༄༅།།བྲིས་པ་ཐུབ་རྒྱལ་མཚམས་སྦྱོར།
བྱང་ཐང་ནག་ཆུའི་བྲིས་པ་ཐུབ་བསྟན་རྒྱལ་བ་ལགས་ནི་བོད་ལྗོངས་ནག་ཆུ་གྲོང་ཁྱེར་སོག་རྫོང་དཀར་སྨད་ཡུལ་ཤོག་ཏུ་སྤྱི་ལོ་༡༩༩༣ལོར་འབྲོག་ཁྱིམ་དཀྱུས་མ་ཞིག་ཏུ་ལང་ཚོ་སྨིན་ཞིང་ཕྱི་ལོ་༢༠༠༠ལོར་ས་གནས་དེ་གའི་སློབ་ཆུང་དུ་སློབ་གྲྭར་འགྲིམས་ཏེ་སོག་རྫོང་དམའ་རིམ་སློབ་འབྲིང་ལོ་རིམ་གཉིས་པའི་བར་དུ་སློབ་གྲྭར་ཕེབས། འོན་ཏང་རྒྱུ་རྐྱེན་གང་རུང་ཞིག་གིས་རྐྱེན་པས་མུ་མཐུད་དུ་སློབ་གྲྭར་འགྲོ་རྒྱུའི་སྐལ་པ་མ་ལྡན་ཡང་། ཁོང་གི་དགའ་ཕྱོགས་ཏེ་རིག་པའི་་གནས་སྤྱི་དང་ལྷག་པར་དུ་ཡིག་གཟུགས་ལ་འཁྲེང་བའི་བསམ་འདུན་ལ་འགྱུར་བ་མེད་སྟབས་སྔར་བཞིན་རིག་གནས་ཀྱི་ཁོར་ཡུག་ཅིག་སྟེ། ཉི་མ་གླིང་དགོན་དུ་༢༠༠༩ལོར་སེར་མོ་བའི་སྡེ་ཁག་ཏུ་ཞུགས་རྒྱུའི་སྐལ་བ་བཟང་པོ་རྙེད་ཅིང་དེ་ནས་དགོན་པའི་བཤད་གྲྭའི་འཛིན་རིམ་དང་པོ་ཡིག་གཟུགས་དང་བསྡུས་གྲྭ་སུམ་རྟགས་སོགས་སྦྱང་སར་ཞུགས། ལོ་གཉིས་ཀྱི་རྗེས་སུ་བཤད་གྲྭའི་སློབ་དཔོན་མཆོག་གིས་ཁོང་ནི་ཡིག་གཟུགས་བཟང་རབས་ཀྱི་བསྟོད་བསྔགས་དང་བཅས་ཏེ་འཛིན་གྲྭའི་བྲིས་དཔེ་འབྲི་མཁན་དུ་བསྐོས་བཞག་གནང་བས་དེ་ནས་བཟུང་མཁན་པོ་མཆོག་གི་བཀའ་ལྟར་རང་ཉིད་ཀྱིས་འགན་འཁྲི་ཕྲག་ཏུ་བླངས་ནས་དཔེ་ཁྲིད་དང་དུས་མཆོད་ཀྱི་བར་གསེང་དང་།ངལ་གསོའི་དུས་ཚོད་བཅས་བཙལ་ཏེ་སྔར་ལས་ལྷག་པའི་སྒོ་ནས་དགེ་རྒན་ལ་བསྟེན་ཅིང་བྲིས་དཔེ་ཚད་ལྡན་ཁག་ལ་དཔེ་བལྟས་གནང་ནས་ཡིག་གཟུགས་ཁག་ལ་འབད་བརྩོན་ལྷུར་ལེན་བྱས་པས་ཡིག་གཟུགས་འགྲན་བསྡུར་༼ བོད་རང་སྐྱོང་ལྗོངས་ ༽དང་༼ ནག་ཆུ་གྲོང་ཁྱེར་༽ ༼ སོག་རྫོང་ ༽སོགས་དང་གཞན་༼ སྡེ་ཚན་ཁག་དང་ཚོགས་པ་ཁག་ ༽གི་ཁྲོད་ནས་ཨང་རིམ་ཆེས་མཐོ་བའི་བྱ་དགའ་མང་ཙམ་ཐོབ། མ་ཟད་ད་སྐབས་སྤྱི་ཚོགས་ཁྲོད་དུ་ཁོང་གི་ཡིག་གཟུགས་ལ་དགོན་སྡེའི་གྲྭ་བཙུན་ཁག་དང་སློབ་གྲྭ་ཆེ་འབྲིང་གི་སློབ་མ་ཁག་དང་དེ་བཞིན་སྤྱི་ཚོགས་ཐོག་རིག་གནས་ལ་མོས་པ་ཡོད་མཁན་བཅས་ཀྱི་གདེང་འཇོག་ཆེན་པོ་ཐོབ་དང་ཐོབ་བཞིན་ལགས་པས་ཁོང་གི་ཡིག་གཟུགས་ལ་གའ་མོས་ཡོད་པའི་ན་གཞོན་ཉིན་རེ་བཞིན་ཇེ་མང་དུ་འགྲོ་བཞིན་ཡོད་ལ། མ་ཚད་ད་ལྟ་ཡང་ཀྲུང་གོ་བོད་ཀྱི་ཡིག་གཟུགས་དྲྭ་བའི་དཔྱད་འདེམ་ཡིག་མཁན་མཁས་དབང་རྣམ་པས་གདེང་འཇོག་མཐོ་པོ་གནང་ཏེ་བརྩམས་ཆོས་འགྲིམ་སྟོན་བྱ་རྒྱུའི་ཆོག་མཆན་ཐོབ་པ་ལྟར།།
|
|
