བྲིས་པ་འཇིགས་མེད་རྒྱ་མཚོ་འོས་སྦྱོར།
བྲིས་པ་མང་རའི་འཇིགས་མེད་དམ་འཇིགས་མེད་རྒྱ་མཚོ་ནི་སྤྱི་ལོ་༡༩༧༣ལོར་མདོ་སྨད་ཐུ་རུའུ་སྡེ་བར་སྐྱེས། ༡༩༨༨ལོར་ཡབ་རྗེ་བླ་མ་དམ་པ་ཡོངས་འཛིན་ཆོས་ཀྱི་རྒྱལ་བོའི་དྲུང་ནས་རབ་ཏུ་བྱུང་སྟེ་ཐར་ཤུལ་དགོན་རྣམ་དག་ཁྲིམས་ལྡན་གླིང་གི་བསྟན་པའི་ཆོས་སྒོར་ཞུགས། དགོན་དེ་གའི་འདོན་རྟ་དབྱངས་དང་། ཐིག་རྡུལ་ཚོན། འབུད་རྡུང་དཀྲོལ་གསུམ་སོགས་ལ་སྦྱངས་བརྩོན་བྱས། ཞོར་དུ་སུམ་རྟགས་དག་གསུམ། སྒྲ་རིག་པ། སྙན་ངག གསོ་རིག བསྡུས་གྲྭ། བློ་རྟགས། གྲུབ་དོན་ས་གསུམ། ཕར་ཕྱིན། དབུ་མ། ལམ་རིམ་འཇམ་དཔལ་ཞལ་ལུང་སོགས་ལ་སྦྱངས་བའི་བག་ཆགས་ཙམ་བྱས་ཏེ་ཐར་ཤུལ་དགོན་པའི་ཚོགས་ཆོས་འགྲིམས། ༡༩༩༠ལོ་ནས་བཟུང་ཡང་དར་བསྟན་པའི་གསལ་བྱེད་ཆེན་པོ།
མཁས་དང་གྲུབ་པའི་ཁྱུ་མཆོག་དམ་པ་ཡབ་རྗེ་བླ་མ་ལ་མོའི་ཡོངས་འཛིན་རིན་པོ་ཆེ་མཆོག་གི་སྐུ་དྲུང་དུ་བཅར་ཏེ་དབུ་ཅན་དང་། དབུ་མེད་ཀྱི་དཔེ་ཚུགས་ལ་སྦྱངས་པའི་བསྐལ་བ་བཟང་བོ་ལེགས་པར་ཐོབ། དེའི་འཕྲོར་མཐུད་དེ་རང་གི་དགའ་མོས་ལྟར་རྗེས་སུ་བླ་བྲང་དགོན་པའི་ཡིག་མཁན་གྲགས་ཅན་ཨ་ཁུ་འཇིགས་མེད་ཆོས་དར་གྱི་མདུན་ནས་ཁུངས་དང་བརྒྱུད་པའི་མན་ངག་ལ་གཏུགས་ནས་ལཉྪ་དང་ཝརྟུ། ཚུགས་རིང་གསུམ་དང་། སྨྱུག་འཛིན་དབང་བོ་ཁ་གྱའི་འཇིགས་མེད་ཀྱི་མདུན་དུ་སྨོན་ལམ་ཡིག་གཟུགས་ཀྱི་དབུ་ཅན་དང་ཚུགས་ཐུང་། འཁྱུག་བྲིས་སོགས་བོད་ཀྱི་ཡིག་རིས་སྣ་ཚོགས་ལ་སྦྱངས་པ་གང་མང་བྱས། སྤྱི་ལོ་ཉིས་སྟོང་བརྒྱད་ནས་བཟུང་སྟེ་༧ ལ་མོ་གོང་ས་ཞབས་དྲུང་དཀར་པོ་སྐུ་ཕྲེང་དགུ་བ་མཆོག་གི་བཀའ་གསུང་སྤྱི་བོར་བབས་ཏེ་དྲུང་ཡིག་གི་མིང་ཙམ་ཁུར་ནས་བླ་མ་རིན་པོ་ཆེའི་ཐུགས་མཉེས་པའི་རྒྱུ་རུ་གང་འགྱུར་མཛད།
རྫོང་རིམ་པ་དང་ས་གནས་རིམ་པའི་བྱ་དགའ་སོགས་གཟེངས་རྟགས་ཅི་རིགས་ཐོབ་པར་མ་ཟད་རང་དགོན་དུའང་ཡིག་གཟུགས་ལ་དུང་བ་ཟབ་པའི་རྒན་དར་གཞོན་གསུམ་ཉུང་ཤས་ལ་ཡིག་གཟུགས་སྣ་མང་གི་ཁུངས་དང་ལྡན་པའི་སྒོ་ནས་སྐྱེད་བསྲིངས་བྱེད་དང་བྱེད་མུས་སུ་མཆིས། ད་ལྟ་ཁུལ་དང་རྫོང་རིམ་པའི་ཡིག་གཟུགས་པར་རིས་སྒྱུ་རྩལ་ལྷན་ཚོགས་ཀྱི་ཚོགས་མིའང་ཡིན།
ཀྲུང་གོ་བོད་ཀྱི་ཡིག་གཟུགས་དྲ་བའི་རྩོམ་སྒྲིག་ཁང་ནས།
|
|
