུ་རོ་ལྟེ་བའི་སློབ་ཆུང་གི་༢༠༢༠ལོའི་ཟླ་༡༡པར་སྤེལ་བའི་ཡིག་གཟུགས་འགྲན་བསྡུར་ལས་ཨང་དང་པོའི་བྱ་དགའ་ཐོབ། ༢༠༢༡ལོའི་ཟླ་༡པོར་མགོ་ལོག་ཁུལ་མི་རིགས་མཐོ་རིམ་སློབ་འབྲིང་སློབ་རའི་སྡེར་ནང་ས་བྲིས་བྲིས་རྒྱུན་སྒྱུ་རྩལ་ཞིབ་འཇུག་ལྟེ་གནས་ནས་སྦྱངས་འབྲས་འབུར་ཐོན་གྱི་བྱ་དགའ་ཐོབ། ༢༠༢༠ལོ་ཀྲུང་གོ་བོད་ཀྱི་ཡིག་གཟུགས་དྲ་ཚོམས་ཡོངས་ནས་ལོ་ན་ཆེས་ཆུང་བའི་ཡིག་མཁན་དུ་བདམས་པའི་གཟེངས་རྟགས་ཐོབ། ༢༠༢༡ལོའི་ཟླ་༧པར་མགོ་ལོག་ཁུལ་མི་རིགས་མཐོ་རིམ་སློབ་འབྲིང་སྡེར་ནང་ས་བྲིས་ཀྱི་ཡིག་གཟུགས་སྦྱངས་འབྲས་ཚད་ལྡན་ལོན་པའི་གཟི་བརྗིད་དཔང་ཡིག་གཉིས་ཐོབ། ༢༠༢༡ལོའི་ཟླ་༨པར་ཀྲུང་གུང་ཆབ་མདོ་གྲོང་ཁྱེར་མི་རིགས་དོན་གཅོད་ཨུ་ཡོན་ལྷན་ཁང་གིས་གཙོ་གཉེར་གནང་བའི་གྲོང་ཁྱེར་ཡོངས་ཀྱི་ལས་རིགས་ཁག་གི་བོད་རྒྱ་ཡིག་གཟུགས་འགྲན་བསྡུར་ཆེན་མོའི་ཁྲོད་ཨང་གཉིས་པའི་བྱ་དགའ་ཐོབ། ༢༠༢༡ལོའི་ཟླ་༡༠པར་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་སྐབས་བདུན་པའི་སློབ་རའི་རིག་གནས་སྒྱུ་རྩལ་དུས་ཆེན་བོད་རྒྱ་ཡིག་གཟུགས་འགྲན་བསྡུར་ཁྲོད་ཨང་དང་པོའི་བྱ་དགའ་ཐོབ། ༢༠༢༡ལོའི་ཟླ་༡༡པར་ཝང་གཉིས་བྱ་དགའ་སྐབས་བཞི་པའི་ཀྲུང་གོའི་ཡིག་རིས་འགྲན་བསྡུར་ཆེན་མོའི་ཁྲོད་ཕུལ་བྱུང་གི་བྱ་དགའ་ཐོབ། ༢༠༢༡ལོའི་ཟླ་བ་༡༢པར་སྐབས་དང་པོའི“རྩལ་མཛེས་བུམ་པའི”རྒྱལ་ཡོངས་ཀྱི་གཞོན་ནུ་ལོ་ཆུང་གི་ཡིག་གཟུགས་དང་རི་མོའི་འགྲན་བསྡུར་ཆེན་མོའི་ཁྲོད་གསེར་གྱི་རྟགས་མའི་བྱ་དགའ་ཐོབ། དེ་སྔོན་སྡེར་ནང་ས་བྲིས་ཀྱི་བྲིས་གཟུགས་ཐོག་ནས་༼སློབ་ཆུང་དག་ཡིག༽ཆ་ཚང་དང་༼ཤིང་གི་བསྟན་བཅོས༽ཆ་ཚང་༼དགེ་ལྡན་ལེགས་བཤད༽ཆ་ཚང་༼ཚངས་དབྱངས་རྒྱ་མཚོའི་མགུར་གླུ༽ཆ་ཚང་༼ བྱང་ཆུབ་སྤྱོད་འཇུག་ཆེན་མོ༽ཆ་ཚང་༼བཤེས་པའི་སྤྲེངས་ཡིག༽ཆ་ཚང་བཅས་བཤུ་འབྲི་བྱས། མིག་སྔར་༼ ས་སྐྱ་ལེགས་བཤད༽བཤུ་འབྲི་བྱེད་མུས་སུ་མཆིས། གཞན་ཡང་སྔ་རྗེས་སུ་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་བོད་ཤར་ཡིག་གཟུགས་གླིང་གི་ཚོགས་མི་དང་། ཆབ་མདོ་གྲོང་ཁྱེར་ཡིག་གཟུགས་མཁས་པ་མཐུན་ཚོགས་ཀྱི་ཚོགས་མི། མགོ་ལོག་སྡེར་ནང་ས་བྲིས་ཆེད་སྦྱོང་འཛིན་གྲྭའི་ཚོགས་མི། ཀྲུང་གོ་བའི་ཡིག་རིས་སྒྱུ་རྩལ་མཁས་པ་མཐུན་ཚོགས་ཀྱི་ཚོགས་མི་བཅས་ཡིན། བུ་ཆུང་ཁོང་གི་ཡིག་གཟུགས་དྲ་སྟེང་དུ་སྤེལ་བ་འདིས་ཁོ་རང་ཉིད་ལ་རྟིང་སྐུལ་དང་ན་མཉམ་གྱི་གྲོགས་པོ་ཆུང་ཆུང་དག་ལ་སྐུལ་མའི་ཚུལ་དུ་བཀོད་པ་ལགས། ད་ལྟ་བོད་ལྗོངས་ཆབ་མདོ་གྲོང་ཁྱེར་ཁ་རུབ་ཆུས་འགུ་རོ་ལྟེ་བའི་སློབ་ཆུང་ལོ་རིམ་ལྔ་པའི་ནང་དུ་སློབ་གཉེར་བྱེད་མུས་སུ་མཆིས།
གཉིས་པ། ཀུན་བཟང་ཆོས་སྒྲོན། སྨྱུག་མིང་ལྡོང་སྨྱུག་མཛེས།
སྤྱི་ལོ་༡༩༧༩ལོའི་ཟླ་༩པའི་ཚེས་༡༣ཉིན་སྨད་མདོ་ཁམས་སྒང་དྲུག་གི་ཡ་གྱལ་ཚ་བ་སྒང་སྒེར་རུ་དཔོན་ཚང་གི་ཁྱིམ་དུ་སྐྱེས།སྔ་རྗེས་སུ་སྡེ་དགེའི་བོད་སྨན་སློབ་གྲྭ་དང་ཆབ་མདོའི་བོད་སྨན་སློབ་གྲྭ་སི་ཁྲོན་ཞིང་ཆེན་བོད་ཡིག་སློབ་གྲྭ་སོགས་ལ་སློབ་གཉེར་བྱས།༢༠༢༡ལོའིཟླ་༡༢པར་ཀྲུང་གོ་བའི་ཡིག་གཟུགས་སྒྱུ་རྩལ་མཁས་ཅན་མཐུན་ཚོགས་ཀྱིས་ཀྲུང་གོའི་ཡིག་གཟུགས་རིག་གནས་དར་སྤེལ་ཐད་བྱས་རྗེས་གཟེངས་སུ་ཐོན་པའི་མི་སྣ་རུ་བདམས་པའི་གཟི་བརྗིད་དཔང་ཡིག་ཐོབ།མིག་སྔར་ལས་ཀ་ཙག་ཙིག་གི་ཞོར་དུ་བཟའ་ཟླ་འདན་ཚ་འཇམ་དབྱངས་ཆོས་དར་དང་བུ་ཆུང་ལྡན་མ་རྩེ་སྨྱུག་གཉིས་དང་ལྷན་དུ་ས་བྲིས་ལ་འབད་བཞིན་ཡོད། ད་ལྟ་ལྡན་བྲིས་གླིང་གི་ཚོགས་མི།ཆབ་མདོ་གྲོང་ཁྱེར་ཡིག་གཟུགས་མཁས་པ་མཐུན་ཚོགས་ཀྱི་ཚོགས་མི། ཀྲུང་གོ་བའི་ཡིག་རིས་སྒྱུ་རྩལ་མཁས་པ་མཐུན་ཚོགས་ཀྱི་ཚོགས་མི་བཅས་ཡིན།
གསུམ་པ། འཇམ་དབྱངས་ཆོས་དར། སྨྱུག་མིང་འདན་ཚ།
སྤྱི་ལོ་༡༩༨༠ལོའི་ཟླ་༡༡པའི་ཚེས་༣༠ཉིན་བོད་རང་སྐྱོང་ལྗོངས་ཆབ་མདོ་གྲོང་ཁྱེར་འཇོ་མདའ་རྫོང་གི་ཁོངས་གཏོགས་ཡིག་མཁན་ཆེན་མོ་ལྡན་མ་རྩེ་མང་གི་འཁྲུངས་ཡུལ་ཁམས་ལྡན་མའམ་འདན་ཁོག་ནུབ་མ་ལྡན་མ་ཐུབ་བསྟན་ཆོས་འཁོར་གླིང་གི་ཉེ་འདབ་ལྕང་རགས་སྡེ་པར་སྐྱེས། ༢༠༠༡ལོ་ནས་བཟུང་སྔ་རྗེས་སུ་སི་ཁྲོན་ཞིང་ཆེན་བོད་ཡིག་སློབ་གྲྭ་དང་བོད་ལྗོངས་སློབ་གྲྭ་ཆེན་མོ་ལྷོ་ནུབ་མི་རིགས་སློབ་གྲྭ་ཆེན་མོ་སོགས་སུ་སློབ་གཉེར་བྱས། ༢༠༡༠ལོའི་ཟླ་༩པར་ཆབ་མདོ་གྲོང་ཁྱེར་སྐབས་དང་པོའི་དགེ་རྒན་གྱི་གཞི་རྩའི་ནུས་རྩལ་གྱི་ཡིག་གཟུགས་འགྲན་བསྡུར་ཁྲོད་༼འཁྱུག་ཡིག༽ཨང་དང་པོའི་བྱ་དགའ་ཐོབ། ༢༠༡༨ལོའི་ཟླ་༥པར་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་དགེ་སློབ་ཡོངས་ཀྱི་ཡིག་གཟུགས་འགྲན་བསྡུར་ཁྲོད་༼འཁྱུག་ཡིག༽ཨང་དང་པོ་དང་༼འབྲུ་ཚ༽ཨང་གཉིས་པ་༼དབུ་ཅན༽ཨང་གཉིས་པ་༼སྣ་ཚོགས༽ཨང་དང་པོ་བཅས་ཀྱི་བྱ་དགའ་ཐོབ། ༢༠༡༨ལོའི་ཟླ་༡༢པར་གྲོང་ཁྱེར་ཡོངས་ཀྱི་དགེ་སློབ་བོད་རྒྱ་ཡིག་གཟུགས་འགྲན་ཆེན་ཁྲོད་༼འདྲེན་འཁྱུག༽ཨང་དང་པོ་དང་༼ཚུགས་རིང༽ཕུལ་བྱུང་གི་བྱ་དགའ་ཐོབ། ༢༠༡༨ལོའི་ཟླ་༡༢པར་དེང་རབས་སྒྱུ་རྩལ་འགྲན་བསྡུར་ཆེ་མོའི་དྲ་བས་གཙོ་གཉེར་བྱས་པའི་རྒྱལ་ཡོངས་ཀྱི་ཡིག་རིས་འགྲན་བསྡུར་སྐབས་དགུ་པར་བྱ་དགའ་རིམ་པ་གཉིས་པར་བདམས། ༢༠༡༩ལོའི་ཟླ་༤པར་དུས་ཐེངས་ལྔ་པའི་ལྗོངས་ཡོངས་ཀྱི་སློབ་གྲྭ་འབྲིང་ཆུང་གི་ཡིག་གཟུགས་དགེ་རྒན་གསོ་སྦྱོང་འཛིན་གྲྭའི་ཕུལ་བྱུང་གི་སློབ་མའི་མཚན་སྙན་ཐོབ་པ་དང་། ༢༠༡༩ལོའི་ཟླ་༦པར་ཆབ་མདོ་གྲོང་ཁྱེར་ཀྲུང་གོ་གསར་པ་དབུ་བརྙེས་ནས་ལོ་༧༠འཁོར་བའི་རྟེན་འབྲེལ་མཛད་སྒོའི་ཡིག་གཟུགས་འགྲན་བསྡུར་ཁྲོད་ཨང་གཉིས་པའི་བྱ་དགའ་ཐོབ། ༢༠༡༩ལོའི་ཟླ་༩པར་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་དགེ་སློབ་ཡོངས་ཀྱི་ཡིག་གཟུགས་འགྲན་བསྡུར་ཁྲོད་དམིགས་བསལ་ཨང་དང་པོའི་བྱ་དགའ་ཐོབ། ༢༠༡༩ལོའི་ཟླ་༡༠པར་བོད་རང་སྐྱོང་ལྗོངས་མི་རིགས་ལས་དོན་ཨུ་ཡོན་ལྷན་ཁང་དང་བོད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་གཉིས་ཀྱིས་གཙོ་གཉེར་བྱས་པའི་ཀྲུང་གོ་གསར་པ་དབུ་བརྙེས་ནས་ལོ་བདུན་ཅུ་འཁོར་བའི་ལྗོངས་རིམ་པའི་ཡིག་གཟུགས་འགྲན་ཆེན་ལས་ཨང་དང་པོའི་བྱ་དགའ་ཐོབ། ༢༠༡༩ལོའི་ཟླ་༡༠པར་བོད་རང་སྐྱོང་ལྗོངས་སློབ་གསོ་ཐིང་དང་བོད་རང་སྐྱོང་ལྗོངས་ཡིག་གཟུགས་མཁས་པ་མཐུན་ཚོགས་གཉིས་ཀྱིས་མཉམ་དུ་སྤེལ་བའི་ཀྲུང་གོ་གསར་པ་དབུ་བརྙེས་ནས་ལོ་ངོ་བདུན་ཅུ་འཁོར་བར་རྟེན་འབྲེལ་ཞུ་བའི་ཡིག་གཟུགས་འགྲན་བསྡུར་ཁྲོད་ཨང་དང་པོའི་བྱ་དགའ་ཐོབ། ༢༠༢༠ལོའི་ཟླ་༤བའི་ཚེས་༣༠ཉིན་མགོ་ལོག་བོད་རིགས་རང་སྐྱོང་ཁུལ་མང་ཚོགས་སྒྱུ་རྩལ་ཁང་གིས་གཙོ་གཉེར་བྱས་པའི་༼རྒྱལ་ཡོངས་བོད་ཀྱི་ཡིག་གཟུགས་དུས་ཆེན་རྗེས་དྲན༽བྱ་འགུལ་ཁྲོད་ཕུལ་བྱུང་གི་བྱ་དགའ་ཐོབ། ༢༠༢༠ལོའི་ཟླ་༩པར་བོད་རང་སྐྱོང་ལྗོངས་མི་རིགས་ལས་དོན་ཨུ་ཡོན་ལྷན་ཁང་དང་བོད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་གཉིས་ཀྱིས་གཙོ་གཉེར་བྱས་པའི་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ།ལག་གདང་སྦྲེལ་ནས་འབྱོར་འབྲིང་ཕྱོགས་སུ་བསྐྱོད་ཞེས་པའི་ཡིག་གཟུགས་འགྲན་བསྡུར་ཁྲོད་ཨང་གསུམ་པའི་བྱ་དགའ་ཐོབ། ༢༠༢༠ལོའི་ཟླ་༧པར་ཆབ་མདོ་གྲོང་ཁྱེར་རིག་རྩལ་ལྷན་ཚོགས་དང་གྲོང་ཁྱེར་སློབ་གསོ་ཅུད་སོགས་ཀྱིས་རྩ་འཛུགས་བྱས་པའི་ཡིག་གཟུགས་འགྲན་བསྡུར་ཁག་ལ་དཔྱད་འདེམས་པའི་འགན་ཁུར་བྱས། ༢༠༢༡ལོ་ཟླ་༢པར་ཐོན་མིའི་མཛུབ་རྩལ་རྟགས་མའི་ཡིག་གཟུགས་འགྲན་སྡུར་ཁྲོད་བྱ་དགའ་ཨང་གཉིས་པ་ཐོབ། ༢༠༢༡ལོའི་ཟླ་༤པར་ཀྲུང་གོ་བའི་ཡིག་རིས་སྒྱུ་རྩལ་མཐུན་ཚོགས་ཀྱི་བོད་ཡིག་ཡིག་གཟུགས་ཨུ་ཡོན་ཚོགས་པ་བཙུགས་ནས་ཉིན་༨༠ལོན་པར་རྟེན་འབྲེལ་ཞུ་བའི་འགྲན་བསྡུར་ཁྲོད་ཨང་གཉིས་པའི་བྱ་དགའ་ཐོབ།
༢༠༢༡ལོའི་ཟླ་༥པར་བོད་རང་སྐྱོང་ལྗོངས་དཔེ་མཛོད་ཁང་གིས་གཙོ་གཉེར་བྱས་པའི་ཏང་དབུ་བརྙེས་ནས་ལོ་ངོ་༡༠༠འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་༧༠འཁོར་བར་རྟེན་འབྲེལ་ཞུ་བའི་ལྗོངས་ཡོངས་ཀྱི་ཡི་གཟུགས་འགྲེམས་སྟོན་དུ་ཚུད་པའི་དཔང་ཡིག་ཐོབ། ༢༠༢༡ལོའི་ཟླ་༧པར་བོད་རང་སྐྱོང་ལྗོངས་ཀྱི་སྐབས་བཞི་པའི་གཞོན་ནུ་ལོ་ཆུང་གི་ཡིག་རིས་འགྲན་བསྡུར་ཆེན་མོའི་ཁྲོད་ཨང་གཉིས་པའི་བྱ་དགའ་ཐོབ། ༢༠༢༡ལོའི་ཟླ་༧པའི་ཚེས་༨ཉིན་རྒྱལ་ཁབ་རིམ་པའི་གཟུགས་མིན་ཤུལ་བཞག་རིག་གནས་མགོ་ལོག་སྡེར་ནང་ས་བྲིས་ཀྱི་རྒྱུན་འཛིན་པའི་དཔང་ཡིག་དང་མཐར་ཕྱིན་དཔང་ཡིག་མཐར་ཕྱིན་དཔང་རྟགས་སོགས་ཀྱི་གཟེངས་རྟགས་ཐོབ།
༢༠༢༡ལོའི་ཟླ་༨པར་ཀྲུང་གོ་བོད་ཀྱི་ཡིག་གཟུགས་དྲ་བའི་༼ ཐོན་མིའི་ཡིག་རྒྱུན ༽སྐབས་གཉིས་པའི་རྒྱལ་ཡོངས་བོད་ཀྱི་ཡིག་གཟུགས་འགྲན་བསྡུར་ཆེན་མོའི་ཁྲོད་ཨང་དང་པོའི་བྱ་དགའ་ཐོབ། ༢༠༢༡ལོའི་ཟླ་༡༡པར་ཝང་གཉིས་བྱ་དགའ་སྐབས་བཞི་པའི་ཀྲུང་གོའི་ཡིག་རིས་འགྲན་བསྡུར་ཆེན་མོའི་ཁྲོད་དུ་དངུལ་གྱི་རྟགས་མའི་བྱ་དགའ་ཐོབ། ༢༠༢༡ལོའི་ཟླ་བ་༡༢པར་སྐབས་དང་པོའི“རྩལ་མཛེས་བུམ་པའི”རྒྱལ་ཡོངས་ཀྱི་གཞོན་ནུ་ལོ་ཆུང་གི་ཡིག་གཟུགས་དང་རི་མོའི་འགྲན་བསྡུར་ཆེན་མོའི་ཁྲོད་ཁྱད་འཕགས་ཀྱི་བྱ་དགའ་ཐོབ། ༢༠༢༡ལོའིཟླ་༡༢པར་ཀྲུང་གོ་བའི་ཡིག་གཟུགས་སྒྱུ་རྩལ་མཁས་ཅན་མཐུན་ཚོགས་ཀྱིས་ཀྲུང་གོའི་ཡིག་གཟུགས་རིག་གནས་དར་སྤེལ་ཐད་བྱས་རྗེས་གཟེངས་སུ་ཐོན་པའི་མི་སྣ་རུ་བདམས་པའི་གཟི་བརྗིད་དཔང་ཡིག་ཐོབ།གཞན་ཡང་སྔ་རྗེས་སུ་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་བོད་ཤར་ཡིག་གཟུགས་གླིང་གི་ཚོགས་གཙོ་དང་། ཆབ་མདོ་གྲོང་ཁྱེར་ཡིག་གཟུགས་མཁས་པ་མཐུན་ཚོགས་ཀྱི་ཀྲུའུ་ཞི་གཞོན་པ། ལྷ་ས་གྲོང་ཁྱེར་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི། བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི། ཀྲུང་གོ་བའི་ཡིག་རིས་སྒྱུ་རྩལ་མཁས་པ་མཐུན་ཚོགས་ཀྱི་ཚོགས་མི་བཅས་ཡིན། ད་ལྟ་བོད་ལྗོངས་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་སློབ་གཙོ་གཞོན་པའི་འགན་ཁུར་བཞིན་ཡོད།
|
|
