བྲིས་པ་ཨ་གཡག་རྒྱ་གོ་འོས་སྦྱོར།
བྲིས་པ་ཨ་གཡག་རྒྱ་གོ་ནི་1974ལོར་མཚོ་སྔོན་གཅན་ཚ་རྗོང་དུ་སྐྱེས། 1998ལོའི་ཟླ7པར་མཚོ་སྔོན་དགེ་ཐོན་སློབ་ཆེན་བོད་ཀྱི་སྐད་ཡིག་རྩོམ་རིག་སྡེ་ཁག་ནས་སློབ་མཐར་ཕྱིན། སློབ་ཆེན་གྱི་སྐབས་སུ་དགེ་བའི་བཤེས་གཉེན་ཆེན་མོ་གུ་རུ་རྒྱལ་ཚང་དང་དགེ་རྒན་ཆེན་མོ་རིན་ཆེན་བཀྲ་ཤིས་ལགས། དགེ་རྒན་ཆེན་མོ་རྒྱ་ཡེ་བཀྲ་བྷོ་ལགས། དགེ་རྒན་ཆེན་མོ་ཟླ་བ་ལགས། དགེ་རྒན་ཆེན་མོ་དོན་གྲུབ་ཚེ་རིང་ལགས། དགེ་རྒན་ཆེན་མོ་པད་གོ་སོགས་ཀྱི་མདུན་ནས་བོད་ཀྱི་བརྡ་སྤྲོད་སུམ་རྟགས་དག་གསུམ་དང་ཚད་མ་རིག་པ། སྒྲ་དང་རྩོམ་རིག བོད་ཀྱི་གནའ་རབས་ལོ་རྒྱུས་དང་རྩོམ་རིག་ལོ་རྒྱུས། བོད་ཡིག་ཡིག་གཟུགས་དང་རི་མོ་སོགས་ལ་སློབ་གཉེར་བྱས། མཚོ་སྔོན་ཞིང་ཆེན་བོད་ཡིག་ཡིག་གཟུགས་རྒྱུན་འཛིན་དར་སྤེལ་ཞིབ་འཇུག་ཚོགས་པའི་ཚོགས་མི་དང་མཚོ་སྔོན་ཞིང་ཆེན་རྨ་ལྷོ་ཁུལ་ཡིག་གཟུགས་པ་མཐུན་ཚོགས་ཀྱི་ཚོགས་མི། མཚོ་སྔོན་ཞིང་ཆེན་རྨ་ལྷོ་ཁུལ་མཛེས་རྩལ་པ་མཐུན་ཚོགས་ཀྱི་དྲུང་ཡིག་ཆེན་མོ་གཞོན་པ། མཚོ་སྔོན་ཞིང་ཆེན་གཅན་ཚ་རྫོང་བཟོ་རིག་མཛེས་རྩལ་མཐུན་ཚོགས་ཀྱི་རྒྱུན་ལས་ལས་འཛིན་པ་བཅས་ཡིན། སྔ་ཕྱིར་ཞིང་ཆེན་ཕྱི་ནང་གི་རི་མོ་འགྲེམས་སྟོན་དང་བོད་ཀྱི་ཡིག་གཟུགས་འགྲེམས་སྟོན་སྟེང་བྱ་དགའ་ཐེངས་30་ལྷག་ཐོབ་མྱོང་། བརྩམས་ཆོས་ལ་《རི་མོ་ལ་འཇུག་པའི་སྒོ》དེབ་གཅིག་དང་《བོད་ཀྱི་སློབ་གྲྭ་ཆུང་འབྲིང་གི་རི་མོའི་བསླབ་དེབ》དེབ་གཉིས། ཡིག་གཟུགས་བརྩམས་ཆོས་《གུང་ཐང་བསྟན་པའི་སྒྲོན་མེའི་བསླབ་བྱ་ནོར་བུའི་གླིང་དུ་བགྲོད་པའི་ལམ་ཡིག》སོགས་ཡོད། ད་ལྟ་མཚོ་སྔོན་ཞིང་ཆེན་གཅན་ཚ་རྫོང་མི་རིགས་སློབ་འབྲིང་ན་མཛེས་རྩལ་དགེ་རྒན་གྱི་བྱ་བ་ལས་བཞིན་ཡོད།
རྩོམ་སྒྲིག ཀྲུང་གོ་བོད་ཀྱི་ཡིག་གཟུགས་དྲ་བའི་གཞུང་ལས་ཁང་ནས།
|
|
