「ནང་དོན་གནད་བསྡུས།」ཡིག་གཟུགས་སྦྱོང་བའི་སློབ་གསོ་ནི་མི་རིགས་དང་རྒྱལ་ཁབ་ལ་མཁོ་བའི་བྱ་གཞག་གལ་ཆེན་ཞིག་ཡིན། མིའི་
གཤིས་ཀ་དང་བྱ་སྤྱོད་ཇེ་ལེགས་སུ་གཏོང་བའི་ཐབས་ལམ་གལ་ཆེའི་ནང་གི་འགངས་ཆེན་ཞིག་ཡིན།
「གནད་ཚིག」ཡིག་གཟུགས། མི་གཤིས།
དེ་ཡང་འཛམ་གླིང་གི་མི་རིགས་གང་འདྲ་ཡིན་རུང་དེའི་རྒྱལ་ཁབ་དང་མི་བཟང་ངན་སོགས་དབྱེ་འབྱེད་མེད་པར་དང་པོ་མི་རིགས་དེའི་སྐད་བྱུང་བ་དང་།དེ་ནས་རིམ་གྱིས་མི་རིགས་སྐད་ཀྱི་འབྱུང་ཁུངས་ཀྱང་དེ་དང་འདྲ་མཚུངས་ཡིན། ཤེས་རིག་གི་རིན་ཐང་རྩ་བ་ནི་ཤེས་རིག་དེ་ལ་ལོ་རྒྱུས་རང་རྐང་ཐུབ་པ་ཞིག་ཡོད་དང་མེད་ལ་ཐུག་ཡོད།རྩ་བ་ནི་མི་རིགས་ རང་ཉིད་ཀྱི་སྐད་དང་ཡི་གེ་གཉིས་ལ་རག་ལས་ཡོད་པས། སྐད་ཀྱི་གདངས་ལ་ཡི་གེ་ཞེས་མིང་བྱུང་། དེ་ཡང་གདངས་ཀྱི་རྣམ་པ་ཕྱི་གཟུགས་སུ་ཤར་བའི་ཡིག་གཟུགས་བྱུང་། ཐོན་མིའི་སྔོན་ལ་ཡི་གེ་དང་ཡིག་གཟུགས་བྱུང་བ་ལ། སྟག་གཟིགས་སྤུངས་ཡིག་དང་། གཡུང་དྲུང་བོན་ཆོས་བཏོད་པའི་དུས་སུ་ཡང་། ལྷ་བབ་ཡི་གེ གཟི་ཡིག སྨར་ཆེན། སྨར་ཆུང་སོགས་ཡིག་གཟུགས་མང་པོ་བྱུང་ཡོད་པ་མ་ཟད་ཡིག་གཟུགས་ཀྱང་དངོས་སུ་མཐོང་རྒྱུ་ཡོད་པ་གངས་ལྗོངས་ཡིག་གཟུགས་ཀུན་བཏུས་ཞལ་ཐང་ཆེན་མོ་ལས་གསལ། དེ་ཡང་སྔོན་བྱོན་མཁས་པ་རྣམ་པའི་གསུངས་ལས་ཐོན་མིས་སྨར་ཡིག ཞང་ཞུང་གི་ཡིག་རྒན།སྨར་ཆུང་སོགས་ལ་དཔྱད་དེ་བོད་ཡིག་འདི་གསར་དུ་བཏོད་པར་བཞེད་པ་ཡོད།ཐོན་མིས་ལེགས་སྦྱར་གྱི་ཡི་གེ་དཔེར་བྱས་ནས་བཟོས་པ་ཀུན་མཐུན་ཡིན་པར་འདོད། དེ་ཡང་ལཉྩ་དཔེར་བྱས་ནས་དབུ་ཅན་དང་། ཝརྟུ་དཔེར་ བྱས་ནས་དབུ་མེད་བཟོས་པ་ཡོངས་གྲགས་སོ། ཐོན་མིས་བོད་ཡིག་དཔེ་ལེན་ས་སྦལ་ནག་ན་ལ་བགྲད་པའམ（གནམ་ལ་རྒྱང་བ་འདྲ་བ）ཞེས་པ་དེ་ཡིན། བསྟན་པ་སྔ་དར་སྐབས་སུ་བྱུང་བའི་ཡིག་གཟུགས་མཁས་པ་ནི།
༡ ཐོན་མའི་ཡིག་ཕུད་ནི་སྦལ་ནག་ན་ལ་བགྲད་འདྲ་ཞེས་གྲགས་པ་དེ་ནི་ཞང་ཞུང་ཡིག་རྒན་ལ་བཟོ་བཅོས་མཛད་པ་དེ་ཡིན་ཟེར།
༢ མང་སྲོང་མང་བཙན་གྱི་དུས་སུ་བྱུང་བའི་ཡིག་གཟུགས་མཁས་པ་ཆ་ངར་རིན་ཆེན་འབར་ཞེས་པས་ཡིག་གཟུགས་སོ་ཕག་གཤིབ་འདྲ་ཞེས་པར་གྲགས།
༣ འདུས་སྲོང་མང་བོ་རྗེའི་དུས་སུ་ཆབ་དཀར་བེའུ་ཚེ་ཟེར་བས་བྲིས་པ་ལ་བྱ་ཕོ་འཇོལ་བ་འདྲ་བ་ཞེས་པར་གྲགས།
༤ ཁྲི་ལྡེ་གཙུག་བརྟན་གྱི་དུས་སུ་དགེ་བསྙེན་དཀོན་མཆོག་དབང་ཟེར་བས་བྲིས་པ་ལ་ནས་སྔོན་ཕྱིང་དཀར་གྱི་སྟེང་དུ་བཀྲམ་པ་འདྲ་བ་ཞེས་པར་གྲགས།
༥ ཁྲི་སྲོང་ལྡེའུ་བཙན་གྱི་དུས་སུ་ཡིག་མཁན་བྷེ་ཤོ་ཁྲམ་གྱིས་བྲིས་པ་ལ་མུ་ཏིག་བསྟར་ལ་རྒྱུས་པ་ཞེས་པར་གྲགས།
༦ མུ་ནེ་བཙན་པོའི་དུས་སུ་ཡིག་མཁན་ཚེ་སྤང་བྱང་ཆུབ་ཟེར་བས་བྲིས་པ་ལ་སྤུར་ནག་བགྲད་པ་འདྲ་ཞེས་པ་ ཞིག་བྱུང་།
༧ མུ་ཏིག་བཙན་པོའི་དུས་སུ་འབྲེ་བ་ཡོན་ཏན་ཟེར་བས་བྲིས་པ་ལ་ཉ་མོ་ཆུ་ནང་ནས་ཐོན་པ་འདྲ་བ་ཞེས་པར་གྲགས།
༨ ཁྲི་སྡེ་སྲོང་བཙན་རལ་བ་ཅན་གྱི་དུས་སུ་ཡིག་མཁན་གྲ་ཤོད་རྣམ་གཉིས་ཀྱིས་བྲིས་པ་ལ་སེང་གེ་གནམ་དུ་འཕྱོངས་འདྲ་ཞེས་པར་གྲགས།འདི་དག་ནི་བསྟན་པ་སྔ་དར་དུས་ཀྱི་ཡིག་གཟུགས་དངོས་སུ་འཇལ་རྒྱུ་ཡོད་པའི་ཡིག་མཁན་གྲགས་ཆེན་ རྣམས་སོ། །དེ་ནས་རིམ་བཞིན་བསྟན་པ་ཕྱི་དར་སྐབས་སུ་ཡང་ཡིག་མཁན་སྒྲོ་གཉའ་ཁྲི་དང་དེ་ནས་ཤཱཀྱ་རྡོ་རྗེ་དང་། ཀ་ཁྱུང་རྣམ་གཉིས། ཁྱད་པར་ཁྱུང་བོ་གཡུ་ཁྲི།སྣ་ནམ་ཞང་བཙུན་སུམ་པ་གནོད་བཞིན་སོགས་བྱུང་ནས་ལྷག་པར་ཁྱུང་པོ་གཡུ་ཁྲི་ལ་ཡིག་མཁན་སློབ་མ་བཅུ་གཉིས་བྱུང་། ཆེད་མཁས་པ་རོང་པོ་ཟེར་བ་སོགས་བྱོན་ནས་ད་ལྟའི་ཁྱུང་པོ་གཡུ་ཁྲིའི་ ཕྱག་རྒྱུན་འབྲི་སྲོལ་དར་བར་གྲགས། དེ་ནས་དུས་རབས་བཅོ་བརྒྱད་པའི་ནང་དུ་སྡེབ་བྲིས་བྱུང་། སྡེ་དགེ་རྒྱལ་པོ་ཆོས་རྒྱལ་བསྟན་པ་ཚེ་རིང་སྦྱིན་བདག་མཛད་ནས། མཁས་དབང་སི་ཏུ་པཎ་ཆེན་དང་ཞུ་ཆེན་ཚུལ་ཁྲིམས་རིན་ཆེན་རྣམ་གཉིས་གཙོ་ བྱས（ཁམས་དབུས་ཨམ་གསུམ་བསྡུས་ཏེ）སྐར་བྲིས། བྲིས་གསར་སོགས་འབྲི་ཚུགས་རང་རྐང་ཚུད་པ་རང་རང་གི་ཁྱད་ཆོས་དང་སྤྱི་ཚོགས་ཀྱི་གནས་བབས་དང་ཁོར་ཡུག་གི་ཤུགས་རྐྱེན་སོགས་ལ་ཞུགས་ནས་དབུ་ཅན་དང་དབུ་མེད་དམ་སྒྲིབ་གསལ་གབ་མངོན་གྱི་ཆ་ནས་བཏགས་པའི་ཡིག་དཀར་དང་ཡིག་ནག་དར་ཁྱབ་བྱུང་མོད་ཁྱུང་པོ་གཡུ་ཁྲིས་ཕྱག་རྒྱུན་ལས་ མ་འདས་སོ། །
གཞན་ཡང་བླ་བྲང་བཀྲ་ཤིས་འཁྱིལ་གྱི་ཕྱག་རྒྱུན་ཡང་རྩེ་དྲུང་ཡིག་གི་ཕྱག་རྒྱུན་ཡིན་པར་བཤད། བླ་བྲང་བཀྲ་ཤིས་འཁྱིལ་དུ་སྔ་སོང་དཔང་ལོ་ཙཱ་བའི་ཕྱག་བྲིས་དངོས་དང་།ཀུན་མཁྱེན་འཇིགས་མེད་དབང་བོའི་དབུས་ནས་ཞུས་ཏེ་ཕེབས་པའི་ཕྱག་རྒྱུན། སྡེ་སྲིད་སངས་རྒྱས་རྒྱ་མཚོའི་ཐིག་འགྲེལ་དང་དགའ་ལྡན་ཡིག་གསར་མདོ་སྨད་ཁུལ་དུ་བོད་བྲིས་ཟེར། ད་དུང་དབུས་བྲིས་ཞེས་འབོད་པ་བཅས་རིམ་བཞིན་འཕེལ་རྒྱས་བྱུང་ནས་དེང་སྐབས་ཀྱི་སློབ་དཔོན་དམུ་དགེ་བསམ་གཏན་ཚང་དང་ཡིག་མཁན་སྨོན་ལམ་རྒྱ་མཚོ་ཚང་གི་ཡིག་གཟུགས་བློ་གསལ་སྤྱི་ནོར་སོགས་ཀྱི་ཕྱག་རྒྱུན་ཁྱུང་བོ་གཡུ་ཁྲིའི་ཆ་ཆེན་ཆ་ཆུང་གི་ཐིག་རྩ་ལྟར་སྤེལ་བ་ཡིན་པར་སྙམ།དེ་བཞིན་ཕུལ་བྱུང་ཤེས་རིག་དང་ཞུམ་མེད་སྙིང་སྟོབས་ཀྱིས་རབ་ཏུ་ཕྱུག་པའི་རང་རྒྱལ་གྱི་མི་རིགས་ང་དྲུག་གི་ལོ་རྒྱུས་འཕེལ་རྒྱས་ཀྱི་དུས་ཡུན་རིང་བོའི་ནང་བསགས་པའི་གོ་གནས་ཚད་མཐོན་པོར་ སླེབས་ཡོད་ཅིང་། དེང་སྐབས་རིག་གནས་མཐའ་དག་དབྱར་མཚོ་རྒྱས་པ་ལྟར་འགྲོ་བ་དང་ཆབས་ཅིག རིག་པའི་ གཞུང་ལུགས་ཀྱི་མ་ལག་ལྡན་པའི་ཡིག་གཟུགས་སྐོར་འབྲི་ཚུལ་དང་ཁྱད་ཆོས་མི་འདྲ་བའི་བྲིས་དཔེ་སྣ་ཚོགས་གཅིག་རྗེས་ གཉིས་མཐུད་དུ་ཐོན་ནས་མི་རིགས་རང་་གི་རིག་གནས་སྔར་ལས་ལྷག་པ་ཞིག་ཡར་རྒྱས་འགྲོ་རྒྱུར་སྐུལ་འདེད་དང་ཐུགས་བསམ་ནན་མོ་གཏོང་དགོས། དེང་གི་སྤྱི་ཚོགས་འདིར་ཚན་རིག་ལག་རྩལ་དར་རྒྱས་བྱུང་བཞིན་པའི་སྒང་ལ་ཀློག་ཀླད་དར་ བས་རྗེས་རབས་པ་རྣམ་པའི་ཡི་གེ་དང་ཡིག་གཟུགས་འབྲི་མི་ཤེས་པར་བགེག་དང་བར་ཆད་ཡོད་པས། ཡི་གེ་དང་ཡིག་ གཟུགས་འབྲི་མ་ཤེས་ན་རྒྱལ་ཁབ་དང་མི་རིགས་ལ་གྱོང་རྒུད་ཚབ་ཆེན་ཐེབས་པས།བོད་ཀྱི་ཡིག་གཟུགས་སྤྱི་ལ་གཞུང་ལུགས་ཀྱི་རང་བཞིན་ལྡན་པ་དང་། མི་རིགས་ཀྱི་རང་བཞིན་སྨྲ་མི་དགོས། མང་ཚོགས་ཀྱི་རང་བཞིན། རྒྱལ་སྤྱིའི་རང་བཞིན། ཡུན་རིང་གི་རང་བཞིན་བཅས་ཀྱང་ཚང་ཡོད་པས་ང་ཚོས་ཁྱད་ཆོས་དེ་དག་ལ་བསམ་གཞིགས་དང་ཞིབ་འཇུག་བྱེད་དགོས་སྙམ། ཡི་གེ་དང་ཡིག་གཟུགས་ལེགས་པོ་ཞིག་འབྲི་མ་ཤེས་ན་དམག་དོན་དང་ཆབ་སྲིད། དཔལ་འབྱོར། ལོ་རྒྱུས། རིག་གནས་ཐམས་ཅད་ཅི་ཞིག་གིས་འགྲེམ་སྤེལ་དང་གསར་གཏོད་བྱེད།དེ་བས་འཛམ་གླིང་ཞི་བདེ་དམིགས་པའི་དུས་ འདིར། བོད་ཀྱི་ཡིག་གཟུགས་ལ་ལྷག་པར་དུ་མི་གཤིས་སྦྱོང་བའི་ནུས་པ་ཁྱད་པར་བ་ཡོད་དེ། དབུ་ཅན་ཚད་ལྡན་ཞིག་འབྲི་སྦྱོང་བྱས་ན་མི་དེའི་རང་གཤིས་བརྟན་ལ་ངང་རྒྱུད་འཇམ་པའི་མི་གཤིས་སྦྱོང་ཐུབ་པ་མ་ཟད་བློ་བརྟན་འགྱུར་ མེད་ཀྱི་བྱ་བ་དང་དོན་དག་མཐར་ཕྱིན་པ་བསྒྲུབ་ཐུབ།ཡིག་མགོ་ཚང་མ་ཐིག་གཅིག་གི་ཐོག་ཏུ་སྒྲིག་ཡོད་པས་ཕན་ཚུན་འདྲ་མཉམ་དང་དྲང་ས་དྲང་ལ་གུག་འཁྱོག་ཇི་འདྲ་སོང་ཡང་ཕན་ཚུན་གནོད་པ་མི་བྱེད་པས་རྐྱང་མང་ཕེར་གསུམ་གྱི་ཁྱད་ཆོས་ལྡན་པ་མ་ཟད། སེམས་ཁམས་གཏན་འཇགས་སུ་གནས་པར་ཕན་པ་བླ་ལྷག་ཏུ་ཐོན་ཐུབ། མི་རྩིང་རྩིང་ཞིག་གིས་ཡིག་གཟུགས་ལེགས་པོ་ཞིག་འབྲི་མི་ཐུབ་པ་མ་ཟད་བྱ་བ་དང་དོན་དག་བསྒྲུབ་པ་ཡང་དེའི་རང་བཞིན་ཡིན། དེ་བས་སློབ་མ་ཁྲི་སྟོང་མང་བོ་ལ་རང་རང་གི་གཤིས་ལུགས་ལྟར་ཡིག་གཟུགས་འདྲ་མིན་སྣ་ཚོགས་འབྱུང་བཞིན་པ་བྱིའུ་ཁ་བའི་ ནང་སོང་བའི་སུག་རྗེས་འདྲ་འདྲ། རྟ་རྒན་འདྲ་འདྲ། གཡག་རྒན་འདྲ་འདྲ། འབུ་དང་གྲོག་མའི་རྗེས་ཤུལ་འདྲ་འདྲ་བྱུང་བ་ལས་གསལ་ལོ། །
དེ་བས། བོད་ཀྱི་ཡིག་གཟུགས་ལ་མཛེས་དཔྱོད་ཀྱི་ལྟ་བ་ཕུན་སུམ་ཚོགས་པ་ཞིག་ཡོད་པ་གདོན་མི་ཟ་ལ། ཡིག་གཟུགས་ལ་རྣམ་གྲངས་ཇི་འདྲ་མང་ནའང་འགྲོ་བ་མིའི་གཟུགས་གཞིའི་ཁྱད་ཆོས་ལས་མ་འདས་པ་མེད་པ་འདྲ་སྙམ། གང་ཡིན་ཞེ་ན།ཡི་གེའི་གཟུགས་ལ་ཤ་དང་རུས་པ་ཡོད་པ་མ་ཟད་སྲོག་ལྡན་པའི་མ་བུ་དང་རྒྱན་ཆ་འདོགས་ལུགས་སོགས་ ཀྱི་ཁྱད་ཆོས་ལྡན་པའི་མི་ལུས་ཀྱི་མཛེས་དཔྱོད་ལྟ་བ་དང་མཚུངས་པར་དཔྱད་པ་བཏང་ན་ཆོག་སྙམ།མི་ལུས་རིན་པོ་ཆེའི་ གཟུགས་གཞི་དེ་སྔོན་བསགས་ལས་དབང་གིས་གྲུབ་པས། རང་རང་ལ་མཚུངས་པའི་གཟུགས་གཞི་དང་དེ་ལ་དེ་མཚུངས་ཀྱི་ ཁྱད་ཆོས་ཕུན་སུམ་ཚོགས་པ་རེ་ཡོད་པས་ཡིག་གཟུགས་ཀྱང་དེ་ལྟར་མིའི་ལུས་བོ་བསྡུར་ནས་དཔྱད་ན་མི་ཆོག་པ་མེད་སྙམ། དེ་ལྟར་ང་ཚོ་བོད་ཀྱི་རིག་གནས་དང་ལྷག་པར་སློབ་གསོ་དང་ཆོས་ལུགས། ཚན་རིག་སོགས་ལ་བོད་ཀྱི་ཡིག་གཟུགས་ནི་ མེད་ཐབས་མེད་པས། སྐྱབས་བཅོལ་སའི་བླ་སྤྲུལ་དང་། བྱམས་ལྡན་གྱི་དཔོན་པོ། ལམ་སྟོན་གྱི་བཤེས་གཉེན་སོགས་དེ་ལུགས་མཁས་པ་ཚོས་ཐུགས་བསམ་ལེགས་པོ་རེ་གནང་བར་ཐུགས་རྗེ་ཆེ་ཞུ་བ་དང་ཆབས་ཅིག ང་ཚོ་མདོ་སྨད་ན་སློབ་གྲྭ་ ཆེ་འབྲིང་ཆུང་གསུམ་ལ་བོད་ཀྱི་ཡིག་གཟུགས་ཀྱི་སློབ་གསོ་དང་སློབ་ཁྲིད་ལག་ལེན་བྱེད་ཀྱིན་་མེད་པ་ནི་དོན་གནད་གལ་ ཆེན་ཞིག་ཏུ་འདོད་དོ། །
དཔྱད་གཞིའི་དཔེ་ཆ།
（༡）《ཡིག་གཟུགས་འབྲི་དཔེ》 ལྗོངས་ཞིང་་ལྔའི་མཉམ་བསྒྲིགས་སློབ་གཞི། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། ༢༠༠༢ལོའི་ཟླ༥བའི་ཐེངས༧པ་དཔར།
（༢）《བོད་ཡིག་འབྲི་ཚུལ་མཐོང་བ་ཀུན་སྨོན》དཔའ་རིས་སངས་རྒྱས་ཀྱིས་བརྩམས། མི་རིགས་དཔེ་སྐྲུན་ཁང་།
（༣）《ཡིག་གཟུགས་བློ་གསལ་སྤྱི་ནོར》སྨོན་ལམ་རྒྱ་མཚོས་བྲིས། སི་ཁྲོན་རྔ་བ་ཁུལ་བོད་ཡིག་རྩོམ་སྒྱུར་ཅུས་ཀྱིས་རབ་རྒྱལ་ཆུ་ཕོ་ནོར་སྐྱོང་གི་ལོའི་སྤྱི་ལོ༡༩༨༢ལོའི་ཟླ༥བར་ས་ག་ཟླ་བར་བསྐྲུན་བྱས་པའོ༎
（༤）《བོད་ཀྱི་ཡི་གེའི་རྣམ་བཤད་སེང་གེའི་ང་རོ》དཔལ་བསྡུས་ཀྱིས་བརྩམས། སི་ཁྲོན་དཔེ་སྐྲུན་ཚོགས་པ། སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན།
（༥）《ཡིག་གཟུགས་ཀྱི་རྣམ་བཤད་དུང་གི་ཟླ་བ》ཚེ་ཏན་ཞབས་དྲུང་གིས་བྲིས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན།
（༦）《ཐོན་མིའི་མཛུབ་རིས》ཨ་ལག་ཚེ་ཏན་ཞབས་དྲུང་གི་བརྩམས།
（༧）《བོད་ཡིག་དབུ་ཅན་དབུ་མེད་ཀྱི་མ་ཕྱི》 ཚེ་ཏན་ཞབས་དྲུང་གིས་བྲིས། མཚོ་སྔོན་མི་རིགས་དཔེ་སྐྲུན་ཁང་ ༡༩༦༤ལོར།པར་དུ་བསྐྲུན།
（༨）《བོད་ཡིག་འབྲི་ཚུལ་གི་མ་་ཡིག》མཚོ་སྔོན་ཞིང་ཆེན་སློབ་གྲྭ་ཆུངའབྲིང་གི་སློབ་དེབ་རྩོམ་སྒྲིག་ཙུའུ་ནས་སྒྲིག མཚོ་སྔོན་མི་དམངས་དཔེ་སྐྲུན་ཁང་གིས་བསྐྲུན། མཚོ་སྔོན་ཞིན་ཧྭ་དཔར་ཁང་གིས་དཔར།
（༩）《གཟབ་གཤར་མཛེས་རྩལ་གྱི་བོད་ཡིག་ཇི་ལྟར་འབྲི་བའི་མ་ཕྱི》མཚོ་སྔོན་མི་དམངས་དཔེ་སྐྲུན་ཁང་གིས་བསྐྲུན།
（༡༠）《གངས་ཅན་མཁས་པའི་ཕྱག་བྲིས་སྣ་ཚོགས་ཕྱོགས་བསྡུས་རིན་ཆེན་ཕྲེང་བ》 གོ་བ་དབྱིག་དང་ཧྲི་ཞོད་ལིས་ཀྱིས་སྒྲིག ཀན་སུའུ་མི་རིགས་དཔེ་སྐྲུན་ཁང་གིས་བསྐྲུན།
（༡༡）《གངས་ལྗོངས་ཡིག་གཟུགས་ཀུན་བཏུས་ཞལ་ཐང》བོད་ལྗོངས་དགའ་སྐྱིད་གླིང་འཛུགས་སྐྲུན་ཚད་ཡོད་ཀུང་སིའི་གྲོས་གཞི་ཚོ་ཆུང་གིས་རྩོམ་སྒྲིག་བྱས། བོད་ལྗོངས་མི་དམངས་དཔེ་སྐྲུན་ཁང་།
|
|
