བྲིས་པ་བཀྲ་ཤིས་ནོར་བུ་འོས་སྦྱོར།
བྲིས་པ་བཀྲ་ཤིས་ནོར་བུའམ་སྨྱུག་མིང་ལྷོ་ཡི་དྲི་བཞོན་ནི་སྤྱི་ལོ༡༩༩༤ལོའི་ཟླ་༤པར་བོད་ལྗོངས་ལྷོ་ཁ་ས་ཁུལ་ལྷོ་བྲག་རྫོང་ལྷ་ཁང་གྲོང་བརྡལ་དུ་ལྟེ་ཁྲག་འཕོས།
ཆུང་དུས་ནས་ཕ་མ་བཟང་པོའི་བཀའ་སློབ་དང་སློབ་དཔོན་བཟང་པོའི་གདམས་ངག་འོག་རང་རིགས་ཀྱི་རིག་གནས་ལ་སྦྱང་བརྩོན་བྱེད་པར་བློ་སྒོ་ཕྱེ་བ་དང་།ལྷག་པར་དུ་བྱེ་བྲག་བོད་ཀྱི་ཡིག་གཟུགས་སྒྱུ་རྩལ་ལ་སྦྱང་པ་བྱེད་པར་དེ་བས་སྤྲོ་བ་ཞིག་ཏུ་འགྱུར་ཡོད།
ཁོ་བོ་༢༠༡༧ལོར་བོད་ལྗོངས་ལྷ་ས་དགེ་འོས་སློབ་ཆེན་ནས་མཐར་ཕྱིན། ད་སྐབས་ཁོ་བོས་རང་ཉིད་ཀྱི་དགའ་ཕྱོགས་དེ་རྒྱུན་བསྐྱངས་ནས།དུས་དང་རྣམ་པ་ཀུན་དུ་འབད་བརྩོན་ལྷོད་མེད་བྱེད་བཞིན་མཆིས། དེ་དང་ལྷན་དུ་ལྷག་བསམ་གངས་ལ་འགྲན་པའི་སློབ་དཔོན་མི་ཉུང་བ་ཞིག་གིས་རིན་བྲལ་བཀའ་སློབ་སྨར་ཁྲིད་གཅིག་རྗེས་གཉིས་མཐུད་གནང་བས་ད་ལྟ་གྲུབ་འབྲས་གང་ལ་གང་ཙམ་ཞིག་ཐོབ་ཡོད།
ད་ལྟའི་གྲུབ་འབྲས་དེ་རྣམས་ནི་ཁོ་བོར་ལྷག་བསམ་ཟོལ་མེད་ཀྱིས་བཀའ་སློབ་གནང་མཁན་གྱི་བཤེས་གཉེན་རྣམས་ཀྱི་བཀའ་དྲིན་ཡིན་པས། ཁོ་བོས་སོར་བཅུའི་ཐལ་མོ་སྙིང་ཁར་སྦྱར་ནས་ སློབ་དཔོན་རྣམས་ལ་སྙིང་ཁོངས་རུས་པའི་གཏིང་ནས་བཀྲིན་ཆེ་ཞུ་བ་མ་ཟད་ཁྱེད་རྣམས་ཀྱི་མཛད་འཕྲིན་ཡར་ངོའི་ཟླ་ལྟར་འཕེལ་བའི་སྨོན་འདུན་ཞུ།
༢༠༡༧ལོ་ནས་འགོ་བརྩམས་ཏེ་བོད་ཀྱི་ཡིག་མཁན་ཆེ་མོ་རྒན་འགྱུར་མེད་ཚུལ་ཁྲིམས་མཆོག་གི་སྐུ་དྲུང་ནས་ལཉྩའི་ཡིག་གཟུགས་ལ་སྦྱང་འགོ་བཙུགས་པ་དང་། དུས་མཚུངས་རྒྱལ་ཁབ་རིམ་པའི་དགེ་རྒན་ཆེན་མོ་དང་དབང་རྡོ་དགོན་གསང་བདག་རྡོ་རྗེ་ལགས་ཀྱི་སྐུ་དྲུང་ནས་གཞུང་བྲིས་ཚུགས་རིང་ཐུང་དང་དགེ་རྒན་ཆེན་མོ་གླིང་དབོན་པདྨ་སྐལ་བཟང་ལགས་ཀྱི་སྐུ་དྲུང་ནས་འཁྱུག་ཡིག་ལ་སྦྱང་བརྩོན་བྱས།
ཚེ་སྔོན་སྨོན་ལམ་བཟང་པོས་༢༠༡༨ལོར་དབུས་ལྷ་སར་རྒྱལ་ཁབ་རིམ་པའི་སྡེར་ས་བྲིས་བརྒྱུད་འཛིན་པ་རྒན་སེང་གེ་དར་རྒྱས་མཆོག་གི་སྐུ་དྲུང་ནས་སྡེར་ནང་ས་བྲིས་ཀྱི་བྲིས་རྒྱུན་དངོས་ཐོབ།
བརྗོད་འདོད་པའི་སྐད་ཆ་ནི་༼ རང་སྐད་ནི་སྲོག་ཡིན་པས་རྟག་ཏུ་སྤྱོད་པར་འཚལ། ༽ མ་འོངས་ལོ་ཟླའི་ནང་ཁོ་བོས་གྲུབ་འབྲས་ཆུང་ཆུང་དེ་འདྲ་ཞིག་ལ་ཡིད་ཚིམས་ནས་མ་སྡད་པར་སྔར་ལས་ལྷག་པའི་འབད་བརྩོན་བྱེད་རྒྱུའི་གདམ་བཅའ་སྙིང་ལ་བརྟེན་པོར་བཅངས་ཡོད།
ཁོ་བོ་ད་ལྟ་བོད་ལྗོངས་ལྷ་ས་གངས་བརྩེ་དམངས་གཉེར་སློབ་གྲྭར་རང་ཉིད་ཀྱིས་ཤེས་པའི་ཡིག་གཟུགས་རྣམས་སློབ་མ་རྣམས་ལ་བརྒྱུད་སྤྲོད་བྱེད་པ་དང་སློབ་མས་རང་མི་རིགས་ཀྱི་སྲོལ་རྒྱུན་ཡིག་གཟུགས་ལ་དགའ་ཞེན་དང་འབད་བརྩོན་། བེད་སྤྱོད་སོགས་བྱེད་པའི་སྐུལ་འདེད་ཡང་ཡང་བྱས་ནས་རང་མི་རིགས་ཀྱི་ཕུན་སུམ་ཚོགས་པའི་མེས་པོའི་ཕྱག་རྒྱུན་གོང་འཕེལ་ཡོང་བར་རང་ནུས་ཅུང་ཟད་འདོན་མུས་སུ་མཆིས།
བོད་ཀྱི་ཡིག་གཟུགས་དྲ་བའི་ཡིག་གཟུགས་ཉིན་མོའི་ལེ་ཚན་རྩོམ་སྒྲིག་ཁང་ནས།
|
|
