བྲིས་པ་བློ་གྲོས་མཚམས་སྦྱོར།
དངོས་མིང་ལ་བློ་གྲོས་དང་པིར་མིང་ལ་གཟའ་སྨྱུག་རྫི་དུ་འབོད་པའི་ཡིག་མཁན་ཁོང་༡༩༩༡ལོར་སི་ཁྲོན་ཞིང་ཆེན་རྔ་བ་ཁུལ་མཛོད་དགེ་རྫོང་ཨ་སྐྱིད་གྲོང་རྡལ་གཟའ་རུ་སྨད་མ་རུ་སྐྱེས། ལོ་བདུན་ནས་བཟུང་གཟའ་རུ་སྨད་མའི་སློབ་ཆུང་དུ་འབྲི་ཀློག་གི་རྨང་གཞི་ཐོག་མར་བསླབ། ལོ་བཅུའི་སྟེང་ལྷ་མོའི་སློབ་ཆུང་དུ་ཞུགས་ཏེ་རང་ལོ་བཅུ་བཞིའི་སྟེང་དུ་སློབ་མཐར་ཕྱིན། ལོ་བཅུ་བཞི་ནས་བཅུ་བདུན་བར་ལྔ་རིག་ཟབ་སྦྱོང་སློབ་གླིང་དུ་སློབ་སྦྱོང་བྱེད་པའི་སྐལ་བ་བཟང་པོ་བྱུང་། དུས་དེ་ནས་ཡིག་གཟུགས་དགེ་རྒན་འོད་ཟེར་རམ་ཀིར་འོད་ལས་སུག་རིང་དང་སུག་ཐུང་ཆུགས་མ་འཁྱུག་སོགས་ཀྱི་འབྲི་རིམ་གྱི་ཡིག་གཟུགས་སློབ་ཁྲིད་ཀྱི་བསྐལ་བ་བཟང་པོ་བྱུང་།
༢༠༡༥ལོ་ནས་ཡིག་མཁན་ཆེན་མོ་གླིང་བའི་ཨ་ཁུ་ཚུལ་ཁྲིམས་དང་ང་ཚོའི་མཐུན་མོང་མ་ཡིན་པའི་བྲིས་རྒྱུན་གྱི་བདག་པོ་དགེ་མང་འཇམ་དཔལ་ལགས་དང་འདམ་སྤྲུལ་དགེ་འདུན་དབང་ཕྱུག་དང་གཙོས་དགོན་པའི་ཨ་ཁུ་ཤེས་རབ་རྒྱ་མཚོ་དང་ཐོན་མའི་གསེར་བྲིས་ཁང་གི་དགེན་འཇམ་དབྱངས་སོགས་ཀྱི་མདུན་ནས་དབུ་ཅན་དང་དབུ་མེད་ལནྩ་སྙེ་བྲིས་སོགས་ཡིག་གཟུགས་བཅུ་ཕྲག་ལྷག་ལ་སྦྱང་བ་བྱས། ༢༠༡༨ལོའི་ཡིག་གཟུགས་དུས་ཆེན་སྐབས་དཀར་མཛེས་ཁུལ་རིག་གནས་ཁང་དང་ཡིག་མཁན་མཐུན་ཚོགས་གཉིས་ཀྱིས་མཉམ་དུ་བསྒྲུབས་པའི་ཡིག་གཟུགས་འགྲན་བསྡུར་སྐབས་བདག་གི་དབུ་མེད་ཡིག་གཟུགས་ལ་ཨང་དང་པོའི་བྱ་དགའ་ཐོབ། ༢༠༡༨ལོར་རང་རྫོང་དུ་བོད་ཀྱི་ཡིག་གཟུགས་དུས་ཆེན་སྐབས་གཉིས་པ་བསུ་བའི་ཡིག་གཟུགས་བཤམས་སྟོན་དེ་པད་ཡུ་ཆ་ཚང་བཅའ་སྡོད་སློབ་ཆུང་དུ་སྤེལ། སློབ་གཙོ་རྡོ་རྗེ་ཚེ་བཟུངས་ལགས་ཀྱི་རྒྱབ་སྐྱོར་དང་མཛོད་སྨྱུག་ཚོམས་གླིང་གི་བྲིས་གྲོགས་ཚོའི་ལྷག་བསམ་ལ་བརྟེན་ནས་ལེགས་འགྲུབ་བྱུང་། ༢༠༡༩ལོའི་བོད་ཀྱི་ཡིག་གཟུགས་དུས་ཆེན་ཉིན་མོར་གདོང་སྣེ་བོད་ཡིག་སློབ་འབྲིང་གི་སློབ་གཙོ་རྒན་སྐལ་བཟང་ལགས་ཀྱི་ཐུགས་ཁུར་ལ་བརྟེན་ནས་ཡིག་གཟུགས་འགྲན་བསྡུར་ཐེངས་དང་པོ་སྤེལ་ལ་ཐུབ་པ་མ་ཟད་། རྫོང་སློབ་གསོ་ཅུས་ཀྱི་ཅུས་ཀྲང་དབང་ཆེན་ལྷ་མོ་དང་རྔ་ཁུལ་བོད་ཡིག་སློབ་འབྲིང་གི་སློབ་གཙོ་གཙོ་བྱས་པའི་རང་རྫོང་གི་སློབ་གྲྭ་ཆུང་འབྲིང་གི་སློབ་གཙོ་རྣམས་དང་སྐད་ཡིག་དགེ་རྒན་མང་པོ་ཞིག་ཡུལ་དངོས་སུ་ཞུགས།
|
|
