བསོད་ནམས་ཚེ་རིང་ནི་བསང་ཆུ་རྫོང་ཁོ་ཚེ་ཞང་ཁོ་ཚེ་ལྷ་སྡེ་རུ༡༩༧༠ལོའི་ཟླ་༥བའི༢༠ཉིན་སྐྱེས། ཆུང་དུས་ནས་ཁོ་ཚེ་སློབ་ཆུང་ནས་ཡི་གེ་འབྲི་ཀློག་ཐོག་མར་སྦྱངས། སློབ་ཆུང་ལོ་རིམ་གསུམ་པ་ནས་བཟུང་ཞང་བོ་འཇམ་དབྱངས་ཤེས་རབ་ལས་ཡིག་གཟུགས་དབུ་ཅན་དང་དབུ་མེད་འབྲི་སྲོལ་ཐོག་མར་བསླབ།
༡༩༨༤ལོར་བསང་ཆུ་རྫོང་བོད་རིགས་སློབ་འབྲིང་དུ་དམའ་འབྲིང་དང་མཐོ་འབྲིང་སློབ་གཉེར་བྱས། དེའི་ཞོར་དུ་ལོ་ལྔ་དང་ཕྱེད་ཀྱི་རིང་ལ་བླ་བྲང་བཀྲ་ཤིས་འཁྱིལ་གྱི་འཇམ་པའི་དབྱངས་གུང་ཐང་བསྟན་པའི་དབང་ཕྱུག་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེའི་དྲུང་ཡིག་ཆེན་མོ་དགེ་བའི་བཤེས་གཉེན་རྗེ་ངག་དབང་རྒྱ་མཚོའི་དྲུང་ནས་དབུ་ཅན་དབུ་མེད་ཀྱི་འབྲི་སྟངས་ལ་རིམ་པ་ལྟར་སྦྱངས།
༢༩༩༠ལོར་གཙོས་མི་རིགས་དགེ་ཐོན་ཆེད་གཉེར་སློབ་གྲྭར་ཞུགས། དེའི་ཞོར་ལ་རྒན་སངས་རྒྱས་བཀྲ་ཤིས་ཀྱི་མདུན་ནས་ལོ་བཞི་ལྷག་ལ་ཡིག་གཟུགས་ཁྲིད་སྦྱོང་དང་ལས་བྱ་སྤྲད། ༡༩༩༣ལོར་གཙོས་བོད་རིགས་སློབ་འབྲིང་དུ་དགེ་རྒན་གྱི་ལས་གནས་བགོས། དམའ་འབྲིང་དང་མཐོ་འབྲིང་ལ་སྐད་ཡིག་སློབ་ཁྲིད་བྱེད་ཞོར་ལ་རབ་དང་རིམ་པའི་ཡིག་གཟུགས་སློབ་ཁྲིད་བྱས་ནས་ད་བར་དུ་ལུས།
ལོ་འདི་དག་གི་རིང་ལ་ཡིག་གཟུགས་འགྲན་བསྡུར་ཁྲོད་རྒྱལ་ཁབ་རིམ་པའི་བྱ་དགའ་གཉིས་དང་ཞིང་ཆེན་རིམ་པའི་བྱ་དགའ་གསུམ་དང་ཁུལ་རིམ་པའི་བྱ་དགའ་བཅུ་ལྷག་བཅས་ཐོབ་ཡོད། ད་ལྟ་ཀན་སུའུ་ཞིང་ཆེན་ཡིག་གཟུགས་མཐུན་ཚོགས་ཀྱི་ལས་འཛིན་དང་ཚོགས་མི། དཔྱད་བརྗོད་པ་བཅས་ཡིན། སྐད་ཡིག་གི་དགེ་རྒན་ཆེན་མོ་གཞོན་པའི་ལས་ཐོབ་ཡོད་ཅིང་དཔྱད་རྩོམ་གསུམ་ཙམ་སྤེལ། ༼ ཡིག་གཟུགས་དང་མི་གཤིས། ༽ཞེས་པ་མཚོ་སྔོན་གླེང་སྟེགས་སུ་བརྙན་སྒྲོག་བྱས། རྗེས་ཕྱོགས་བོད་ཀྱི་ཡིག་གཟུགས་སྒྱུ་རྩལ་ལ་མུ་མཐུད་དུ་སློབ་སྦྱོང་དང་ཞིབ་འཇུག་བྱས་ཏེ། མེས་པོའི་ཤུལ་བཞག་རིག་གནས་རྩ་ཆེན་འདི་ཉམས་པ་སོར་ཆུད་དང་མ་ཉམས་གོང་འཕེལ་གཏོང་བའི་ལས་སུ་རང་ཉིད་ཀྱི་ཡོད་ཚད་ཕུལ་ནས། མི་རབས་རྗེས་མར་དཔེ་སྟོན་དང་འཇིག་རྟེན་ལ་ཡོང་བའི་ཟས་རིན་ཙམ་འབུལ་བའི་དམ་བཅའ་བརྟན་པོ་སྙིང་ལ་བཅངས་ཡོད་དོ། །
|
|
