སློབ་མའི་ཆེད་དུ་བྱེད་སྒོ་འདི་འདྲ་སྤེལ་བཞིན་ཡོད།
-------རྨ་ཆུ་རྫོང་རྒྱུན་སྡོད་བོད་རིགས་སློབ་ཆུང་གིས་དགེ་རྒན་གྱི་ཡིག་གཟུགས་འགྲན་སྡུར་བྱ་འགུལ་སྤེལ་བ།
སྤྱི་ལོ་༢༠༡༩ལོའི་ཟླ་༩བར་རྨ་ཆུ་རྫོང་བོད་རིགས་སློབ་ཆུང་གིས་སློབ་གསོའི་དར་རྒྱས་དང་བྱིས་པའི་དགོས་མཁོ་ལ་དམིགས་ནས།ཀན་ལྷོ་ཁུལ་བོད་ཀྱི་ཡིག་མཁན་མཐུན་ཚོགས་ཀྱི་ཚོགས་མི་དང་དྲུང་ཡིག་སྨོན་ལམ་མཆོག་གི་དངོས་སློབ་སངས་རྒྱས་བཀྲ་ཤིས་མཆོག་གི་སློབ་བུ་དཀའ་ཐུབ་ཚེ་རིང་ཡིག་གཟུགས་དགེ་རྒན་ལ་གདན་ཞུས་གནང་བ་ལྟར།སློབ་སྐབས་གཉིས་རིང་སློབ་གྲྭའི་བོད་སྐད་ཡིག་དགེ་རྒན་དང་གྲངས་རིག་དགེ་རྒན་ཡོངས་ལ་སྨོན་ལམ་ཕྱག་རྒྱུན་གྱི་དབུ་ཅན་འབྲི་སྟངས་ལ་གསོ་སྦྱོང་འཛིན་གྲྭ་བསྒྲུབས།
སྤྱི་ལོ་༢༠༢༠ལོའི་ཟླ་༧པའི་ཚེས་༡༥ཉིན་སློབ་གྲྭའི་འགོ་ཁྲིད་ཀྱིས་རྒྱུན་མཐུད་རིང་བཞིན་གྱི་སློབ་གསོའི་བྱེད་ཕྱོགས་རྒྱུན་འཁྱོངས་བྱས་ཏེ།སློབ་གྲྭའི་ཚོགས་འདུ་ཁང་ནས་བོད་ཡིག་ཡིག་གཟུགས་ཀྱི་འགྲན་སྡུར་གྱི་བྱེད་སྒོ་སྤེལ།
ཐེངས་འདིར་ཡིག་གཟུགས་གསོ་སྦྱོང་ལ་ཞུགས་པའི་དགེ་རྒན་༤༢འགྲན་སྡུར་ལ་ཞུགས་པ་དང་། རྫོང་སློབ་གསོ་དང་ཚན་རིག་ལག་རྩལ་ཅུས་ཀྱི་རྒན་ཆོས་སྐྱོང་ཚེ་རིང་དང་མགོན་པོ་སྐྱབས།རྨ་ཆུ་རྫོང་ཡིག་མཁན་མཐུན་ཚོགས་ཀྱི་ཚོགས་གཙོ་ཆོས་སྐྱོང་སྐྱབས།སློབ་གྲྭའི་དགེ་རྒན་བསོད་ནམས་དར་རྒྱས།སློབ་གྲྭའི་ཡིག་གཟུགས་དགེ་རྒན་དཀའ་ཚེ་རིང་བཅས་བརྩམས་ཆོས་དཔྱད་འདེམས་དགེ་རྒན་ཡིན།
སྤྱི་ལོ་༢༠༢༠ལོའི་ཟླ་༧པའི་ཚེས་༢༡ཉིན་བྱ་འགུལ་ཀྱི་འཆར་གཞི་ལྟར་ལོ་འདིའི་གསོ་སྦྱོང་འཛིན་གྲྭའི་སྤྱི་སྡོམ་མཛད་སྒོ་གཟབ་རྒྱས་ངང་ཚོགས་པ་དང་།བོད་ཀྱི་ཡིག་གཟུགས་གསོ་སྦྱོང་དང་སྤྱི་སྡོམ་འགྲར་སྡུར་ཁྲོད་ཀྱི་ཕུལ་བྱུང་ཡིག་གཟུགས་པ་མི་སྣ་བཅུ་ལ་བྱ་དགའི་གཟེངས་རྟགས་བསྩལ།
|
|
